Makətūbə̄ ń Pol ndang adə̄ Rom gə̄ ní 14 - Bibəl ta Sar̄

Ī-gān̄g sarya dɔ ngákó̰ó̰í gə̄ tə́ alé

¹ Deē ń i kə́ mbūsə̄ tū taā kem yān tə́ aĺ ɓáý ní, ə́hɔin̄ kə̄ rɔ̄sí tə́ kanjə̄ tə́da najə̄ dɔ gír̄ yān gə̄ tə́.

² Deē ń i kə́ mbūsə̄ tū taā kem yān tə́ ní, ənī kemən əsań yá̰a̰ malang karī, ba nge ń ni i kə́ mbūsə̄ tū taā kem yān tə́ aĺ ní, əsa i mbī kámbə gə̄ ngóy.

³ Ní, ādə̄ nge ń əsa ní lōō kidə tan gír nge ń əsa aĺ tə́ ní ō, ādə̄ nge ń əsa aĺ ní lōō gān̄g sarya dɔ nge ń əsa tə́ ní ō, tɔdɔ̄ Nə́ɓā əhɔn kə̄ rɔ̄n tə́ kɔ̄ɔ́.

⁴ Ḭ̄ i náā kadə̄ ī-gān̄g sarya dɔ nge kəla yā madí tə́ ní? Ká ré nge kəla ní əsō aké, əsō aĺ anī, usiī alé, tɔdɔ̄ nge ń noō sɔɔ̄ i kɔ́ɔ̄n. Banī ni a ra dɔɔ́ ngan̄g, tɔdɔ̄ Kɔ́ɔ̄ɓē asə rāān kadə̄ ra dɔɔ́ karī.

⁵ Deē kógə̄ḿ gír̄ kadə̄ ndɔ̄ kə́rēý gə̄ i ndɔ̄ kə́ bo tɔȳ madə̄ gə̄. Madən̄ kə́ rang gír̄ kadə̄ ndɔ̄ gə̄ i kə́ tītə̄n̄ naā malang. Majə kadə̄ nin̄ jōó mbak ní, kemdə́ tɔ́sə̄də́ dɔ yá̰á̰ ń nin̄-gírə̄n̄ tə́ ní alé.

⁶ Nge ń gír̄ kadə̄ ndɔ̄ kə́rēý gə̄ i kə́ bo tɔȳ madə̄ gə̄ ní, rāā i tām̄ yā Kɔ́ɔ̄ɓē tə́ ō, nge ń ənī kemən əsań yá̰a̰ malang ní rāā i tām̄ yā Kɔ́ɔ̄ɓē tə́ ō, tɔdɔ̄ ni-ndadə̄ Nə́ɓā. Ba nge ń mbātə́ kəsa yá̰a̰ malang ní, rāā i tām̄ yā Kɔ́ɔ̄ɓē tə́ ō, tɔdɔ̄ ni-ndadə̄ Nə́ɓā ō.

⁷ Deē kógə̄ḿ danjí tə́ kə́ ndi kə kumneé tām̄ yān nəkɔ́ tə́ ngóy, aké oy i tām̄ yān nəkɔ́ tə́ ngóy ní gətóo.

⁸ Tɔdɔ̄ ré jə-ndiī kə kumjí anī, jə-ndiī kə kumjí i tām̄ yā Kɔ́ɔ̄ɓē tə́ ō, ré j-oyiī anī, j-oyiī i tām̄ yā Kɔ́ɔ̄ɓē tə́ ō. Adə̄ ká ré jə-ndiīń i kə kumjí aké, j-oyiīń i mbée gə̄gē anī, jḭḭ̄ i yā Kɔ́ɔ̄ɓē.

⁹ Tɔdɔ̄ i tām̄ najə̄ ń noō tə́ n Kərist oy ba tél ndiń kə kumneé ō ní, yā kadə̄ ni i Kɔ́ɔ̄ɓē yā de kə́ koy gə̄ ō, yā ngé kə́ ndin̄ kə kumdə́ ɓáý gə̄ ō.

¹⁰ Ba ḭ̄, yāí ń ā ī-gāngəń sarya dɔ ngōkó̰ó̰í tə́ ní na i rí? Tá ḭ̄, yāí ń ā ídəń taí gír ngōkó̰ó̰í tə́ ní na i rí? Jḭḭ̄ malang, j-a j-awī yā ra no Nə́ɓā tə́, kadə̄ ni a gān̄g sarya dɔjí tə́.

¹¹ Tɔdɔ̄ Nə́ɓā ɔr̄ najə̄ tītə̄ ń toō beé kem makətūbūú na: Kə́ rɔ̄kum tə́, tītə̄ ń m̄-ndi kə kumḿ njóý njóý toō ní, de gə̄ kógə̄ḿ kógə̄ḿ malang a tétēn̄ kejədə́ nang tə́ noḿ tə́ ō, a unən̄ ndūdə́ kə̄ dɔɔ́ yā kədań na mā i Nə́ɓā ō.

¹² Adə̄ jḭḭ̄ kógə̄ḿ kógə̄ḿ malang ní, i gáŕ kadə̄ náā nəkɔ́ ɓáa a ɔjə Nə́ɓā gíŕ yá̰á̰ rāān gə̄ kə́ sɔɔ̄ dɔn.

Ī-lōōī kadə̄ ngákó̰ó̰sí gə̄ tə́sōn̄ sɔɔ̄ń háĺsí gə̄

¹³ Ní, ādī jə-gāngī sarya dɔ naā tə́ to̰ aĺ tā. Ré yá̰á̰ kə́ kadə̄ ī-gāngī najə̄ dɔ tə́ to ɓáa, i nge ń toō: Ī-lōōī rāā yá̰á̰ kógə̄ḿ kə́ kadə̄ rāā ngōkó̰ó̰sí kadə̄ teē əsō, aláa əgan bə̄dē tə́.

¹⁴ m̄-ger̄, a̰á̰ā̰ m̄-ger̄ majə ngá̰ý tɔdɔ̄ m̄-ndigə najə̄ gō Kɔ́ɔ̄ɓē Jeju tə́, kadə̄ yá̰á̰ kə́ i yá̰á̰ kə́ yḛr kə dɔ rɔ̄neé gətóo. Ba ré deē kógə̄ḿ gír̄ kadə̄ yá̰á̰ kógə̄ḿ i yá̰á̰ kə́ yḛr anī, yá̰á̰ ní a téĺ yá̰á̰ kə́ yḛr tām̄ yā deē ní tə́.

¹⁵ Ré yá̰á̰ ń ə́sá ní rāā adə̄ rɔ̄ ngōkó̰ó̰í nelə̄n aĺ anī, yá̰á̰ ń ī-rāā noó i kə tárá to̰ alé. I beé ní, ī-lōō kadə̄ ngōkó̰ó̰í ń Kərist oy tām̄ yān tə́ ní udə kɔ̄ɔ́ najə̄ yá̰a̰ kəsa tə́ ngóy.

¹⁶ Ī-lōōī kadə̄ de gə̄ ədan̄ najə̄ kə́ majaĺ dɔ yá̰á̰ ń sḭḭ̄ á̰a̰ī kadə̄ i kə́ majə tām̄ yāsí tə́ ní.

¹⁷ Tɔdɔ̄ najə̄ Ɓē ko̰o̰ yā Nə́ɓā i najə̄ kə́ dɔ yá̰a̰ kəsa tə́ aĺ ō, yá̰a̰ ka̰ȳ tə́ aĺ ō, ba i najə̄ yá̰á̰ kə́ gōtə́ ō, kem sɔl̄ lɔm ō, rɔ̄nel̄ kə́ Ndíĺ kə́ Táĺ adə̄ ní.

¹⁸ I dan ń deē rāā kəla yā Kərist tītə̄ ń noō ní n a nel̄ Nə́ɓā seneé ō, de gə̄ a ndigiīn̄ ō ní.

¹⁹ Ní, adə̄ jə-sāāī yá̰á̰ kə́ tām̄ yā kem sɔl̄ lɔm tə́ ō, yá̰á̰ kə́ kadə̄ jə-mbūsīiń naā ō.

²⁰ Ī-lōō nujə kəla yā Nə́ɓā najə̄ yá̰a̰ kəsa tə́. I rɔ̄kum kadə̄ deē asə kəsa yá̰á̰ malang ɓá tā, ba ré yá̰a̰ kəsa rāā adə̄ ngōkó̰ó̰í əsō kum yá̰a̰ rāā kə́ gōtə́ aĺ tə́ anī, ḭ̄ ń ə́sá ní ī-rāā i yá̰á̰ kə́ majaĺ.

²¹ Yá̰á̰ kə́ majə ní, i kadə̄ ī-lōō gír kəsa dā̰ tə́ ō, ka̰ȳ kasə nduú tə́ ō, ī-lōō gíŕ yá̰á̰ malang ń a rāā kadə̄ ngōkó̰ó̰í əsō kum majaĺ tə́ ní.

²² Kə́ ɔjəń dɔ najə̄ ń toō ɓáa, ī-ngɔ̄m̄ yá̰á̰ ń ḭ̄ ī-taā kem ní tām̄ yāí īkɔ́ tə́ ta kum Nə́ɓā tə́. Rɔ̄nel̄ i kə deē ń kum mbang rāā yá̰a̰ tə́ anī kemən gān̄g sarya dɔ rɔ̄n tə́ aĺ ní.

²³ Ba deē ń kemən a tɔ́sə̄n dɔ yá̰a̰ kəsa kə́rēý tə́ banī əsa kə̄ non tə́ ní, Nə́ɓā gān̄g sarya dɔn tə́. Tām̄ yá̰á̰ ń deē ní rāā ní i kə gō róbə́ yá̰á̰ ń ni-taā kem ní alé. Ba yá̰a̰ malang kə́ rāā kanjə̄ kadə̄ deē taā kem mámák ní, i yá̰á̰ rāā kə́ majaĺ.