PILIPƏ 1 - Bibəl ta Sar̄

Pol nin̄ kə Timote rāān̄ ngé kán̄ naā kə́ Pilipə tə́ gə̄ lápə́ya

¹ Pol nin̄ kə Timote ń i ngé rāā kəla gə̄ yā Jeju Kərist ní, i nin̄ n ndangən̄ makətūbə̄ ń toō əlan̄neé adə̄n̄ de kə́ Pilipə tə́ gə̄ malang ń télən̄ de gə̄ yā Nə́ɓā kə ta kūl̄ taā kem Jeju Kərist ō, ngé kɔr nodə́ gə̄ ō, ngé rāā kəla nə̄ɓō yá̰a̰ yādə́ gə̄ ō ní.

² Ādə̄ bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.

Pol ndɔ̄ȳ Nə́ɓā tām̄ yā ngé taā kem kə́ Pilipə tə́ gə̄

³ Kə dɔ ndɔ̄ gə̄ ń m-ā m̄-gírəń dɔsí tə́ noō, m̄-ndadə̄ m-ādə̄ Nə́ɓā yāḿ tām̄ yāsí tə́ malang.

⁴ Kə dɔ ndɔ̄ȳ gə̄ malang ń m-ā m̄-ndɔ̄yń tām̄ yāsí tə́ noō, m-ā m̄-ndɔ̄ȳ i kə rɔ̄nelēé.

⁵ Tɔdɔ̄ sḭḭ̄ ī-ɓooī naā sejí dɔ kəla kɔjə Najə̄ kə́ Majə tə́. Ə́laī gír i ndɔ̄ kə́ ta kəga dɔ tə́ bátə́ ɓōólaā.

⁶ Yá̰á̰ ń m̄-ger̄ majə ní n toó: Nə́ɓā ń əla gír rāā kəla kə́ majə ń toō kemsí tə́ ní, a rāā kə̄ non tə́ bátə́ yā tɔ̄l̄ ta ndɔ̄ yā Jeju Kərist tə́.

⁷ I gō tə́ kadə̄ gír̄ kə́ kemḿ tə́ i tītə̄ ń noō tām̄ yāsí tə́ malang. Tām̄ sḭḭ̄ i kemḿ tə́, tɔdɔ̄ kem majə ń Nə́ɓā rāā seḿ ní, sḭḭ̄ malang ə́gaī naā dɔ tə́ seḿ, ká i dan ń mā i dəngáyá tə́ toō, aké i dan ń mā i kɔ́ɔ̄ rɔ̄ḿ á m-ā m̄-rɔ̄ɔń dɔ Najə̄ kə́ Majə tə́ ō, m-ā m̄-rāań kadə̄ Najə̄ kə́ Majə əlań ngəran ngan̄g ō ní.

⁸ m̄-táŕsí malang kə ta kūl̄ tár yā Jeju Kərist. Nge ń noō ní Nə́ɓā i de kə́ kum tə́ yāḿ loon tə́.

⁹ Ba yá̰á̰ ń m̄-gəde Nə́ɓā kem ndɔ̄ȳ yāḿ tə́ tām̄ yāsí tə́ ní, i kadə̄ tár yāsí i ngá̰ý kum kə̄ kété kété ō, kadə̄ yá̰a̰ ger̄ kə́ rɔ̄kum ō, ger̄ najə̄ ngá̰ý ō, i tū tár yāsí ní tə́,

¹⁰ kadə̄ ásiīneé gə̄rā yá̰á̰ kə́ majə. Loo ń noō tə́ ndɔ̄ yā Kərist tə́ anī ā ūnjī njáý njáý ō, sḭḭ̄ i de kə́ kanjə̄ najə̄ dɔsí tə́ gə̄ ō.

¹¹ Sḭḭ̄ ā ī-rāāī yá̰á̰ kə́ gō tə́ gə̄ ngá̰ý kə ta kūl̄ Jeju Kərist yā kɔsəń gɔn Nə́ɓā ō, yā ɓōkə́nəń tɔ̄ȳ ō.

Kərist i ndi kə kumuú

¹² Ngákó̰ó̰ḿ gə̄, m̄-gḛy kadə̄ ī-gerī na yá̰á̰ ń teē dɔḿ tə́ ní, rāā adə̄ Najə̄ kə́ Majə aw̄ kum kə̄ kété ɓáý.

¹³ I beé n áskar gə̄ malang kə́ kem ndogə̄ yā nge ko̰o̰ ɓē tə́ ō, gotə de kə́ rang gə̄ malang ō, gerə̄n̄neé kadə̄ mā i dəngáyá i najə̄ yā Kərist tə́ ní.

¹⁴ Ngákó̰ó̰jí gə̄ ń nin̄ i de gə̄ yā Kɔ́ɔ̄ɓē ní, dan ń a̰a̰n̄ kadə̄ mā i dəngáyá ní, ngá̰ý gə̄ dandə́ tə́ ənīn̄ kemdə́ mámák ɔjən̄neé najə̄ kanjə̄ ɓōĺ.

¹⁵ Kə́ rɔ̄kum tə́ tā anī ngé kə́rēý gə̄ dandə́ tə́ ní, i ngur kɔjə najə̄ ō, i nii kə́ kemdə́ tə́ ō n ɔsə sedə́ ta kɔjə najə̄ ní. Banī kə́ madə̄ gə̄ ɔjən̄ najə̄ yā Kərist i kə gír̄ kə́ majaá kemdə́ tə́.

¹⁶ Ngé gə̄ ń toō rāān̄ yá̰a̰ i kə tárá, tɔdɔ̄ nin̄-gerə̄n̄ kadə̄ Nə́ɓā əla kəla rɔ̄ɔ̄ dɔ Najə̄ kə́ Majə tə́ i gír̄ jīḿ mā tə́.

¹⁷ Ngé gə̄ ń noō nin̄-ɔjən̄ najə̄ yā Kərist i kə nií kemdə́ tə́. Gír̄ kə́ kemdə́ tə́ ń ɔjən̄neé najə̄ ní, i gír̄ kə́ unjə̄ njáý njáý alé. Nin̄-gírə̄n̄ rāā kadə̄ kə dəngáy yāḿ kə tōr̄ rɔ̄ḿ tɔȳ kə́ kété ɓáý.

¹⁸ Ba nge ń noō usəm̄ alé! Ká gír̄ yādə́ i gír̄ kə́ majaĺ, aké i gír̄ kə́ rɔ̄kum gə̄gē anī, najə̄ yā Kərist i kə́ kɔjə adə̄ m̄-rāā rɔ̄nel̄ tāmən tə́ ō, m-ā m̄-na̰y kə̄ loo rāā rɔ̄nel̄ tə́ tāmən tə́ ɓáý ō.

¹⁹ Tɔdɔ̄ m̄-ger̄ kadə̄ yá̰á̰ ń noō a teē i kajə tām̄ yāḿ tə́ kə ta kūl̄ ndɔ̄ȳ yāsí ō, kə ta kūl̄ rāā ń Ndíĺ Jeju Kərist a rāā kə deē ní ō.

²⁰ Tɔdɔ̄ yá̰á̰ ń m̄-ngóō ō, m-ə̄ndā kemḿ dɔ tə́ kə ngangāá ngá̰ý ō ní, i kadə̄ ndɔ̄ń tə́ anī yá̰á̰ kógə̄ḿ adə̄m̄ rɔ̄sɔl̄ alé. Ba nəkɔ́ ń jóó bátə́ ngɔlaā toó ní, m̄-sōl̄ yá̰á̰ kógə̄ḿ alé. I tītə̄ ń noō n kə ta kūl̄ ndiḿ kə kumḿ, aláa kə ta kūl̄ koyḿ, m-ā m-ɔ́jəń kə̄ ndágá kadə̄ Kərist i de kə́ bo ní.

²¹ Tɔdɔ̄ tām̄ yāḿ mā tə́ ɓáa ndiḿ kə kumḿ i ndi naā tə́ kə Kərist ō, koyḿ i yá̰a̰ kəndā nja yāḿ ō.

²² Ba ré ndiḿ kə kumḿ dɔ nang tə́ laā i kadə̄ m-ə́ngeń ta róbə rāā yá̰á̰ kə́ majanī, yá̰á̰ ń kadə̄ m̄-gə̄rā mandang ní m̄-ger̄ alé.

²³ Dɔḿ tɔ̄ɔ̄ jōó: Ngur kadə̄ m-óy m-āw̄ m̄-ndi kə Kərist rāām̄, i nge ń noō n m̄-gḛy ngá̰ý ní.

²⁴ Banī kə́ majə ngá̰ý tɔȳ i kadə̄ m̄-ndi kə kumḿ tām̄ yāsí tə́.

²⁵ Adə̄ m̄-ger̄ kemḿ tə́ majə kadə̄ m-ā m̄-ndi kə kumḿ. M-ā m̄-ndi sesí sḭḭ̄ malang yā rāań sesí kadə̄ āwī kum kə̄ kété kété ō, kadə̄ rɔ̄sí nelə̄ńsí loo taā kem tə́ ō.

²⁶ Loo ń ré m-ā m̄-tél yā kaw̄ gogə́ rɔ̄sí tə́ anī, kɔsə gɔn ń ā ə́ngeī loo de gə̄ yā Jeju Kərist tə́ ní, a tɔȳ kə́ kété ɓáý kə ta kūlə̄ḿ.

²⁷ Banī ādī háĺsí ń ī-ndiīneé ní, əhɔ naā kə Najə̄ kə́ Majə yā Kərist, yā kadə̄ ká ré m-āw̄ go̰ō̰sí tə́, aláa m̄-gətóo rɔ̄sí tə́ gə̄gē anī, m-ōō kadə̄ ī-raī ngan̄g ō, gír̄ yāsí i kógə̄ḿ ō, sḭḭ̄ malang ī-rɔ̄ɔ̄ī dɔ taā kem Najə̄ kə́ Majə tə́ kə kem kə́ kógə̄ḿ ō.

²⁸ Ngé rɔ̄ɔ̄ sesí gə̄ ní ī-ɓōlíīdə́ tū yá̰á̰ kógə̄ḿ tə́ alé: I nge ń noō n a ɔjədə́ kadə̄ nin̄ a aw̄n̄ i kə̄ kuduú kɔ̄ɔ́ tə́, ba sḭḭ̄ i dɔ róbə kajə tə́ ní. Ba yá̰á̰ ń noō ḭḭ i rɔ̄ Nə́ɓā tə́.

²⁹ Tɔdɔ̄ kə́ ɔjə dɔ najə̄ yā Kərist ní, Nə́ɓā rāā kem majə sesí adə̄ ī-taāī i kem Kərist ngóy alé, banī á̰a̰ī tápə̄ najə̄ yān tə́ ō.

³⁰ Ngɔlaā ní sḭḭ̄ údiī dan rɔ̄ɔ̄ ń m̄-rɔ̄ɔ̄ kété á á̰a̰mī loon tə́ ní ō, sḭḭ̄ ī-gerī kadə̄ m-ā m̄-rɔ̄ɔ̄ rɔ̄ɔ̄ ní jīḿ tə́ laā ɓáý ō.