Makətūbə̄ ń Pol ndang adə̄ Rom gə̄ ní 11 - Bibəl ta Sar̄

Nə́ɓā əya̰ ngán Israel gə̄ kɔ̄ɔ́ alé

¹ Ādī m̄-dəjesí m-ōō: Adə̄ ń noō ní Nə́ɓā əya̰ i ngán Israel gə̄ kɔ̄ɔ́ tā ḿ? Sḛ́ý yḛtə aĺ bátə́. Tɔdɔ̄ mə̄kɔ́ ń toō, mā i ngōn̄ Israel ō, mā i de kə́ gír kaa yā Abəraham tə́ ō, de kə́ gír ɓē yā Benjamḛ tə́ ō.

² Nə́ɓā əya̰ gír deē yān gə̄ ń nəkɔ́ gə̄rādə́ kété ní kɔ̄ɔ́ alé. Nōō ń Eli nōō rɔ̄n rɔ̄ Nə́ɓā tə́ á makətūbə̄ əda ní, sḭḭ̄ ōōī aĺ a? Eli nōō rɔ̄n əda na:

³ Kɔ́ɔ̄ɓē, á̰a̰ā̰ tɔ̄lə̄n̄ ngé koō ta yāí gə̄ kɔ̄ɔ́ ō, tɔ̄ɔ̄n̄ loo tun̄ yá̰a̰ yāí gə̄ kɔ̄ɔ́ ō. I mā kógə̄ḿ beē ngóy n m̄-na̰y ní, ba a sāān̄ i tɔ̄lə̄m̄ kɔ̄ɔ́ ɓáý to̰!

⁴ Ba najə̄ ń Nə́ɓā tél ədan ní ōōī a? Nə́ɓā ədan na: M-ɔ̄r̄ de gə̄ dūbú sīrí m-ə̄ndādə́ dɔ jīḿ. I ngé gə̄ ń tetən̄ kejədə́ nang tə́ no ɓesə̄ Baal tə́ aĺ ní.

⁵ Ngɔlaā nəkɔ́ ń jə-ndiī toó gá̰a̰ de gə̄ kə́ Nə́ɓā nəkɔ́ gə̄rā əya̰ ɔjəń rajə yān ndin̄ noó ō.

⁶ Ba ré ɔjəń i dɔ rajə anī, i tām̄ yā kəla rāādə́ gə̄ tə́ to̰ alé. Tɔdɔ̄ ré i tām̄ yā kəla rāādə́ gə̄ tə́ anī, rajə ní i rajə to̰ alé.

⁷ Kə j-ədaī na i rí? Yá̰á̰ ń ngán Israel gə̄ a sāān̄ ní əngen̄ alé, ba ngé gə̄ ń gə̄rān̄də́ ní əngen̄. Gotə gə̄ rāān̄də́ kadə̄ kemdə́ ngan̄g ngóróró,

⁸ tītə̄ ń makətūbə̄ yā Nə́ɓā ədań ní. Ndangən̄ na: Nə́ɓā rāā adə̄ ndíĺdə́ a ɓīī i mbée ō, kumdə́ a̰a̰ loo aĺ ō, mbīdə́ oō loo aĺ ō, bátə́ ɓōólaā.

⁹ Dabid əda yān ō na: Kadə̄ yá̰a̰ kəsa yādə́ tél i gūmbə̄ kə́ kadə̄ əhɔdə́ ō, réng ō, mbḛ̄ kə́ kadə̄ tə́sōn̄ kemeé ō, yá̰á̰ kə́ tōr̄ kə́ kadə̄ rāādə́ ō.

¹⁰ Kadə̄ kumdə́ risə til nding ō, kadə̄ kumdə́ a̰ā̰ loo aĺ ō. Ī-rāā ādə̄ nōrə̄n̄ ngung ngándáńg ō.

¹¹ m̄-dəjesí ɓáý to̰: Kəsō ń ngán Israel gə̄ əsōn̄ ní, i kə́ njɔ́ḿ gə̄ tə́ a? Sḛ́ý aĺ bátə́! Banī i kə ta kūl̄ kəsō ń əsōn̄ ní n, de gə̄ ń i Jipə aĺ gə̄ ní əngenə̄ń kajə, yā kadə̄ Jipə gə̄ tél əndānńdə́ nii dɔ tə́ ní.

¹² Ba ré kəsō ń əsōn̄ ní teē kə nápar de kə́ rang gə̄ dɔɔ́ anī, tél reēdə́ gogə́ tū kajə tə́ ní a rāā yá̰á̰ kə́ bo tɔȳ nge ń noō aĺ a?

Nə́ɓā ajə ngé gə̄ ń i Jipə gə̄ aĺ ní

¹³ Ngɔlaā m-ā m-ɔ̄r̄ najə̄ sesí, sḭḭ̄ ń i nápar de kə́ rang gə̄ ní. Mā i ngōmbang kəla kə́ əlamə̄n̄ tām̄ yā nápar de kə́ rang gə̄ tə́. m̄-sāā kadə̄ rī kəla yāḿ ɓār̄.

¹⁴ Kadə̄ ngé gə̄ ń nin̄ i mósə́ḿ gə̄ ní əndāmə̄n̄ nii dɔ tə́, anī m-ájəń ngé kə́rēý gə̄.

¹⁵ Tɔdɔ̄ ré kɔr̄ ń ɔr̄ əndān̄də́ gidə tə́ ndágá ní rāā tá kadə̄ de kə́ dɔ nang tə́ gə̄ əsōn̄ naā tə́ kə Nə́ɓā anī, i rí n a rāā yá̰a̰ ndɔ̄ ń tél a reēn̄ sedə́ gogə́ rɔ̄ Nə́ɓā tə́ ní? Ndɔ̄ ń noō tə́ ní, de kə́ koy gə̄ a teēn̄ ɓádá yā ndi kə kumdə́.

¹⁶ Ba á̰a̰ī, dan ń dɔ mur̄ kə́ kugə i kə́ táĺ anī, gá̰a̰ mur̄ ń na̰y ní i kə́ táĺ ō aĺ a? Ré ngəra kāgə̄ i kə́ táĺ anī, ta jīn gə̄ i kə́ táĺ ō aĺ a?

¹⁷ Ngán Israel gə̄ rāān̄ rɔ̄də́ i kāgə̄ olibə kə́ ɓēé kə́ tə́gān̄ ta jīn kə́rēý gə̄ kɔ̄ɔ́ tə́. Ḭ̄ ń i Jipə aĺ ní, ī-rāā rɔ̄í i kāgə̄ olibə kə́ bembeé, kə́ əhɔīn̄ gotədə́ tə́, adə̄ ī-ndi kə ta kūl̄ bəto ń ngəra kāgə̄ olibə kə́ ɓēé a adī ní.

¹⁸ Loo ń noō tə́ ní, ḭ̄ i de kə́ kadə̄ ɔ́jə rɔ̄í dɔ ta jī kāgə̄ olibə gə̄ ń tə́gān̄də́ kɔ̄ɔ́ tə́ ní alé. Ā ɔ́jə rɔ̄í i ba̰ý? I ḭ̄ n i nge kətō ngə̄rā kāgə̄ olibə kə́ ɓēé ní alé, banī i ni n i nge kətōī ní.

¹⁹ Majanī ā ə́da na: Jéngə̄n̄ ta jī kāgə̄ gə̄ ní yā kadə̄ əɓań ta gūrūn tə́.

²⁰ I gō tə́, ɓá tā ba jéngə̄n̄də́ i najə̄ yā taā kem aĺ yādə́ tə́, ba ḭ̄, yá̰á̰ ń ra seí loo ń noō tə́ ní i taā kem yāí. Ní ɔ́jə rɔ̄í alé, ba ngá̰ý a ī-ɓōĺ i mbéé tá.

²¹ Tɔdɔ̄ ré Jipə gə̄ ń i ta jī kāgə̄ olibə kə́ ɓēé gə̄ ní, Nə́ɓā tə́gādə́ kɔ̄ɔ́ anī, ḭ̄ ń i kə́ ndə̄mā dɔɔ́ ní tá a əya̰ī a?

²² Majə kadə̄ ə̄ndā kumií á̰a̰ń rāā ń Nə́ɓā rāā kem majə kə de gēé ní ō, kəndā ń a əndā katə̄n dɔdə́ tə́ ní ō. Ni-əndā katə̄n i dɔ ngé gə̄ ń əsōn̄ tə́ ní, ɔjə kem majə yān i seí ḭ̄ḭ́ ō dan ń ə̄ndā kemií dɔ kem majə yān ń toō tə́ ní. Ré i beé aĺ anī, a tə́gāī kɔ̄ɔ́ tītə̄ yādə́ ō.

²³ Ba nin̄ Jipə gə̄, ré əya̰n̄ gír taā kem aĺ yādə́ kɔ̄ɔ́ anī, a télən̄ yā sitə gogə́ ta gūrūdə́ tə́. Tɔdɔ̄ Nə́ɓā i kə tɔ́gə yā rāāńdə́ kadə̄ sitən̄ gogə́ karī.

²⁴ Ḭ̄ ń i Jipə aĺ ní, ī-rāā rɔ̄í i ta jī kāgə̄ olibə kə́ bembeé tə́. Gāngə̄n̄ ta jī kāgə̄ olibə kə́ bembeé ní, ba do̰ō̰n̄ tū gír gisə kāgə̄ olibə kə́ ɓēé tə́, adə̄ i kə gō jī loo rāā ń a rāān̄nəń kété gə̄ ní alé. Ba Jipə gə̄ nin̄ i ta jī kāgə̄ olibə kə́ kəhɔ ɓēé, adə̄ tél kəhɔdə́ gogə́ ta gūrūdə́ tə́ i yá̰á̰ kə́ tōr̄ alé.

Nə́ɓā a tél yā kajə ngán Israel gə̄

²⁵ Ngákó̰ó̰ḿ gə̄, m̄-gḛy kadə̄ ī-gerī yá̰á̰ kə́ to loo mundə̄ tə́ kem Nə́ɓā tə́ ɓáý ń toō, na sōgə́ ī-gírī kemsí tə́ na sḭḭ̄ i ngé kum kedə̄ ngá̰ý gə̄. Yá̰á̰ ní n toó: Kem ngan̄g ń Nə́ɓā adə̄ kem ngán Israel kə́rēý gə̄ ngan̄g ngóróró ní, a to bátə́ kadə̄ ré de gə̄ malang ń i Jipə aĺ gə̄ ní ajən̄ pá tá.

²⁶ Loo ń noō tə́ ngán Israel gə̄ malang a ajən̄. Tītə̄ ń makətūbə̄ yā Nə́ɓā ədań ní, ndangən̄ na: Nge gān̄g dɔ de gə̄ a teē i kem ɓē kə́ Siyo̰ tə́. Ni a ɔr̄ háĺ ngán Jakob gə̄ ń i hál rāā yá̰a̰ kə gō ń Nə́ɓā ndigə alé ní kɔ̄ɔ́.

²⁷ I nge ń noō n i madə̄ naā yāḿ kə́ sedə́ dan ń m-ā m-ɔ̄r̄ yá̰á̰ kə́ majaĺ yādə́ gə̄ kɔ̄ɔ́ ní.

²⁸ Tām̄ Najə̄ kə́ Majə yā Nə́ɓā ń Jipə gə̄ mbātə́n̄ ní, nin̄ i madə̄ ba̰ā̰ Nə́ɓā gə̄. I nge ń noō n majə sesí ní. Ba tām̄ gə̄rā ń Nə́ɓā gə̄rādə́ tə́ ní, nin̄ i kó tár yān gə̄. Ba nge ń noō sɔɔ̄ń i kaasí gə̄.

²⁹ Tɔdɔ̄ yá̰á̰ ń Nə́ɓā adə̄ de gə̄ ní a tél yā taā gogə́ aĺ ō, ɓāŕ ń ni-ɓāŕdə́ ní, a ndə̄ngā rɔ̄n tāmə̄n̄ tə́ aĺ ō.

³⁰ Kété ní sḭḭ̄ ī-mbātíī koō najə̄ yā Nə́ɓā, ba ngɔlaā i mbātə́ ń nin̄-mbātə́n̄ koō ta Nə́ɓā ní n rāā adə̄ kum Nə́ɓā o̰o̰nneé sesí sḭḭ̄ ní.

³¹ Nin̄-rāān̄ i tītə̄ yāsí ō: Mbātə́n̄ koō ta Nə́ɓā ngɔlaā, i kadə̄ kum Nə́ɓā o̰o̰nəń sesí sḭḭ̄. Ba tītə̄ ń kum Nə́ɓā o̰o̰n sesí sḭḭ̄ ní, kumən a o̰o̰n tām̄ yādə́ nin̄ tə́ ō.

³² Tɔdɔ̄ Nə́ɓā utə̄ de gə̄ malang i kem mbātə́ koō tan tə́ tə́, yā kadə̄ kumən o̰o̰nəń sedə́ malang.

Nə́ɓā bo to ɓōĺ ngá̰ý

³³ Yá̰a̰ kənge yā Nə́ɓā ō, kum kedə̄ yān ō, yá̰a̰ ger̄ yān ō, i yá̰á̰ kə́ to ɓōĺ ngá̰ý, adə̄ deē a asə ka̰a̰ ta tɔ̄l̄ tan alé. De kə́ asə ndō̰ gíŕ yá̰a̰ rāān ní gətóo. De kə́ asə ger̄ gō róbə yān gə̄ gətóo ō.

³⁴ Tītə̄ ń makətūbə̄ yān ədań ní, ndangən̄ na: I náā n ger̄ gír̄ yā Kɔ́ɔ̄ɓē ní? I náā n a adə̄n kɔjə̄ dɔ yá̰á̰ ń a rāā tə́ ní.

³⁵ I náā n adə̄ Nə́ɓā yá̰á̰ kété yā kadə̄ Nə́ɓā tél adə̄n kum gotə ní?

³⁶ Tɔdɔ̄ yá̰a̰ malang teē i rɔ̄n tə́ ō, ndin̄ i kə kūl̄neé ō, i tām̄ yān tə́ ō. Ādə̄ de gə̄ malang ɔsən̄ gɔnən ngándáńg! Adə̄ i tītə̄ ń noō.