PĀ GƏ̄ 95 - Bibəl ta Sar̄

Dan ń deē a aw̄ yā ra ta kum Kɔ́ɔ̄ɓē tə́ ní

¹ Ī-reēī! J-uriī kɔĺ rɔ̄nel̄ dɔ Kɔ́ɔ̄ɓē tə́, jə-tɔ̄yī mbal̄ ń ajəjí ní.

² J-aw̄ jə-raī ta kumən tə́, jə-ndadə̄ j-adə̄niī. Jə-tɔ̄ȳniī kə pā kə́ to rɔȳ gēé.

³ Tɔdɔ̄ Kɔ́ɔ̄ɓē i Nə́ɓā kə́ bo, ni i mban̄g kə́ bo kə́ dɔ nə́ɓā gə̄ tə́ malang.

⁴ Bəlo kə́ lú ngá̰ý gə̄ kə́ dɔ nang tə́ i kem jīn tə́. Jam mbal̄ gə̄ i yá̰a̰ yān.

⁵ Bā bo i yá̰a̰ yān, i ni n rāān ní. Dɔ nang i yān ō, tɔdɔ̄ i ni n i nge rāān kə jīneé ní!

⁶ Údiī! J-aw̄ j-əlaī dɔjí nang tə́ no Kɔ́ɔ̄ɓē tə́. J-aw̄ j-ɔsiī nojí nang tə́ non tə́. Jə-tétī kejəjí nang tə́ no nge kəndājí tə́.

⁷ Tɔdɔ̄ ni i Nə́ɓā yājí. Jḭḭ̄ i gír de gə̄ ń i ni n i nge kul̄də́ ní, jḭḭ̄ i ɓūtə̄ yá̰a̰ kul̄ gə̄ ń a ngɔ̄m̄də́ ní. Ɓōólaā ní ré ōōī ndūn anī,

⁸ ī-lōōī rāā kem ngan̄g tītə̄ ń kaasí gə̄ rāān̄neé Meriba, ndɔ̄ kɔ̄l naā kə́ Masa tə́ kem dəla loo tə́ ní.

⁹ Kaasí gə̄ tɔ́sə̄n̄ gātə̄ḿ ō, nāāmə̄n̄ ō, i loo ń noō tə́. Nin̄ a̰a̰mə̄n̄ kété loo rāā kəla tə́ gə̄gē ba tɔ́sə̄n̄ gātə̄ḿ.

¹⁰ De kə́ dan ń noō tə́ gə̄ ɔrə̄n̄ wurəḿ ɓāl̄ kutə sɔ́, adə̄ m-ə́da na: I de kə́ dɔdə́ gətóo gə̄, nin̄ gerə̄n̄ róbə yāḿ gə̄ alé.

¹¹ Adə̄ dan ń wōn̄g rāām̄ ní, m̄-túbə́ m-ə́da na: Nin̄ a udən̄ loo kɔr̄ koō yāḿ tə́ aĺ bátə́!