Makətūbə̄ ń Pol ndang adə̄ Rom gə̄ ní 5 - Bibəl ta Sar̄

Lápə́ya to dɔ dáń Nə́ɓā tə́ kə deé

¹ Jə-téliī de kə́ súmūú gə̄ ta kum Nə́ɓā tə́ kə gō taā kem yājí kɔ̄ɔ́ ɓá, adə̄ ngɔlaā ní dɔ dáńjí kə Nə́ɓāá i lápə́ya kə ta kūl̄ Kɔ́ɔ̄ɓē yājí Jeju Kərist.

² I kə kūl̄neé n j-əngeīń ta róbə kadə̄ Nə́ɓā rajəńjí dan ń jə-taāīń kem ní. Rajə yān i naā tə́ sejí, yá̰á̰ ń j-ɔjə rɔ̄jí tāmən tə́ ní i kɔsə gɔn yā Nə́ɓā ń j-əndāī kemjí dɔ tə́ ní.

³ Ba j-ɔjiī rɔ̄jí i tām̄ kɔsə gɔn ń toō tə́ ngóy alé, tɔdɔ̄ jə-gerī kadə̄ wur kɔl yājí rāā adə̄ j-əhɔī rɔ̄jí tɔ́gə ō,

⁴ adə̄ kəhɔ rɔ̄ tɔgə yājí rāā adə̄ Nə́ɓā ndigə taā kem yājí ō. Ndigə ń ndigə taā kem yājí ní rāā kadə̄ j-əndāī kemjí dɔn tə́ ō.

⁵ Ba deē ń əndā kemən dɔ Nə́ɓā tə́ ní, a ənge rɔ̄sɔl̄ loon tə́ alé, tɔdɔ̄ Nə́ɓā əla tár yān kemjí tə́ i kə ta kūl̄ Ndíĺ kə́ Táĺ ń adə̄jí ní.

⁶ I dan ń tɔ́gə́jí gətóoń ɓáý ní n Kərist oyń tām̄ yā ngé rāā majaĺ gə̄ tə́, ndɔ̄ ń Nə́ɓā ɔjəń tə́ ní.

⁷ Kadə̄ deē ndigə koy tām̄ yā madə̄n kə́ i de kə́ súmūú tə́ ní i yá̰á̰ kə́ sétə́ ngá̰ý. Ká ré i de kə́ majə gə̄gē anī, majə tá deē a əre wurən njam yā koy tām̄ yān tə́.

⁸ Ba á̰a̰ī yá̰á̰ ń Nə́ɓā rāā ɔjəńjí táŕ ń ni-táŕjí ní: I dan ń jḭḭ i ngé rāā majaĺ gə̄ ɓáý ní n Kərist oy tām̄ yājí tə́ ní.

⁹ Jə-téliī de kə́ súmūú gə̄ ta kum Nə́ɓā tə́ ngɔlaā i kə ta kūl̄ kadə̄ rɔ̄ yānneé. Adə̄ wōn̄g yā Nə́ɓā ń a reē ɓáý ní, ni-ajəjí kɔ̄ɔ́ ta tə́.

¹⁰ Dan ń jḭḭ̄ i madə̄ ba̰ā̰ Nə́ɓā gə̄ ɓáý ní, Nə́ɓā rāā adə̄ yo Ngōn̄ kemən əndājí naā tə́ seneé. Dan ń ngɔlaā á əndājí naā tə́ seneé toō ní, loo kadə̄ ajəjí kə ta kūl̄ Ngōnən kə́ ndi kə kumneé aĺ ní i ba̰ý?

¹¹ Ba yá̰á̰ kógə̄ḿ to noó ɓáý to̰: Kɔjə ń j-ɔjiī rɔ̄jí tām̄ yā Nə́ɓā tə́ ní, i kə ta kūl̄ Kərist ń əndājí naā tə́ kə Nə́ɓāá ngɔlaā kɔ̄ɔ́ ɓá toō.

Adam ō Kərist ō

¹² I de kə́ kal kógə̄ḿ beē n rāā adə̄ majaĺ reē dɔ nang tə́ ní, ba majaĺ reē kə yoó, adə̄ de gə̄ malang oyn̄, tɔdɔ̄ nin̄ malang rāān̄ majaĺ.

¹³ Tɔdɔ̄ kété tá kadə̄ Nə́ɓā adə̄ Moijə ndū najə̄ ní, rāā majaĺ to dɔ nang tə́ kɔ̄ɔ́ ɓá. Ba dan ń ndū najə̄ gətóó ɓáý ní, tə́dan̄ rāā yá̰á̰ kə́ majaĺ alé.

¹⁴ Ɓá tā ba əla gír dɔ Adam tə́ bátə́ ugə̄ń ɓāl̄ yā Moijə tə́ ní, de gə̄ ń rāān̄ majaĺ kə́ tītə̄ yā Adam aĺ ní gə̄gē, yo o̰o̰ ɓē dɔdə́ tə́. Kété ní Adam mbātə́ rāā yá̰á̰ ń Nə́ɓā ədan ní. Ni i kum gotə nge ń sɔɔ̄ kadə̄ a reē ní.

¹⁵ Ba majaĺ yā Adam əndā gō yá̰á̰ ń rajə yā Nə́ɓā adə̄ karī tə́ ní alé. Tɔdɔ̄ kósə de gə̄ ngá̰ý oyn̄ tām̄ rāā majaĺ yā de kə́ kal kógə̄ḿ beē tə́ ɓá tá, ba rajə yā Nə́ɓā rāā yá̰á̰ kə́ ngá̰ý tɔȳ ō. Tá yá̰a̰ gə̄ ń Nə́ɓā adə̄ de gə̄ kə ta kūl̄ de kə́ kal kógə̄ḿ beē ń i Jeju Kərist ní, i yá̰á̰ kə́ bo ngá̰ý tɔȳ ō ɓáý to̰.

¹⁶ Yá̰á̰ kə́ teē loo kadə̄ karī yā Nə́ɓā tə́ ō, kə́ loo rāā majaĺ yā de kə́ kal kógə̄ḿ beé tə́ ō, a asən̄ naā i ba̰ý? Tɔdɔ̄ sarya rāā majaĺ yā de kə́ kal kógə̄ḿ beē ń toō a teē i yo. Ba yá̰á̰ ń Nə́ɓā adə̄ de gə̄ karī gō majaĺ yādə́ gə̄ kə́ rāān̄ nja ngá̰ý gə̄ tə́ ní, i kadə̄ nin̄-télən̄ de kə́ súmūú gə̄.

¹⁷ Rɔ̄kum, yo ɔjə tɔ́gən kə̄ ndágá i kə ta kūl̄ yá̰a̰ rāā kə́ gō tə́ aĺ yā de kə́ kal kógə̄ḿ beē. Banī kə ta kūl̄ Jeju Kərist ń i de kə́ kal kógə̄ḿ beē ní, jḭḭ̄ j-əngeī yá̰á̰ jī Nə́ɓā tə́ tɔȳ nge ń noō: Ni-rāā majə sejí i karī ō, rāā adə̄ jə-téliī de kə́ gōtə́ gə̄ ō. J-a jə-ndiī kə kumjí i kə ta kūl̄ Kərist ō, j-a j-o̰o̰ī ɓē naā tə́ seneé ō.

¹⁸ I beé n yá̰a̰ rāā kə́ gōtə́ aĺ yā de kə́ kal kógə̄ḿ beē ń i Adam ní, reēń kə saryaá dɔ deē ndul gə̄ tə́ malang ní. I tītə̄ noō n yá̰a̰ rāā kə́ gōtə́ yā de kə́ kal kógə̄ḿ beē ń i Jeju Kərist ní, unəń sarya kɔ̄ɔ́ dɔ deē ndul gə̄ tə́ malang ō, rāā adə̄ nin̄-ndin̄neé kə kumdə́ ō ní.

¹⁹ Tɔdɔ̄, tītə̄ ń de kə́ kal kógə̄ḿ beē mbātə́ najə̄ ta Nə́ɓā tə́, adə̄ de kə́ ngá̰ý gə̄ malang télən̄ń gíŕ ngé rāā majaĺ gə̄ ní, tītə̄ nəkɔ́ ń toō ɓáý to̰, de kə́ kal kógə̄ḿ beē a oō najə̄ ta Nə́ɓā tə́ yā kadə̄ de kə́ ngá̰ý gə̄ télnə̄ń de kə́ súmūú gə̄ ō.

²⁰ Tɔdɔ̄ ndū najə̄ yā Nə́ɓā reē yān yā kadə̄ majaĺ ń de gə̄ rāān̄ ní taā loo ɓá tā, banī loo ń majaĺ yā de gə̄ taā loo tū tə́ ní, rajə yā Nə́ɓā al̄ ngandə̄ tū tə́ ō.

²¹ Adə̄ loo ń noō tə́ ní, tītə̄ ń majaĺ taā loo kə yoó ní, tītə̄ ń noō ɓáý to̰ rajə yā Nə́ɓā a o̰o̰ ɓē kə ta kūl̄ yá̰á̰ kə́ gōtə́ yā kaw̄ń sejí tū ndi kə kumuú kə́ ngáńdáńg tə́, kə ta kūl̄ Kɔ́ɔ̄ɓē yājí Jeju Kərist ō.