PĀ KƏ́ MAJƏ 3 - Bibəl ta Sar̄

Nī rāā dəyá̰ (Dəyá̰ əda na)

¹ Nge ń kemḿ gḛyn ní m̄-sāān dɔ tə̄rá yāḿ tə́ dan ndɔ̄ɔ́, m̄-sāān banī m-ə́ngen alé.

² Ādə̄ m-ḭ́ḭ dɔɔ́ m-ə́la loo kem ɓēé, m-ā m-āw̄ róbə kɔsə gə̄ tə́ ō, ndágə loo gə̄ tə́ ō. Ādə̄ m̄-sāā nge ń kemḿ gḛyn ní. m̄-sāān banī m-ə́ngen alé.

³ Ngé ngɔ̄m̄ loo gə̄ ń njə̄rā a gīrə̄n̄ gidə ɓē ní əngemə̄n̄, m̄-dəjedə́ na: Nge ń kemḿ gḛyn ní á̰a̰niī a?

⁴ m̄-mān̄də́ sḛ́ý beē anī m-ə́nge nge ń kemḿ gḛyn ní. M-ə́hɔn ō, m-ā m-ə́ya̰n dɔɔ́ aĺ ō, bátə́ kadə̄ ré m-āw̄ seneé ɓēé kem kújə́ ń kó̰ó̰ḿ ndānə̄m̄ tū tə́ ní tə́ pá tá.

⁵ Ngáń kə́ dəyá̰ kə́ Jerusalem gə̄, m̄-rāāsí ɓɔ̄ɔ̄ kə ngangá ngá̰ý, kə rī kāl̄ gēé aláa kə rī dul kə́ bembeé gēé: Ī-lōōī ndól̄ Kó Tár yāḿ, ī-lōōī tūrə́n dɔ ɓīī tə́, bátə́ kadə̄ ré i nəkɔ́ n ndigə tá!

(Dəyá̰ əda na)

⁶ I náā n m-á̰a̰n ḭḭ kem dəla loo tə́ tītə̄ sa hor kə́ ra kə ngālāá ɓururu a reē noó? Ḭḭ tuy ō otə majə ō tītə̄ nō kāgə̄ mír ō kajaja ō, ndujə̄ yá̰á̰ kə́ kotə majə kə́ tayā tayā gə̄ kə́ ḭḭn̄neé dɔ ɓē kə́ rang tə́ ō?

⁷ I təpóy yā mban̄g Salomo̰. Go̰ rɔ̄ɔ̄ gə̄ kə́ dan go̰ rɔ̄ɔ̄ gə̄ kə́ Israel tə́ kutə mehḛ́ gīrə̄n̄ gidə əlan̄ ta naā tə́.

⁸ Nin̄ i kə kaskaraá malang ō, ndóōn̄də́ loo rɔ̄ɔ̄ adə̄ gerə̄n̄ rɔ̄ɔ̄ ō. Nin̄ kógə̄ḿ kógə̄ḿ ní kaskar yādə́ i dɔ ɓúŕdə́ tə́ yā rɔ̄ɔń kə yá̰á̰ kə́ to ɓōĺ kə́ ndɔ̄ɔ́.

⁹ Mban̄g Salomo̰ adə̄ rāān̄ təpóy yān kə kāgə̄ sedər kə́ Liban.

¹⁰ Adə̄ rāān̄ nga danən gə̄ i kə gində̄ arjā̰a̰á̰ ō, loo ndə̄nā dūn̄ kə́ tū tə́ i kə lɔ́rɔ́ ō, loo ndi kə́ tū tə́ i kə kūbə̄ kə́ kərē ning ō. Ngáń kə́ dəyá̰ kə́ Jerusalem gə̄ rāān̄ kem i kə tárá.

¹¹ Ngáń kə́ dəyá̰ kə́ Siyo̰ gə̄, ī-teē á̰a̰ī mban̄g Salomo̰! Ni-əla jākā mbang dɔn tə́. I jākā ń kó̰o̰n adə̄n ndɔ̄ ń ni-taāń dəyá̰ tə́ ní, ndɔ̄ ń rɔ̄n nelə̄nneé tə́ ní.