SOPONI 3 - Bibəl ta Sar̄

Jerusalem oō ɓāŕ yā Nə́ɓā alé

¹ I yá̰á̰ kə́ to kum kaȳ aĺ kə́ ba̰ý beē, tām̄ yā ɓē kə́ əsō wōn̄g tə́ ō, nujə tə́ ō, kə́ ngé kḭḭ de gə̄ gúu taān̄ loo kemeé tə́ ō tə́!

² Ɓē ní oō ɓār̄ yā Kɔ́ɔ̄ɓē alé. Ni ndigə tāā ń Kɔ́ɔ̄ɓē tāān ní aĺ ō, ənī kemən adə̄ Kɔ́ɔ̄ɓē aĺ ō, ndɔ́tə̄ ngɔr kə̄ rɔ̄ Nə́ɓā yān tə́ aĺ ō.

³ De kə́ bo yān gə̄ ton̄ i tītə̄ ɓɔl gə̄ kə́ a nōōn̄ beé ō, ngé sarya yān gə̄ ton̄ i tītə̄ soó gə̄ kə́ aw̄n̄ ndo̰ó̰ ta loo tíbə́ tə́, ba dəloí anī, yá̰a̰ kəsa yādə́ gətóo kɔ̄ɔ́ beē ō.

⁴ Ngé koō ta yān gə̄ i ngé gān̄g róbə gə̄. Nin̄ i de gə̄ kə́ ngé gól̄ madə̄də́ gə̄. Ngé tun̄ yá̰a̰ yān gə̄ ɓōlə́n̄ gidə yá̰a̰ yā Nə́ɓā aĺ ō, rāān̄ yá̰a̰ gə̄ ń ndū najə̄ yān əda ní aĺ ō.

⁵ Ɓá tā ba Kɔ́ɔ̄ɓē i kem ɓēé, ni-rāā yá̰á̰ kógə̄ḿ kə́ gōtə́ aĺ alé. Ni-gān̄g sarya yān dəloí kə dɔ ndɔ̄ gə̄. Banī de kə́ majaĺ gə̄ rāān̄ yá̰a̰ kanjə̄ rɔ̄sɔl̄.

⁶ Kɔ́ɔ̄ɓē əda na: m̄-rāā adə̄ nápar de kə́ ngá̰ý gə̄ gətóon̄ kɔ̄ɔ́. Ndogə̄ mbal̄ yādə́ gə̄ ń a rɔ̄ɔ̄n̄neé dɔ rɔ̄də́ tə́ ní, m̄-nujəń kɔ̄ɔ́. m̄-rāā adə̄ deē gətóo kum róbə kɔsə yādə́ gə̄ tə́. Deē mān̄ tū tə́ to̰ alé! Ɓē bo yādə́ gə̄ i kə́ nujəń kɔ̄ɔ́: deē kógə̄ḿ kə́ kemeé to̰ gətóo.

⁷ M-ə́da rɔ̄ḿ najə̄, m-ə́da na: ngɔlaā ní ɓē a ɓōĺ gidəḿ, a ndigə tāā yāḿ gə̄. Adə̄ najə̄ gə̄ ń m-ə́lań ɓōĺ kemən tə́ ní, m-ā m̄-rāā yá̰a̰ gə̄ ń m-ə́dá ní aĺ ō, m-ā m̄-rāā yá̰a̰ kə ɓēé aĺ ō. I beé aĺ bátə́, tām̄ de kə́ kemeé gə̄ nāgə́n̄ láẃ rāān̄ yá̰á̰ kə́ majaĺ gə̄.

⁸ Kɔ́ɔ̄ɓē əda wáńg kə̄ ndágá na: I beé ní, ī-ngóōī ndɔ̄ ń kadə̄ m̄-reēń yā kəndā najə̄ dɔsí tə́ ní! m̄-gḛy kɔsə dɔ gotə nápar de kə́ rang gə̄ kə̄ naā tə́, m̄-gḛy kɔsə dɔ ɓē ko̰o̰ gə̄ kə̄ naā tə́, yā kadə̄ m̄-bə̄gań wōn̄g yāḿ kə́ ngá̰ý dɔdə́ tə́. A̰á̰ā̰, hor wōn̄g yāḿ a o̰o̰ dɔ nang kə taá malang.

Nə́ɓā a tūr̄ gíŕ nápar de gə̄

⁹ A̰á̰ā̰, m-ā m̄-tə́go ta nápar de gə̄ kadə̄ unjə̄ njáý njáý. Loo ń noō tə́ nin̄ malang a asən̄ ndɔ̄ȳm̄ mā Kɔ́ɔ̄ɓē ō, a rāān̄ kəla yā kadə̄m̄ kə kemdə́ kə́ kógə̄ḿ ō.

¹⁰ Ngé rɔȳḿ gə̄ ń nin̄ i kə̄ kem ɓē gə̄ tə́ malang ní, a ḭḭn̄ gidə bā gə̄ kə́ Etiopi tə́ sa̰y yā reē ō, a reēn̄ kə yá̰a̰ ndējə̄ yādə́ gə̄ yā kadə̄m̄ ō.

Gotə Israel gə̄

¹¹ Ndɔ̄ ń noō tə́ ní, rɔ̄ gír deē yāḿ gə̄ a sɔl̄də́ najə̄ yá̰a̰ rāādə́ gə̄ malang kə́ majaĺ tə́ to̰ aĺ ō, najə̄ yá̰á̰ ń nin̄ rāān̄ seḿ tə́ ní to̰ aĺ ō. Tām̄ kum mbang ngeé ń noō tə́ ní, de gə̄ ń noō malang ń əgōn̄ ɔjənə̄ń rɔ̄də́ ní, m-ā m-ɔ̄r̄də́ kɔ̄ɔ́ ɓēé loosí ō, a asəsí jā̰ā̰ bɔ̄gə̄sí dɔ mbal̄ bo yāḿ kə́ táĺ tə́ ō.

¹² I de kə́ dansí tə́ gə̄ ń najə̄də́ gətóo ō, i ngé ndoō gə̄ ō ní ngóy n m-ā m-ə́yá̰də́ ní. Nin̄ a əngen̄ loo kə́ yā ɓɔ̄ɔń rɔ̄də́ kemḿ tə́.

¹³ Israel gə̄ ń a teēn̄ ta yo tə́ ní, a rāān̄ yá̰á̰ kə́ majaĺ to̰ aĺ ō, a sorə̄n̄ to̰ aĺ ō, a gólə̄n̄ madə̄də́ gə̄ kə najə̄ kə́ tadə́ tə́ to̰ aĺ ō. Nin̄ a asən̄ kəsa yá̰a̰ ō, ɓīī ō, de kə́ yā rāādə́ kadə̄ ɓōlə́n̄ gətóo ō.

A télən̄ yā rāā ɓē kə́ Jerusalem gogə́

¹⁴ Ɓē kə́ Siyo̰, ə̄nī pā ō, ī-ndām̄ ō! Sḭḭ̄ de kə́ Israel gə̄, ə́gaī kɔŕ rɔ̄nel̄! A̰á̰ā̰, ɓē kə́ Jerusalem, ī-rāā rɔ̄nel̄ kə dan wurií gēé malang!

¹⁵ Najə̄ ń əndān̄ dɔsí tə́ á ɔȳsí ní, Kɔ́ɔ̄ɓē un kɔ̄ɔ́. Ni-rāā adə̄ madə̄ ba̰ā̰sí gə̄ aw̄n̄ kɔ̄ɔ́. Kɔ́ɔ̄ɓē ń i mban̄g kə́ Israel tə́ ní, ni i dansí tə́. Adə̄ majə kadə̄ ī-ɓōlíī yá̰á̰ kə́ to kum kaȳ aĺ to̰ alé.

¹⁶ Ndɔ̄ ngeé ń noō tə́ ní, a ədan̄ kem ɓē kə́ Jerusalem tə́ na: Ɓē kə́ Siyo̰, ī-lōō ɓōĺ, ī-lōō kadə̄ jīí ur̄ wak!

¹⁷ Kɔ́ɔ̄ɓē Nə́ɓā yāí i kemií tə́ danaá bang. I ni n i go̰ rɔ̄ɔ̄ kə́ nge tetə rɔ̄ɔ̄ ní. Rɔ̄n nelə̄n ngá̰ý najə̄ yāí tə́. Tár yān adī ndi kə kumuú kə́ kijə. Ni ndām̄ tām̄ yāí tə́ kə kɔŕ rɔ̄nelēé

¹⁸ tītə̄ kə́ ndɔ̄ rāā nāā tə́ beē. Kɔ́ɔ̄ɓē əda na: Jerusalem, m-ā m̄-rāā kadə̄ yá̰á̰ kə́ to kum kaȳ aĺ gətóo kɔ̄ɔ́ rɔ̄í tə́, yā kadə̄ rɔ̄í sɔlīiń to̰ alé.

¹⁹ Kum mbang ngeé ń noō tə́ ní, de gə̄ malang ń rējə̄n̄sí kə yá̰a̰ rāā kə́ gōtə́ aĺ ní, m-ā m̄-rāādə́ kadə̄ oyn̄. Kum mbang ngeé ń noō tə́ ní, de gə̄ yāsí gə̄ ń əngen̄ do ní, m-ā m̄-ndem̄ ta dodə́. Ngé gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, m-ā m̄-tél yā reē sedə́ gogə́. M-ā m̄-rāā kadə̄ a rɔyn̄sí ō, a gerə̄n̄ rīsí kə̄ kem ɓē gə̄ malang ń əlan̄ rɔ̄sɔl̄ dɔsí tə́ tū tə́ ní tə́ ō.

²⁰ Kum mbang ngeé noō tə́ ní, m-ā m̄-rāāsí kadə̄ ī-tél ī-reēī gogə́. m-ā m-ɔ́sə dɔsí naā tə́. M-ā m̄-tūr̄ yá̰á̰ ń rāāsí ní kɔ̄ɔ́ kə̄ ta kumsí tə́ beē. M-ā m̄-rāā kadə̄ rīsí a ɓār̄ ō, m-ā m̄-rāā kadə̄ a rɔyn̄sí ō, dan gír de gə̄ malang kə́ dɔ nang tə́ tə́. I Kɔ́ɔ̄ɓē n ɔr̄ najə̄ ní.