Makətūbə̄ ń Pol ndang adə̄ Rom gə̄ ní 9 - Bibəl ta Sar̄

Nə́ɓā ō gír de gə̄ ń ni-gə̄rādə́ ní ō

¹ Najə̄ ń m-ā m-ə́da toó i najə̄ kə́ rɔ̄kum. Mā i deē yā Kərist ō, m̄-sor̄ aĺ ō. Tá Ndíĺ kə́ Táĺ ədam̄ kemḿ tə́ kadə̄ i rɔ̄kum ō.

² Kemḿ nelə̄m̄ aĺ ngá̰ý ō, najə̄ tōr̄ kemḿ ngá̰ý kanjə̄ dəba ō.

³ m̄-ndə̄ngā kadə̄ Nə́ɓā kōnjə̄m̄ ō, ɔrə̄m̄ kɔ̄ɔ́ kadə Kərist tə́ ō, yā kajəń ngákó̰ó̰ḿ kə́ gír kojə yāḿ tə́ gə̄.

⁴ Tām̄ nin̄ i ngán Israel gə̄: Nə́ɓā rāādə́ i ngánən gə̄ tə́ ō, adə̄də́ kɔsə gɔn yān ō, rāā madə̄ naā sedə́ ō, adə̄də́ ndū najə̄ yān gə̄ ō, ɔjədə́ loo rāā kəla kadə̄n ō, ənī míndən yā kadə̄də́ yá̰a̰ gə̄ ō.

⁵ I nin̄ ɓáý to̰ n i ngán kaa ngé taā kem kə́ jóo gə̄ ní. Kə́ ta yā deē ndul gə̄ tə́ ɓáa Kərist i deē yādə́. Ni i dɔ yá̰a̰ gə̄ tə́ malang ō, i Nə́ɓā kə́ de gə̄ a tɔ̄ȳnən̄ ngándáńg ō. Adə̄ i tītə̄ ń noō.

⁶ Adə̄ yá̰á̰ ń Nə́ɓā ənī míndən yā rāā ní, ni-rāā aĺ i mbée a? Najə̄ m̄-sāā kəda ní n noó alé. Tɔdɔ̄ de gə̄ malang ń nin̄ i gír yā Israel tə́ ní, nin̄ i Israel kə́ rɔ̄kum gə̄ malang alé.

⁷ Tá de gə̄ malang ń nin̄ i gír yā Abəraham tə́ ní, nin̄ i ngánən kə́ rɔ̄kum gə̄ malang alé, tɔdɔ̄ Nə́ɓā əda Abəraham na: Gír kaan a teē i gír kojə yā Isaak tə́.

⁸ Kumən na ngán gə̄ ń ojən̄də́ kə gō yā dā̰ rɔ̄ɔ́ ní, i nin̄ n i ngáń Nə́ɓā gə̄ ní alé. I ngán gə̄ ń ojən̄də́ kə gō kənī míndə yā Nə́ɓāá ní ngóy n a rāān̄də́ ngáń kaa gə̄ kə́ rɔ̄kum gə̄ tə́ ní.

⁹ Tɔdɔ̄ Nə́ɓā nəkɔ́ ənī míndən tītə̄ ń toō beé na: Ɓāl̄ ndɔ̄ a n-a n-reē kə nāā nəkɔ́ ń toó, anī Sara a ndi kə ngōn̄ kə́ dəngam kógə̄ḿ jīn tə́.

¹⁰ Ba kə́ rang na̰y noó ɓáý to̰. Ngán Rebeka kə́ jōó gə̄ ní bɔbə̄də́ i kógə̄ḿ beē, i kaají Isaak.

^11-12 Ba loo gə̄rā ń Nə́ɓā a gə̄rā de gə̄ ní, i yá̰á̰ kə́ nəkɔ́ ɔjə loon kété jóo: Nə́ɓā a gə̄rā de gə̄ i kə gō ɓāŕ ń nəkɔ́ a ɓāŕdə́ ní, banī i tām̄ kəla rāādə́ gə̄ tə́ alé. Yā kɔjəń kadə̄ n-əya̰ yá̰á̰ kə́ nəkɔ́ ɔjə loon kété kɔ̄ɔ́ aĺ ní, Nə́ɓā əda Rebeka na: Nge kə́ nga tɔ́gə a əla dɔn gíŕ tɔ́gə yā nge kə́ dūú tə́ ní. Ba dan ngeé ń noō tə́ ní Rebeka ojə ngán gə̄ ní aĺ ɓáý.

¹³ Yá̰á̰ ń toō reē i kə gō najə̄ ń ndangən̄ kem makətūbūú tītə̄ ń toō beé ədan̄ na: m̄-tár Jakob ba m-īm̄ Esau.

¹⁴ Ní, kə j-ədaī na i rí? Kadə̄ Nə́ɓā i de kə́ gōtə́ aĺ a? Yḛtə aĺ bátə́!

¹⁵ Tɔdɔ̄ Nə́ɓā nəkɔ́ əda Moijə tītə̄ ń toō beé na: M-á̰a̰ kum tō ndoō yā deē ń m̄-gḛy ka̰a̰ kum tō ndoō yān ní ō, kumḿ a o̰o̰m̄ kə deē ń m̄-gḛy kadə̄ kumḿ o̰o̰m̄ seneé ní ō.

¹⁶ Adə̄ gə̄rā ń Nə́ɓā gə̄rā de gə̄ ní, i tām̄ kem ndigə yā deē tə́ aĺ ō, i tām̄ kəhɔ rɔ̄ tɔgə yā deē tə́ aĺ ō, banī i kə gō ka̰a̰ ń Nə́ɓā nəkɔ́ a̰a̰ kum tō ndoō yā deē ní ngóy.

¹⁷ I beé n Nə́ɓā ədań Parao̰ najə̄ ń ndangən̄ kem makətūbūú na: I mā n m-úniī yā kɔjəń tɔ́gə́ḿ ō, yā kadə̄ rīḿ ɓārəń dɔ nang tə́ laā malang ō ní.

¹⁸ Adə̄ deē ń Nə́ɓā gḛy ka̰a̰ kum tō ndoō yān ní a, Nə́ɓā a a̰a̰ kum tō ndoō yān ō, deē ń Nə́ɓā gḛy rāā kadə̄ kemən ngan̄g ngóróró ní a, a rāā kadə̄ kemən a ngan̄g ngóróró ō.

Wōn̄g yā Nə́ɓā ō, ka̰a̰ kə́ ni-a̰a̰ kum tō ndoō yā deē ō

¹⁹ Majanī ā ī-tél yā kəda na ré i tītə̄ ń noō anī, kum gɔŕyɔ̄ ń Nə́ɓā a gɔŕyɔ̄ de gə̄ ní ké na i rí wa. Tɔdɔ̄ yá̰á̰ ń kem Nə́ɓā ndigə ní, i de kə́ ba̰ý n a mbātə́ rāā ní?

²⁰ Banī ḭ̄ deē i náā á kadə̄ ī-nējī naā najə̄ kə Nə́ɓāá ní? Yá̰á̰ ń kɔdə̄ əɓā kə jīneé ní a tél a əda kɔdə̄ na ké i tām̄ rí tə́ áké kɔdə̄ əɓān beé wa a?

²¹ Nánjə̄ ń kɔdə jóó ló̰ȳ ní, asə rāań yá̰á̰ ń kemən ndigə ní aĺ a? Ré gḛy kəɓāń i jóó kə́ to rɔȳ anī, a əɓāń ō, i jóó kə́ karī anī a əɓāń ō aĺ a?

²² Nə́ɓā gḛy i kɔjə wōn̄g yān ō, tɔ́gən ō. Ɓá tā ba ni-tə́gā tan dɔ ngé gə̄ ń asə kadə̄ ni-rāā wōn̄g sedə́ ō, nujədə́ kɔ̄ɔ́ ō ní tə́.

²³ Nə́ɓā gḛy i kɔjə kɔsə gɔn yān kə́ to ɓōĺ ngá̰ý tām̄ yājí jḭḭ̄ ń kumən o̰o̰n sejí ō, jḭḭ̄ ń nəkɔ́ əndājí dɔ jīn kadə̄ j-udiī kem kɔsə gɔn yān tə́ ní ō.

²⁴ Tɔdɔ̄ jḭḭ̄ i kə́ Nə́ɓā ɓāŕjí i dan Jipə gə̄ tə́ ngóy alé, banī i dan nápar de kə́ rang gə̄ tə́ ō.

²⁵ I yá̰á̰ ń toō n Nə́ɓā nəkɔ́ əda kem makətūbə̄ yā Ojee tə́ na: Ngé gə̄ ń i gír deē yāḿ gə̄ aĺ ní, m-ā m̄-ɓāŕdə́ gír deē yāḿ gə̄ ō, ngé gə̄ ń m̄-táŕdə́ aĺ ní, m-ā m̄-ɓāŕdə́ kó tár yāḿ gə̄ ō ní.

²⁶ Ba loo ń ədan̄də́ tū tə́ na sḭḭ̄ i gír deē yāḿ gə̄ aĺ ní, i loo nəkɔ́ ń noō tə́ n a ɓārə́n̄də́ tū tə́ na i gír deē yā Nə́ɓā kə́ ndi kə kumneé gə̄ ní.

²⁷ Ɓáý to̰ ní Ijai ɔr̄ najə̄ yā ngán Israel gə̄ ngeé ń noō kə ndū boó əda na: Ká ré kutə ngán Israel gə̄ asəń i kə kutə nán̄g ngárə̄ḿnjēý kə́ ta bā bo tə́ gə̄gē anī, i gotədə́ kə́ na̰y n a ənge kajə yā Nə́ɓā ní.

²⁸ Tɔdɔ̄ Kɔ́ɔ̄ɓē a rāā kadə̄ najə̄ yān reē udə gírí dɔ nang tə́ laā i kə taá malang ō, i láẃ ō.

²⁹ I yá̰a̰ nəkɔ́ ń toō n Ijai əda kété ɓáý to̰ ní, ni-əda na: Nə́ngētə́ Kɔ́ɔ̄ɓē kə́ bo kə́ tɔ́gən i ngá̰ý əya̰ kōōjí sḛ́ý aĺ anī, ta yājí a to tītə̄ yā Sodom ō Gomor ō.

Israel ō Najə̄ kə́ Majə ō

³⁰ I beé ní kə j-ədaī na i rí tā? Yá̰á̰ ń kadə̄ j-ədaī ní n toó: De gə̄ ń nin̄ i Jipə aĺ gə̄ ō, sāān̄ kadə̄ kə n-télən̄ de kə́ gōtə́ gə̄ ta kum Nə́ɓā tə́ aĺ ō ní, ngɔlaā télən̄ de kə́ gōtə́ gə̄ ta kum Nə́ɓā tə́ tām̄ nin̄-taān̄ kem.

³¹ Banī ngán Israel gə̄ ń a sāān̄ ndū najə̄ kə́ yā rāā sedə́ kadə̄ kə n-télən̄ de kə́ gōtə́ gə̄ ta kum Nə́ɓā tə́ ní, mānə̄n̄ dɔ ndū najə̄ ní kɔ̄ɔ́.

³² I tām̄ yā rí tə́? I tɔdɔ̄ nin̄-gírə̄n̄ kadə̄ i taā kem yādə́ n a rāā kadə̄ nin̄-télən̄ de kə́ gōtə́ gə̄ ta kum Nə́ɓā tə́ ní alé, banī i kəla rāādə́ gə̄. Adə̄ mbal̄ əgadə́

³³ tītə̄ ń ndangən̄ kem makətūbūú ní, ndangən̄ na: Á̰a̰ī, m-ə̄ndā mbal̄ kə́ a tə́gā de gə̄ kem ɓē kə́ Siyo̰ tə́, mbal̄ bo kə́ a tə́gā de gə̄ tə́nīdə́. Ba deē ń taā kemən ní rɔ̄n a sɔlə̄n alé.