Makətūbə̄ ń Pol ndang adə̄ Rom gə̄ ní 3 - Bibəl ta Sar̄

¹ I yá̰á̰ rí n Jipə gə̄ tɔȳn̄ de kə́ rang gə̄ loo n tə́ ní? Kəja mɔtə a teē i rí?

² Jipə gə̄ tɔȳn̄ de kə́ rang gə̄ i kə yá̰a̰ malang. Tɔdɔ̄ i nin̄ n Nə́ɓā ədadə́ najə̄ kété kadə̄ ngɔ̄mə̄n̄ ní.

³ Ba ré ngé kə́rēý gə̄ dandə́ tə́ ngɔ̄mə̄n̄ najə̄ gə̄ ń toō aĺ anī, kə yā kəda na i rí? Kadə̄ Nə́ɓā na a ndi dɔ míndən tə́ alé tām̄ nin̄ na ngɔ̄mə̄n̄ najə̄ yān gə̄ alé a?

⁴ I tītə̄ ń noō alé. Tɔdɔ̄ ká ré de gə̄ malang i ngé sor̄ gə̄ gə̄gē anī, Nə́ɓā i nge kəda najə̄ kə́ rɔ̄kum ngándáńg, tītə̄ ń makətūbə̄ yān ədań ní. Ndangən̄ na: Ḭ̄ Nə́ɓā ḭ̄ i de kə́ súmūú kem najə̄ kɔrīí gə̄ tə́, adə̄ ré de gə̄ ɔsənī rāā yá̰á̰ kə́ gō tə́ aĺ gə̄gē anī, najə̄ a əhɔdə́.

⁵ Ba ré yá̰a̰ rāājí kə́ gōtə́ aĺ gə̄ ɔjən̄ kadə̄ Nə́ɓā i de kə́ gōtə́ anī, kə j-əda na i rí ɓáý to̰? Dan ń Nə́ɓā rāā wōn̄g sejí ní, ni i de kə́ gōtə́ a? Najə̄ ń m-ɔ̄r̄ ní i kə gō yā deē ndul gēé.

⁶ Ba i tītə̄ ń noō alé, tɔdɔ̄ ré i tītə̄ ń noō anī, loo kadə̄ Nə́ɓā a gān̄g sarya dɔ de kə́ dɔ nang tə́ gə̄ tə́ i ba̰ý?

⁷ Ré najə̄ yāḿ kə́ sor̄ gə̄ ɔjən̄ kadə̄ Nə́ɓā i de kə́ rɔ̄kum ō, teēn̄ i kɔsə gɔn yā Nə́ɓā ō ɓáý to̰ anī, i tām̄ rí tə́ á tél əndān̄ sarya dɔḿ tə́ ɓáý to̰ najə̄ majaĺ yāḿ gə̄ tə́ ní?

⁸ Ré i beé anī, i tām̄ rí tə́ á j-ədaī na kə jə-rāāī majaĺ kadə̄ yá̰á̰ kə́ majə teēń tū tə́ aĺ ní? Ngé tétə̄ najə̄ dɔḿ tə́ gə̄ ɔsəmə̄n̄ nge kɔr̄ najə̄ kə́ tītə̄ ń noō gə̄. Nin̄ ń noō sarya a əhɔdə́, ba i nin̄ kɔ́ gə̄ n sāān̄ ní.

De kə́ súmūú gətóo

⁹ Kə j-ədaī na i rí? Jḭḭ̄ Jipə gə̄ ní, jə-tɔyī gotə de gə̄ a? Sḛ́ý aĺ bátə́! Tɔdɔ̄ m-ə́dásí najə̄ kə́ dɔ tə́ kété kɔ̄ɔ́ kadə̄ Jipə gə̄ gə̄gē, Gərek gə̄ gə̄gē, nin̄ malang i gíŕ tɔ́gə yā majaĺ tə́.

¹⁰ Tɔdɔ̄ ndangən̄ kem makətūbūú na: De kə́ súmūú gətóo, kal kógə̄ḿ lélék gə̄gē gətóo.

¹¹ De kə́ ger̄ najə̄ gətóo. Deē kógə̄ḿ kə́ sāā Nə́ɓā gətóo.

¹² Nin̄ malang əya̰n̄ róbə́ kə́ gō tə́ kɔ̄ɔ́, nin̄ malang télən̄ de kə́ rim gə̄. Nge kógə̄ḿ kə́ rāā yá̰á̰ kə́ majə gətóo, kal kógə̄ḿ lélék gə̄gē gətóo.

¹³ Nga̰ā̰də́ i bāá ɓádə́ kə́ ta ra kə wōyōó. Nin̄ i ngé gól̄ loo kə tadə́ karī gə̄. Najə̄ kə́ tadə́ tə́ i tītə̄ kong lī beé.

¹⁴ Ndɔ̄ĺ kə́ kə wur katāá i ngá̰ý tadə́ tə́.

¹⁵ Njadə́ ɔl ngá̰ý loo ɓōkə́ mósə de gə̄ nang tə́ tə́.

¹⁶ Loo malang ń nin̄-mānə̄n̄ tū tə́ ní, yá̰á̰ kə́ nujə ō, yá̰á̰ kə́ to rɔ̄ ndoō ō, i tū tə́.

¹⁷ Róbə́ ń i róbə kem sɔl̄ lɔm ní, nin̄-gerə̄n̄ alé.

¹⁸ Ɓōĺ Ndíĺ Nə́ɓā gətóo rɔ̄də́ nin̄ tə́.

¹⁹ Ba jə-gerī majə kadə̄ yá̰a̰ malang ń ndū najə̄ əda ní, əda i tām̄ yā de gə̄ ń ndū najə̄ i dɔdə́ tə́ ní, yā kadə̄ loo nējə̄ najə̄ dɔ rɔ̄ tə́ gətóo ō, kadə̄ sarya yā Nə́ɓā i dɔ de kə́ dɔ nang tə́ gə̄ tə́ malang ō.

²⁰ Adə̄ i tām̄ ń noō tə́ n deē kógə̄ḿ kə́ tél de kə́ súmūú ta kum Nə́ɓā tə́ tām̄ rāā kə́ ni-rāā yá̰a̰ gə̄ kə́ ndū najə̄ ɔjə tə́ gətóó ní. Tɔdɔ̄ ndū najə̄ a rāā kə deé i kadə̄ gerə̄ń yá̰á̰ kə́ majaĺ gə̄ ń rāā ní ngóy.

Loo kajə ń Nə́ɓā ajə deē ní

²¹ Ba ngɔlaā Nə́ɓā ɔjəjí loo rāā ń rāājí adə̄ jə-téliī de kə́ gōtə́ gə̄ ta kumən tə́ kanjə̄ ndū najə̄ ní. Ndū najə̄ ngeé ń toō ō, ngé koō ta gə̄ ō, ədan̄ wáńg

²² kadə̄ Nə́ɓā rāā de gə̄ adə̄ télən̄ de kə́ gōtə́ gə̄ ta kumən tə́, i tām̄ taā ń nin̄-taān̄ kem Jeju Kərist tə́ ní. Ni-rāā tām̄ yādə́ tə́, i tɔdɔ̄ nin̄-tītə̄n̄ naā malang ta kumən tə́.

²³ Nin̄ malang rāān̄ majaĺ, adə̄ i tām̄ ń noō tə́ n asən̄ kugə̄ tū kɔsə gɔn yā Nə́ɓā tə́ aĺ ní.

²⁴ Ba Nə́ɓā rāādə́ adə̄ télən̄ de kə́ súmūú gə̄ i karī kə ta kūl̄ rajə yānneé, tām̄ Jeju Kərist gān̄g dɔdə́.

²⁵ I Jeju ngeé ń toō n Nə́ɓā əndān nojí tə́ tām̄ kadə̄ ni-tél yá̰á̰ kə́ tun̄ kɔrə̄ń majaĺ ní. Ni-adə̄ mósən nəkɔ́ tām̄ yā ngé gə̄ ń taān̄ kem tə́ ní. Nə́ɓā əhɔ gír majaĺ kə́ kété jóo gə̄ to̰ alé, yā kɔjəń kadə̄ ni i de kə́ gōtə́.

²⁶ Kété jóó ní, Nə́ɓā əndā njan dɔ majaĺ gə̄ tə́, ba ɓōólaā ń j-awīiń toō, ni-gḛy kɔjə kadə̄ ni i de kə́ gōtə́ ō, kadə̄ i ni n a rāā de gə̄ ń a taān̄ kem Jeju ní kadə̄ télən̄ de kə́ gōtə́ gə̄ ō ní.

²⁷ Ní loo kadə̄ j-ɔjiī rɔ̄jí i rá ɓáý? Lon gətóo. I tām̄ rí tə́? I tām̄ yā kəla yājí gə̄ tə́ a? I tām̄ yā kəla yājí gə̄ tə́ alé, banī i tām̄ yā taā kem yājí tə́.

²⁸ Tɔdɔ̄ jə-ger̄ kadə̄ deē a tél de kə́ súmūú ta kum Nə́ɓā tə́ i kə gō taā kem yānneé, banī i kə gō rāā ń a rāā yá̰a̰ gə̄ ń ndū najə̄ yā Moijə əda tə́ ní alé.

²⁹ Ré i beé aĺ anī, Nə́ɓā ní i Nə́ɓā yā Jipə gə̄ ngóy ba i Nə́ɓā yā nápar de gə̄ alé. Ba ni i Nə́ɓā yā tə̄rā gə̄ ō,

³⁰ tɔdɔ̄ Nə́ɓā i kógə̄ḿ beē ngóy. Ni a rāā kadə̄ Jipə gə̄ gə̄gē, de gə̄ ń nin̄ i Jipə aĺ gə̄ ní gə̄gē, télən̄ de kə́ gōtə́ gə̄ ta kumən tə́ i kə ta kūl̄ taā kem.

³¹ A ń noō ní, kadə̄ taā ń taān̄ kem ní rāā kadə̄ ndū najə̄ i yá̰á̰ kə́ kanjə̄ kumən a? Sḛ́ý aĺ bátə́! I loo kə́ beé tə́ tā n i yá̰á̰ kə́ kə kumneé ɓáý ní.