PĀ GƏ̄ 98 - Bibəl ta Sar̄

Ī-túrī kɔĺ rɔ̄nel̄ ō, ə́laī ndīĺ ō, dɔ Kɔ́ɔ̄ɓē ń a reē tə́ ní

1 Pā.

¹ Pā. Ə̄nīī pā kə́ kijə ī-rɔyīneé Kɔ́ɔ̄ɓē, tɔdɔ̄ ni-rāā yá̰á̰ kə́ to kɔr kum gə̄. Jī ko̰o̰n ō, jīn kə́ táĺ ngá̰ý ō, rāān̄ adə̄ ni-tetə rɔ̄ɔ̄.

² Kɔ́ɔ̄ɓē rāā adə̄ de gə̄ gerə̄n̄ kadə̄ i ni n i nge kajə gír deē yān gə̄ ní. Ni ɔjə háĺ kə́ gōtə́ yān kə̄ ndágá ta kum nápar de gə̄ tə́.

³ Əga kemən dɔ kem majə yān kə́ rāā kə ngán Israel gēé tə́ ō, dɔ ra kə́ ni-ra dɔ ndūn tə́ sedə́ ō. De gə̄ ń ndin̄ ta kaw̄ kə̄ ta ngóy dɔ nang tə́ nú ní a̰a̰n̄ Nə́ɓā yājí loo tetə rɔ̄ɔ̄ tə́.

⁴ Sḭḭ̄ de kə́ dɔ nang tə́ gə̄ malang, úriī kɔĺ rɔ̄nel̄ dɔ Kɔ́ɔ̄ɓē tə́. Ādī pā rɔ̄nel̄ yāsí ō, yá̰a̰ gōsə̄ yāsí gə̄ ō ɓārə̄n̄ ngá̰ý.

⁵ Úgiī kənde tām̄ yā Kɔ́ɔ̄ɓē tə́, úgiī kənde kə gō ndū yá̰a̰ gōsə̄ gēé.

⁶ Ī-kɔ̄ríī bərúnjə gə̄ ō, ī-kɔ̄ríī tōw̄ ō, úriī kɔĺ ō, dɔ mban̄g tə́, dɔ Kɔ́ɔ̄ɓē tə́.

⁷ Ādə̄ kōō bā bo kə yá̰a̰ malang kə́ tū tə́ ɓār̄ bu bu ō, ādə̄ kōō dɔ nang kə de kə́ dɔ nang tə́ gə̄ ɓār̄ ō.

⁸ Ādə̄ bā gə̄ əndan̄ jīdə́, ādə̄ mbal̄ bo gə̄ əndān̄ rɔ̄də́ naā tə́ sedə́ ba urən̄ kɔĺ rɔ̄nel̄

⁹ kété no Kɔ́ɔ̄ɓē tə́, tɔdɔ̄ ni a reē i mbée. A reē i kə̄ ko̰o̰ ɓēé dɔ dɔ nang tə́. Ni a o̰o̰ ɓē dɔ de kə́ dɔ nang tə́ gə̄ tə́ i kə gōó ō, dɔ gír de gə̄ tə́ i kə hálən kə́ súmūú ō.