RUTƏ 1 - Bibəl ta Sar̄

Yá̰á̰ kə́ tōr̄ gə̄ kə́ reēn̄ dɔ gír kojə yā Elimelek tə́

¹ Ɓāl̄ yā ngé sarya gə̄ tə́ ní ɓō əsō kem ɓēé. Anī deē kógə̄ḿ kə́ Betlehem kə́ dɔ nang kə́ Juda tə́ ndɔ́tə̄n̄ nin̄ kə nə̄yá̰n ō, ngánən kə́ dəngam kə́ jōó gə̄ ō, ba aw̄ ndin̄ dɔ nang kə́ Moab tə́.

² Rī deē ní na i Elimelek ba rī nə̄yá̰n na i Noemi. Ngánən kə́ dəngam kə́ jōó gə̄ ní rī nge kə́ kógə̄ḿ na i Malon ō, rī kə́rēý na i Kilyon ō. Nin̄ i Epərata gə̄. Dan ń ndin̄ dɔ nang kə́ Moab tə́ ní,

³ Elimelek oy ba na̰y i Noemi nin̄ kə ngánən kə́ dəngam kə́ jōó gə̄.

⁴ Ngánən gə̄ ní táān̄ dəyá̰ gə̄ kə́ dɔ nang kə́ Moab tə́. Rī dəyá̰ kə́rēý na i Orpa, ba nge kə́ noō rīn na i Rutə. Nin̄ ndin̄ dɔ nang kə́ Moab tə́ asə ɓāl̄ kutə.

⁵ Gō tə́ anī Malon nin̄ kə Kilyon oyn̄ jōó mbak kɔ̄ɔ́ ba na̰y i Noemi kə kérneé. Ngánən gə̄ gətóon kɔ̄ɔ́ ō, ngaan gətóo kɔ̄ɔ́ ō.

Rutə aw̄ kə Noemi Betlehem

⁶ Dan ń Noemi ndi dɔ nang kə́ Moab tə́ ní, ni oō kadə̄ Kɔ́ɔ̄ɓē a̰a̰ gō gír deē yān gə̄ adə̄ adə̄də́ yá̰a̰ kəsa. Ni-ḭḭ dɔɔ́ kə umən kə́ dəyá̰ kə́ jōó gēé yā tél kaw̄ gogə́ dɔ nang kə́ Juda tə́.

⁷ Nin̄ ɔrə̄n̄ dɔɔ́ mbak. Ba dan ń nin̄ i róbó ní anī,

⁸ Noemi əda umən gə̄ ní na: Ī-tél āwī ɓē kó̰ó̰sí gēé tā. Ba ādə̄ Kɔ́ɔ̄ɓē rāā yá̰á̰ kə́ gōtə́ sesí tītə̄ ń ī-rāāīneé kə ngaasí gə̄ ń oyn̄ kɔ̄ɔ́ ní ō, tītə̄ ń ī-rāāīneé seḿ mā ní ō.

⁹ Ādə̄ Kɔ́ɔ̄ɓē rāā adə̄ ə́ngeī dəngam kógə̄ḿ kógə̄ḿ kə dɔsí ō, rāā adə̄ ī-ndiī lɔm kem kújə yā ngaasí gə̄ tə́ ō. Ba gō tə́ anī ni-əhɔdə́ kə̄ rɔ̄n tə́ ɓir̄də́ dagə. Loo ń noō tə́ dəyá̰ gə̄ ní mbutən̄ kə̄ nōō tə́ nōōn̄,

¹⁰ ba ədanən̄ na: A̰ á̰ j-a j-aw̄ seí dan deē yāí gə̄ tə́.

¹¹ Banī Noemi ədadə́ na: Ngánə́ḿ gə̄, ī-tél āwī ɓēé! ī-sāāī kaw̄ seḿ i najə̄ rí tə́? Ngáń kə́ dəngam gə̄ i kemḿ tə́ laā kadə̄ télən̄ ngaasí gə̄ ɓáý a?

¹² Ngánə́ḿ gə̄, ī-tél āwī ɓēé. Āwī ba ə́ya̰mī tɔdɔ̄ m̄-tɔgə ɓə́gá ngá̰ý kɔ̄ɔ́ adə̄ m-ā m̄-taā dəngam to̰ alé. Ká ré m-ə̄ndań kemḿ dɔ kənge dəngam tə́ ndɔ̄ɔ́ ɓōólaā yā kojəń ngáń kə́ dəngam gə̄ gə̄gē anī,

¹³ ā ī-ndiī yā ngóōdə́ kadə̄ tɔgən̄ a? Ā ī-lōōī gír taā de kə́ rang tə́ tām̄ yādə́ tə́ a? I beé alé ngánə́ḿ gə̄! Wurəḿ ɔlə̄m̄ ngá̰ý, wur kɔl yāḿ tɔȳ yāsí, tɔdɔ̄ Kɔ́ɔ̄ɓē əndam̄ kə ndéy jīneé.

¹⁴ Loo ń noō tə́ dəyá̰ gə̄ ní mbutən̄ kə̄ nōō tə́ ɓáý to̰. Gō tə́ anī Orpa əhɔ umən kə́ dəyá̰ kə̄ rɔ̄n tə́ ɓirə̄n dagə ba ɔtə aw̄. Banī Rutə tə́ya̰ gō umən tə́.

¹⁵ Tā anī Noemi əda Rutə na: Á̰a̰ madí tél aw̄ gō de gə̄ yān gə̄ tə́ ō, gō ɓesə̄ yān gə̄ ń i nə́ɓā yān gə̄ tə́ ō ní ī-tél āw̄ gō madí tə́ ō.

¹⁶ Banī Rutə tél ədan na: Ī-lōō kɔsə seḿ ta kəya̰ī ba tél gōí tə́. Loo ń ā āw̄ kə̄ tū tə́ ní m-ā m-āw̄ tū tə́ ō, loo ń ā ī-ɓīī tū tə́ ní m-ā m̄-ɓīī tū tə́ ō. De gə̄ yāí gə̄ a télən̄ de gə̄ yāḿ gə̄ ō, Nə́ɓā yāí a téĺ Nə́ɓā yāḿ ō.

¹⁷ Loo ń ā óy tū tə́ ní m-ā m-óy tū tə́ ō, a dubə̄mə̄n̄ i loo ní tə́ ō. Ré i yo tá a kēgə̄jí naā tə́ seí, ba ré i yá̰á̰ kə́ rang anī ādə̄ Kɔ́ɔ̄ɓē rāām̄ yá̰á̰ kə́ tōr̄ ń toō ō, rāām̄ adə̄ tɔȳ dɔ ō!

¹⁸ Dan ń Noemi a̰ā̰ kadə̄ Rutə əhɔ ngan̄g sāā kaw̄ seneé gáŕ tā ní asən ra seneé ta tél kaw̄ gogə́ ɓēé.

¹⁹ Ba nin̄ jōó mbak aw̄n̄ bátə́ ugə̄n̄ Betlehem. Dan ń nin̄ ugə̄n̄ ní najə̄də́ ɓār̄ kem ɓēé sow. Dəyá̰ gə̄ ədan̄ na: I Noemi nəkɔ́ a?

²⁰ Banī Noemi ədadə́ na: Ī-lōōī ɓārə́m̄ Noemi, banī ī-ɓāŕmī Mara! Tɔdɔ̄ Nə́ɓā kə́ tɔ́gən i ngá̰ý rāām̄ adə̄ wurəḿ ɔlə̄m̄ kə́ tɔȳ dɔ.

²¹ Ta kaw̄ḿ ní yá̰a̰ i ngá̰ý jīḿ tə́, banī ta télə́ḿ anī Kɔ́ɔ̄ɓē rāā adə̄ m̄-tél i jīḿ karī. Dan ń Kɔ́ɔ̄ɓē tél tūr̄ tan kə̄ dɔḿ tə́ sekə́m̄ ō, Nə́ɓā kə́ tɔ́gən i ngá̰ý rāām̄ yá̰á̰ kə́ majaĺ ō ní, kə ī-ɓāŕmī Noemi kumən na i rí?

²² I beé n Noemi əya̰ń dɔ nang kə́ Moab kɔ̄ɔ́ ba tél reēń gogə́ ɓēé kə umən kə́ dəyá̰ ń i Rutə kə́ Moab ní. Dan ń ugə̄n̄ Betlehem ní de gə̄ a əlan̄ i gír sāā kōō ɔ́rjə gə̄.