TƏ́DA 1 - Bibəl ta Sar̄

Ngán Israel gə̄ i kem dəla loo kə́ Sinai tə́ ( 1—9 ) Tə́dá kutə ngán Israel gə̄ kə́ ta kəga dɔ

¹ Kɔ́ɔ̄ɓē ɔr̄ najə̄ kə Moijə kem dəla loo kə́ Sinai tə́, kə ndɔ̄ kə́ ta kəga dɔ yā nāā kə́ nge ko̰ jōó, kem ɓāl̄ ń utə̄ gō nge ń ngán Israel gə̄ teēn̄əń kɔ̄ɔ́ kem ɓē kə́ Ejiptə tə́ ní. Ɔr̄ najə̄ ní seneé i kem kújə kənge naā tə́, ədan na:

² Ḭ̄ ō, Aaro̰ ō, ī-tə́daī ngán Israel gə̄ malang. Ī-ndangiī rī de kə́ dəngam gə̄ malang makətūbūú kə gō gír kaa yādə́ gēé ō, gír kojə yādə́ gēé ō.

³ De kə́ dəngam gə̄ malang kə́ ɓāl̄ kutə jōó ō, kə́ ɓāl̄də́ ḭḭ dɔ kutə jōó tə́ kum kə̄ dɔɔ́ ō ń nin̄ i ngé rɔ̄ɔ̄ gə̄ kə́ Israel tə́ ní, ī-tə́daīdə́ kə gō gír ɓūtə̄ yādə́ gēé.

⁴ Ādī de kə́ bo gə̄ kógə̄ḿ kógə̄ḿ kə dɔ gír ɓē gēé tə́dan̄də́ sesí.

⁵ Rī de gə̄ ní n toó: Elisur ngōn̄ Sedeur tām̄ yā ngán Ruben gə̄ tə́.

⁶ Selumiel ngōn̄ Surisaday tām̄ yā ngán Simeo̰ gə̄ tə́.

⁷ Nason ngōn̄ Aminadab tām̄ yā ngán Juda gə̄ tə́.

⁸ Netanel ngōn̄ Suar tām̄ yā ngán Isakar gə̄ tə́.

⁹ Eliab ngōn̄ Helon tām̄ yā ngán Jabulo̰ gə̄ tə́.

¹⁰ Elisama ngōn̄ Amihud tām̄ yā ngán Epəraim ngōn̄ Jəjep tə́. Gamliel ngōn̄ Pedasur tām̄ yā ngán Manase ngōn̄ Jəjep tə́.

¹¹ Abidan ngōn̄ Gidoni tām̄ yā ngán Benjamḛ gə̄ tə́.

¹² Ahiejer ngōn̄ Amisaday tām̄ yā ngán Dan tə́.

¹³ Pagiel ngōn̄ Okəran tām̄ yā ngán Aser gə̄ tə́.

¹⁴ Eliasap ngōn̄ Dewel tām̄ yā ngán Gad tə́.

¹⁵ Ahira ngōn̄ Enan tām̄ yā ngán Nepətali gə̄ tə́.

¹⁶ De gə̄ kə́ dan ngán Israel gə̄ tə́ ń ɓārə́n̄də́ kadə̄ ndin̄ dɔ gír ɓē yādə́ gə̄ tə́ ní n noó. Nin̄ i ngol ngé rɔ̄ɔ̄ gə̄ kə́ Israel tə́.

¹⁷ Moijə nin̄ kə Aaro̰ ɔyn̄ de gə̄ ní adə̄ ərōn̄də́ tə́,

¹⁸ ba ɔsən̄ dɔ ngán Israel gə̄ malang naā tə́ kə ndɔ̄ kə́ ta kəga dɔ yā nāā kə́ nge ko̰ jōó. Ndangən̄ rī ngé gə̄ malang ń ɓāl̄də́ əla gír dɔ kutə jōó tə́ kum kə̄ dɔɔ́ ní makətūbūú kə gō gír kaadə́ gēé ō, kə gō gír kojə yādə́ gēé ō.

¹⁹ Moijə tə́dádə́ kem dəla loo kə́ Sinai tə́ tītə̄ ń Kɔ́ɔ̄ɓē ədanəń ní.

^20-43 Tə́dan̄ ngán Israel gə̄ i kə gō gír kaadə́ gēé ō, kə gō gír kojə yādə́ gēé ō. De kə́ dəngam gə̄ malang ń ɓāl̄də́ əla gír dɔ kutə jōó tə́ kum kə̄ dɔɔ́ á nin̄ i ngé rɔ̄ɔ̄ gə̄ ní, ndangən̄ rīdə́ makətūbūú. Əlan̄ gír i dɔ gír ɓē yā Ruben hágə Jakob tə́. Kutə de gə̄ ń tə́dan̄də́ ní n toó: De gə̄ kə́ gír ɓē yā Ruben tə́ i deē 46 500. De gə̄ kə́ gír ɓē yā Simeo̰ tə́ i deē 59 300. De gə̄ kə́ gír ɓē yā Gad tə́ i deē 45 650. De gə̄ kə́ gír ɓē yā Juda tə́ i deē 74 600. De gə̄ kə́ gír ɓē yā Isakar tə́ i deē 54 400. De gə̄ kə́ gír ɓē yā Jabulo̰ tə́ i deē 57 400. De gə̄ kə́ gír ɓē yā Epəraim ngōn̄ Jəjep tə́ i deē 40 500. De gə̄ kə́ gír ɓē yā Manase ngōn̄ Jəjep tə́ i deē 32 200. De gə̄ kə́ gír ɓē yā Benjamḛ tə́ i deē 35 400. De gə̄ kə́ gír ɓē yā Dan tə́ i deē 62 700. De gə̄ kə́ gír ɓē yā Aser tə́ i deē 41 500. De gə̄ kə́ gír ɓē yā Nepətali tə́ i deē 53 400.

⁴⁴ De gə̄ ń Moijə ō, Aaro̰ ō, de gə̄ kə́ gə̄rān̄də́ kə dɔ gír ɓē kə́ kutə gidə i jōó gēé ō tə́dan̄də́ ní, kutədə́ n noó.

⁴⁵ Ngán Israel gə̄ ń tə́dan̄də́ kə gō gír kojə yādə́ gēé á i ngé kə́ ɓāl̄də́ ḭḭ dɔ kutə jōó tə́ kum kə̄ dɔɔ́ ń nin̄ i ngé rɔ̄ɔ̄ gə̄ kə́ Israel tə́ ní,

⁴⁶ kutədə́ malang i deē 603 550.

Kəla kə́ sɔɔ́ dɔ ngán Lebi gə̄

⁴⁷ Tə́dan̄ de gə̄ kə́ gír ɓē yā Lebi tə́ gə̄ naā tə́ kə gotə ngán Israel gēé alé,

⁴⁸ tām̄ Kɔ́ɔ̄ɓē əda Moijə na:

⁴⁹ Ā ī-tə́da de gə̄ kə́ gír ɓē yā Lebi tə́ ō, ā ī-ndang rīdə́ ō, naā tə́ kə gotə ngán Israel gēé alé.

⁵⁰ Adə̄də́ kəla kə́ dɔ kújə́ ń ndū najə̄ yā Nə́ɓā i kemeé tə́ ní ō, kə́ dɔ yá̰a̰ rāā kəla gə̄ malang kə́ tū tə́ tə́ ō. A ətōn̄ kújə yā Nə́ɓā ní ō, yá̰a̰ rāā kəla gə̄ malang kə́ tū tə́ ō. A rāān̄ kəla kə́ tām̄ yā kújə́ ní tə́ ō, a ndin̄ ɓē i kə gō gidií ō.

⁵¹ Ta ndɔ́tə̄ kə kújə yā Nə́ɓāá anī i ngán Lebi gə̄ n a tútən̄ ní ō, ta dəba anī i nin̄ n a udən̄ ní ō. De kə́ karī ń a aw̄ rɔ̄ɔ̄ tə́ ní a tɔ̄l̄nən̄ kɔ̄ɔ́.

⁵² Ngán Israel gə̄ a ndin̄ i kə gō ɓūtə̄də́ gēé kem gérger yādə́ gə̄ tə́ kə gō gidə dərapóo rɔ̄ɔ̄ yādə́.

⁵³ Banī ngán Lebi gə̄ a ndin̄ ɓē i kə gō gidə kújə́ ń ndū najə̄ yā Nə́ɓā i kemeé tə́ ní, yā rāań kəla. Loo ń noō tə́ wōn̄g a rāām̄ kə ngán Israel gēé alé.

⁵⁴ Ngán Israel gə̄ rāān̄ yá̰a̰ malang ń Kɔ́ɔ̄ɓē əda Moijə ní.