Makətūbə̄ ń Pol ndang adə̄ Rom gə̄ ní 10 - Bibəl ta Sar̄

¹ Ngákó̰ó̰ḿ gə̄, yá̰á̰ ń m̄-ndə̄ngā kemḿ tə́ tām̄ yā Jipə gə̄ tə́ ō, yá̰á̰ ń m-ā m̄-ndɔ̄ȳ Nə́ɓā tām̄ yādə́ tə́ najə̄n tə́ ō ní i kadə̄ ajən̄.

² O̰o̰də́ tɔdɔ̄ Nə́ɓā ngá̰ý adə̄ mā i de kə́ kum tə́ yādə́ najə̄n tə́. Banī ko̰o̰ ń o̰o̰də́ tɔdɔ̄ Nə́ɓā ní i kanjə̄ ger̄ yá̰a̰.

³ Tɔdɔ̄ nin̄-gerə̄n̄ loo rāā ń Nə́ɓā rāań de gə̄ kadə̄ télən̄ de kə́ gōtə́ gə̄ ta kumən tə́ ní alé, adə̄ ḭḭ sāān̄ i loon yādə́ nin̄ kɔ́ gə̄ kə́ sɔɔ̄ dɔdə́. A loo ń noō tə́ ní nin̄-aw̄n̄ gír loo rāā ń Nə́ɓā rāań de gə̄ kadə̄ télən̄ de kə́ gōtə́ gə̄ ta kumən tə́ ní alé.

⁴ Tɔdɔ̄ loo ń ndū najə̄ a aw̄ kə de gēé kə̄ tū tə́ ní i Kərist, yā kadə̄ deē malang ń taā kemən ní, kɔ́ɔ̄ téləń de kə́ gōtə́ ta kum Nə́ɓā tə́.

Deē malang ń taā kem Kɔ́ɔ̄ɓē ní a ajə

⁵ Moijə nəkɔ́ ɔr̄ najə̄ kə́ sɔɔ̄ dɔ loo rāā ń ndū najə̄ a rāā de gə̄ kadə̄ télən̄ de kə́ gōtə́ gə̄ ta kum Nə́ɓā tə́ ní. Moijə ndang na deē ń rāā yá̰a̰ gə̄ ń ndū najə̄ ɔjə ní a ndi kə kumneé kə ta kūl̄ ndū najá.

⁶ Ba á̰a̰ī najə̄ ń ədan̄ dɔ loo téĺ ń de gə̄ a télən̄ de kə́ gōtə́ gə̄ ta kum Nə́ɓā tə́ tām̄ taā kem yādə́ tə́ ní. Ədan̄ na kə ī-lōō gír̄ kəda kemií tə́ na ké i náā n a aw̄ dɔ rā̰ tə́ yā reē kə Kərist ní wa,

⁷ aláa ké i náā n a aw̄ ɓádá yā teē kə Kərist dan de kə́ koy gə̄ tə́ ní wa.

⁸ Ədan̄ na i rí n noó? Yá̰á̰ ń ədan̄ ní n toó: Najə̄ i rɔ̄í tə́ laā ngɔr, i taí tə́ ō, i kemií tə́ ō. Najə̄ ní i najə̄ taā kem ń j-ə̄nā mbērən ní.

⁹ Ré ə́da taí tə́ na Jeju i Kɔ́ɔ̄ɓē ō, ré ī-taā kem mámák kadə̄ Nə́ɓā ndólə̄n̄ dan de kə́ koy gə̄ tə́ ō anī, ā ájə.

¹⁰ Tɔdɔ̄ i taā kem kə́ mámák n a rāāī kadə̄ ī-tél de kə́ gōtə́ ní ō, i kəda kə́ əda taí tə́ na Jeju i Kɔ́ɔ̄ɓē ní n a ajiī ní ō.

¹¹ Tɔdɔ̄ makətūbə̄ əda na: Deē malang ń a taā kem Jeju ní rɔ̄n a sɔlə̄n alé.

¹² Adə̄ yá̰á̰ kə́ ɔr̄ kam̄ de gə̄ kadə̄ i Jipə gə̄ ń toó aláa Gərek gə̄ n toó ní gətóo. Nin̄ malang ní Kɔ́ɔ̄ɓē yādə́ i kógə̄ḿ beē. De gə̄ malang ń a ɓāŕnən̄ ní ni a rāā majə sedə́ ngá̰ý.

¹³ Tɔdɔ̄ deē malang ń a ənī kemən ɓārəń Kɔ́ɔ̄ɓē ní, Kɔ́ɔ̄ɓē a ajən.

¹⁴ Banī ré taān̄ kemən aĺ anī, a ɓár̄nən̄ i ba̰ý? Ré oōn̄ najə̄ yā Kɔ́ɔ̄ɓē aĺ anī, a taān̄ kemən i ba̰ý? Ré deē kógə̄ḿ ɔjədə́ najə̄ yā Kɔ́ɔ̄ɓē aĺ anī, a oōn̄ najə̄ ní i ba̰ý?

¹⁵ Ré Nə́ɓā əla deē aĺ anī, loo kadə̄ deē a ɔjədə́ najə̄ yā Kɔ́ɔ̄ɓē i ba̰ý? Tɔdɔ̄ makətūbə̄ əda na: Ka̰a̰ ngé kəda najə̄ kə́ majə loo reē tə́ i yá̰á̰ kə́ majə ngá̰ý!

¹⁶ Ba ngé gə̄ ń ndigən̄ Najə̄ kə́ Majə ní i de gə̄ malang alé, tɔdɔ̄ Ijai əda na: Kɔ́ɔ̄ɓē i náā n taā kem najə̄ ń j-ɔjə ní?

¹⁷ Adə̄ yá̰á̰ ń a reē kə taā kemeé ní i najə̄ kə́ kɔjə, ba najə̄ ń ɔjən̄ ní i najə̄ yā Kərist.

¹⁸ Ba mā m̄-sāā dəje na: Ké nin̄-oōn̄ najə̄ ní aĺ wa? Oōn̄ majə, tɔdɔ̄ makətūbə̄ əda na: Ndūdə́ na ɓār̄ taā gō dɔ nang malang ō, deē ra i ta ngóy dɔ nang tə́ gə̄gē anī a oō najə̄ kɔrdə́ gə̄ ō.

¹⁹ Ba m-ā m̄-dəje ɓáý na: Ní ngán Israel gə̄ gerə̄n̄ kum aĺ i mbée a? Ōōī najə̄ ń Moijə əda dɔ tə́ ní: M-ā m̄-rāā kadə̄ i gír de kə́ rɔ̄kum aĺ gə̄ n ā ə̄ndāīdə́ nii ní ō, kadə̄ ī-rāāī wōn̄g kə nápar de kə́ ger̄ najə̄ aĺ gə̄ ō.

²⁰ Ijai aw̄ bátə́ əda ɓáý to̰ na: De gə̄ ń əngemə̄n̄ ní i ngé sāāḿ gə̄ alé. De gə̄ ń m-ɔ́jə rɔ̄ḿ ta kumdə́ tə́ ní, i ngé gə̄ ń dəjemə̄n̄ yá̰á̰ sḛ́ý aĺ bátə́ ní.

²¹ Ba ngán Israel gə̄ ɓá anī Nə́ɓā əda tītə̄ ń toō dɔdə́ tə́ na: Kə dɔ ndɔ̄ gə̄ mā m̄-sə́ra jīḿ kə̄ rɔ̄ ngáń kə́ dum̄ naā gə̄ tə́ ō, kə́ mbātə́ najə̄ gə̄ tə́ ō.