Makətūbə̄ ń Pol ndang adə̄ Rom gə̄ ní 12 - Bibəl ta Sar̄

Ndi kə kumuú kə́ kijə yā ngé gə̄ ń a rāān̄ kəla yā Nə́ɓā ní

¹ Ngákó̰ó̰ḿ gə̄, i tām̄ ko̰o̰ kə́ kum Nə́ɓā o̰o̰n sesí ngá̰ý tə́ n m-ā m̄-dəjeńsí yá̰á̰ ń toō ní: Ī-ndējī Nə́ɓā rɔ̄sí tītə̄ yá̰a̰ tun̄ kə́ kə kumuú, kə́ kɔr̄ kam̄ tām̄ yā Nə́ɓā tə́ ō, kə́ nelə̄n ō. I nge ń noō n i rāā kəla kadə̄ Nə́ɓā kə́ gōtə́ yāsí ní.

² Ī-lōōī ndájə̄ hál de kə́ dɔ nang tə́ gə̄. Banī ādī Nə́ɓā tūr̄ kemsí ō, adə̄sí kur̄ dɔ kə́ kijə ō. Loo ń noō tə́ ā ásiī ka̰a̰ yá̰á̰ ń Nə́ɓā ndigə ní yā ger̄. Adə̄ i yá̰á̰ kə́ majə ō, nel̄ Nə́ɓā ō, kə́ majə ɔtə kə taá ō.

³ Sɔɔ̄ń yá̰á̰ ń Nə́ɓā adə̄m̄ karī kə ta kūl̄ kem majə yānneé ní, m-ə́dásí sḭḭ̄ malang najə̄ ń toō: Ī-lōōī kɔjə rɔ̄sí kadə̄ mān̄ dɔ majən, banī ādī gír̄ yāsí i gír̄ kə́ kə looneé, kadə̄ náā náā nəkɔ́ ɓáa ɔjə rɔ̄n kadə̄ mān̄ dɔ majən alé, ba kadə̄ asə kə gō taā kem ń Nə́ɓā mbɔ̄jə́ adə̄sí ní.

⁴ Tɔdɔ̄ rɔ̄jí i kógə̄ḿ beē, ba ngán rɔ̄jí gə̄ i ngá̰ý. Tá ngán rɔ̄jí kə́ ngá̰ý gə̄ ní kəla yādə́ to noó kógə̄ḿ kógə̄ḿ kə dɔdə́ gēé ɓáý to̰.

⁵ Jḭḭ̄ ń i ngá̰ý ní, jə-toī i tītə̄ ń noō kə Kərist. Jḭḭ̄ i rɔ̄ kə́ kógə̄ḿ beē, ba jḭḭ̄ kógə̄ḿ kógə̄ḿ malang ní, jḭḭ̄ i ngán rɔ̄ de kə́ kógə̄ḿ beē.

⁶ Ba Nə́ɓā rajəjí, adə̄jí kadə̄ karī kə́ tayā tayā gə̄ sɔɔ̄ dɔjí kógə̄ḿ kógə̄ḿ malang. Ré i kadə̄ karī rāā kəla yā nge koō ta yā Nə́ɓā a, ādə̄ deē ń ənge ní rāań kəla, ba kadə̄ i kə gō róbə taā kem yānneé.

⁷ Ré i kadə̄ karī yā rāā kəla kadə̄ deē anī, ādə̄ deē ń ənge ní rāań kəla adə̄ deē. Ré i kadə̄ karī yā ndóō de gə̄ yá̰a̰ anī, ādə̄ deē ń ənge ní ndóōń de gə̄ yá̰a̰.

⁸ Deē ń ni i nge kadə̄ karī yā kadə̄ madə̄n gə̄ tɔ́gə anī, majə kadə̄ ni-adə̄ńdə́ tɔ́gə. Deē ń ni i nge kadə̄ karī yā kadə̄ deē yá̰á̰ ní, ādə̄ kɔ́ɔ̄ adə̄ kə kem ndaá. Deē ń ni i nge kadə̄ karī yā kɔr madə̄n gə̄ ta róbə́ ní, ādə̄ o̰o̰n tɔdɔ̄ kəla yān ní. Deē ń ni i nge kadə̄ karī yā rāā kə ngé ndoō gēé ní, ādə̄ ni-rāā sedə́ kə rɔ̄nelēé.

⁹ Kadə̄ tár naā yāsí i kə gól̄ looó alé. Ā̰yī yá̰á̰ kə́ majaĺ kɔ̄ɔ́ kə nja ngárāá, ba ī-ɓooī naā kə yá̰á̰ kə́ majaá.

¹⁰ Kadə̄ tár naā yāsí i tītə̄ tár naā yā ngákó̰o̰ naā gə̄ beé. Ādə̄ deē kógə̄ḿ kógə̄ḿ ɔsə gɔn madə̄n gə̄ ō, rāādə́ i de kə́ bo tɔȳn gə̄ tə́ ō.

¹¹ Ɔ́liī loo rāā kəla yā Kɔ́ɔ̄ɓē tə́, ī-yayiī ta tə́ alé, ādī kemsí təngāsí tām̄ kəla yān tə́.

¹² Ādī rɔ̄sí nel̄sí tām̄ kəndā ń ə̄ndāī kemsí dɔ Nə́ɓā tə́ ní. Ī-tə́gāī tasí dan wur kɔl tə́. Ī-ngatə́rāī loo ndɔ̄ȳ tə́.

¹³ Ādī de gə̄ yā Nə́ɓā yá̰á̰ ń ndoōn rāādə́ ní. Ī-lōōī gír kəhɔ mbā gə̄ kə̄ rɔ̄sí tə́ alé.

¹⁴ Ī-dəjeī Nə́ɓā kadə̄ rāā majə kə ngé gə̄ ń rāān̄sí ndoō tə́ ní. Ī-tɔ́rī tasí dɔdə́ tə́ ba ī-lōōī ndɔ̄ĺdə́.

¹⁵ Ī-rāāī rɔ̄nel̄ kə ngé gə̄ ń rɔ̄də́ nel̄də́ ní ō, ī-nōōī kə ngé gə̄ ń a nōōn̄ ní ō.

¹⁶ Ādī kemsí i kógə̄ḿ kə naá. Ī-lōōī ka̰a̰ rɔ̄sí yá̰á̰ kə́ ngá̰ý tə́ ba rāā madə̄sí gə̄ yá̰a̰ aĺ tə́. Banī ī-rāāī kəla kə́ to kɔjə rɔ̄ aĺ gə̄. Ī-lōōī ka̰a̰ rɔ̄sí ngé kum kedə̄ gə̄ tə́.

¹⁷ Ī-téliī kə majaĺ kum gotə majaĺ alé. Ādī o̰o̰sí ta rāā yá̰á̰ kə́ majə ta kum de gə̄ tə́ malang.

¹⁸ Ré asiī anī, ī-rāāī yá̰a̰ malang ń ngəran i gír jīsí tə́ ní kadə̄ ī-ndiīń kə kem sɔl̄ lɔm kə de gə̄ malang.

¹⁹ Kó tár yāḿ gə̄, ī-lōōī dal ba̰ā̰. Əya̰ī ba̰ā̰ ādī Nə́ɓā, tɔdɔ̄ Kɔ́ɔ̄ɓē əda tītə̄ ń toō beé kem makətūbūú na: Ī mə̄kɔ́ ń m-ā m̄-dal ba̰ā̰, i mə̄kɔ́ n m-ā m-ə̄ndā nja deē kógə̄ḿ kógə̄ḿ malang kə gō kəla rāādə́ gēé ní.

²⁰ Ní, ré ɓō rāā madə̄ ba̰ā̰í anī, ādə̄n yá̰a̰ ādə̄ əsa. Ré kəndā rāān anī, ādə̄n man̄ ādə̄ a̰ȳ, tɔdɔ̄ dan ń ī-rāā tītə̄ ń noō ní, to tītə̄ kə́ ī-kán̄ i yā̰l̄ hor kə́ ajə ying kə̄ dɔn tə́ beē.

²¹ Ī-lōō kadə̄ yá̰á̰ kə́ majaĺ tetiī rɔ̄ɔ̄, ba ī-rāā yá̰á̰ kə́ majə ī-tetənəń rɔ̄ɔ̄.