Makətūbə̄ ń Pol ndang adə̄ Rom gə̄ ní 7 - Bibəl ta Sar̄

Nge taā kem Kərist i de kə́ ɔr dɔn kɔ̄ɔ́ gír ndū najə̄ tə́

¹ Ngákó̰ó̰ḿ gə̄, yá̰á̰ ń m-ā m-ə́dásí toō i yá̰á̰ kə́ sḭḭ̄ kɔ́ gə̄ ī-gerī majə kɔ̄ɔ́ ɓá, tɔdɔ̄ sḭḭ̄ i de kə́ ī-gerī ndū najə̄ majə. Deē ń ndū najə̄ i dɔn tə́ ní i de kə́ ndi kə kumneé ɓáý.

² Tītə̄ ń toō ré dəyá̰ taā dəngam anī, dan ń dəngam ndi kə kumneé ɓáý ní, ndū najə̄ ń taā naā i dɔn tə́ ngándáńg, ba ré dəngam oy anī, ndū najə̄ i dɔn tə́ to̰ alé.

³ Adə̄ ré taā dəngam kə́ rang dan ń ngaan ndiń kə kumneé ɓáý ní anī, ni-rāȳ i mbée, ba ré dəngam oy kɔ̄ɔ́ anī, ndū najə̄ ní i dɔn tə́ to̰ alé. Adə̄ ré taā dəngam kə́ rang anī, rāȳ i mbée alé.

⁴ Ngákó̰ó̰ḿ gə̄, yāsí i tītə̄ ń noō ō tām̄ yā ndū najə̄ tə́, tɔdɔ̄ dan ń sḭḭ̄ ī-ɓooī naā kə Kərist ní, sḭḭ̄ i de kə́ koy kɔ̄ɔ́ gə̄ ō, adə̄ sḭḭ̄ i yā de kə́ rang. Sḭḭ̄ i de gə̄ yā Kərist ń ndól̄ dan de kə́ koy gə̄ tə́ ní kadə̄ jə-rāāiń yá̰á̰ kə́ majə gə̄ tām̄ yā Nə́ɓā tə́.

⁵ Tɔdɔ̄ ré jə-rāāī yá̰a̰ i kə gō kem ndigə yā dā̰ rɔ̄jí anī, ngur yá̰á̰ kə́ majaĺ gə̄ ń ton̄ kemjí tə́ ní, ndū najə̄ ndól̄də́ adə̄ nin̄-rāān̄ kəla rɔ̄jí tə́ kə taá malang. Loo ń noō tə́ jə-rāāī i yá̰a̰ gə̄ kə́ a aw̄n̄ sejí i yā kəlají ta yo tə́.

⁶ Ba ngɔlaā ní yá̰a̰ gə̄ ń i dɔjí tə́ tītə̄ ndū najə̄ ní, jḭḭ̄ i kə́ koy kɔ̄ɔ́ ta tə́ gə̄, adə̄ ndū najə̄ i dɔjí tə́ to̰ alé. Adə̄ jə-rāāī kəla i kə ta róbə́ kə́ kijə yā Ndíĺ kə́ Táĺ, banī i kə gō róbə yā ndū najə̄ kə́ ndang makətūbūú to̰ alé.

Ndū najə̄ ō yá̰á̰ kə́ majaĺ ō

⁷ Kumən na i rí? I kadə̄ i ndū najə̄ n i yá̰á̰ kə́ majaĺ ní a? I tītə̄ ń noō alé. Banī i ndū najə̄ ngóy n rāā á m̄-gerə̄ń yá̰á̰ ń a ɓārə́n̄ na i yá̰á̰ kə́ majaĺ ní. Tītə̄ ń toō ní ré ndū najə̄ əda na: Ī-ndə̄ngā yá̰a̰ yā madí aĺ anī, mā m-ā m̄-ger̄ kadə̄ ndə̄ngā yá̰a̰ yā naā i yá̰á̰ kə́ majaĺ alé.

⁸ Dan ń gō míndə gə̄ reēn̄ ɓá ní, yá̰á̰ kə́ majaĺ tetə rɔ̄n gō tə́, ba əndā ngur yá̰á̰ kə́ majaĺ gə̄ malang kemḿ tə́. Tɔdɔ̄ ré ndū najə̄ gətóo anī, yá̰á̰ kə́ majaĺ rāā rɔ̄n i yá̰á̰ kə́ koy kɔ̄ɔ́ tə́.

⁹ Tām̄ kété dan ń gō míndə gətóó ní, mā m̄-ndi majə. Ba dan ń ndū najə̄ reē ní anī, yá̰á̰ kə́ majaĺ tél ajə ying gogə́,

¹⁰ ba mā m-óy kɔ̄ɔ́. Gō míndə́ ń i yá̰á̰ kə́ kadə̄ a rāāī ḭ̄ deē kadə̄ ī-ndi kə kumuú ní, yāḿ mā ɓáa tél i yá̰á̰ kə́ reē kə yoó dɔḿ tə́.

¹¹ Tɔdɔ̄ dan ń gō míndə reē ní, yá̰á̰ kə́ majaĺ tetə rɔ̄n gōn tə́, ba kɔ́ləm̄ aw̄ seḿ kum yo tə́.

¹² Adə̄ ndū najə̄ i yá̰á̰ kə́ majaĺ alé ba i yá̰á̰ kə́ táĺ ō, gō míndə i yá̰á̰ kə́ táĺ ō, kə́ gōtə́ ō, kə́ majə ō.

¹³ Adə̄ yá̰á̰ ń i yá̰á̰ kə́ majə ní tél reē kə yoó dɔḿ tə́ a? I tītə̄ ń noō alé. I majaĺ n rāā yá̰á̰ ń noō ní. Ni ɔjə kə̄ ndágá kadə̄ ni i yá̰á̰ kə́ majaĺ. Tɔdɔ̄ ni-un yá̰á̰ kə́ majə tɔ̄l̄məń. Loo téĺ ń yá̰á̰ kə́ majaĺ téləń yá̰á̰ kə́ majaĺ ngá̰ý al̄ naā kə ta kūl̄ gō míndə́ ní n noó.

Majaĺ o̰o̰ ɓē dɔ deē tə́

¹⁴ Jə-ger̄ majə kadə̄ ndū najə̄ i yá̰á̰ yā Ndíĺ. Ba mā i de kə́ kə dā̰ rɔ̄ḿ ō, mā i ɓəlo yā majaĺ ō.

¹⁵ Adə̄ yá̰á̰ ń m̄-rāā ní, m̄-ger̄ kum alé, tɔdɔ̄ yá̰á̰ ń m̄-gḛy rāā ní m̄-rāā alé, banī yá̰á̰ ń m̄-gḛy rāā aĺ ngá̰ý ní tá m̄-rāā.

¹⁶ Ba ré yá̰á̰ ń m̄-gḛy aĺ ní m̄-rāā anī, loo ń noō tə́ ní m̄-ndigə i najə̄ gō ndū najə̄ tə́ ō, m-ə́da kadə̄ ndū najə̄ i yá̰á̰ kə́ majə ō.

¹⁷ Adə̄ deē ń a rāā yá̰á̰ ń toō ní, i mā to̰ alé, banī i majaĺ kə́ kemḿ tə́.

¹⁸ Dan ń mā i ɓəlo yā yá̰á̰ kə́ majaĺ kɔ̄ɔ́ ɓá ní, tɔ́gə́ḿ sḛ́ý kə́ kadə̄ m̄-rāań yá̰á̰ kə́ majə gətóo. m̄-gḛy rāā yá̰á̰ kə́ majə ngá̰ý ɓá tā, ba loo rāān dumə̄m̄ kɔ̄ɔ́.

¹⁹ Tɔdɔ̄ yá̰á̰ kə́ majə ń m̄-gḛy ní m̄-rāā alé, banī i yá̰á̰ kə́ majaĺ ń m̄-gḛy aĺ ní tá m̄-rāā.

²⁰ Ba ré yá̰á̰ ń m̄-gḛy aĺ ní tá m̄-rāā anī, deē ń a rāā yá̰á̰ ń noō ní i mā to̰ alé, banī i majaĺ kə́ kemḿ tə́.

²¹ Loo ń noō tə́ ní ndū najə̄ ń m̄-teē dɔ tə́ ní n toó: Ré m̄-sāā rāā yá̰á̰ kə́ majanī i yá̰á̰ kə́ majaĺ n m-ásə rāā ní.

²² Ndū najə̄ yā Nə́ɓā nel̄ kemḿ ngá̰ý,

²³ ba m̄-teē dɔ ndū najə̄ kə́ rang tə́ kemḿ tə́ ɓáý to̰, kə́ a rɔ̄ɔ̄ ndū najə̄ yā Nə́ɓā ń m̄-ndigə ní kɔ̄ɔ́ kemḿ tə́. Ndū najə̄ kə́ rang ní rāām̄ adə̄ m̄-tél ɓəlo yā yá̰á̰ kə́ majaĺ ń to kemḿ tə́ ní.

²⁴ Háy, rɔ̄ ndoō kə́ ba̰ý beē! I náā n a taām̄ jī kə́ nge kəlam̄ ta yo tə́ ń toō ní?

²⁵ m̄-ndadə̄ Nə́ɓā kə ta kūl̄ Jeju Kərist, tɔdɔ̄ ni-taām̄ jī rɔ̄ḿ ngeé ń toō tə́. Adə̄ mā i ɓəlo yā Nə́ɓā kə gír̄ yāḿ ō, ɓəlo yā majaĺ kə dā̰ rɔ̄ḿ ō.