PĀ GƏ̄ 92 - Bibəl ta Sar̄

Kɔ́ɔ̄ɓē, ɓōkíī tɔ̄ȳ i yá̰á̰ kə́ majə

¹ Pā. I pā kə́ ndɔ̄ sabat tə́.

² Kɔ́ɔ̄ɓē, ɓōkíī tɔ̄ȳ i yá̰á̰ kə́ majə. Nə́ɓā kə́ dɔɔ́ sa̰y ngá̰ý, kɔsə gɔnií kə pāá i yá̰á̰ kə́ majə.

³ Kəda najə̄ kem majə yāí dəloí ɓatə i yá̰á̰ kə́ majə ō, kəda najə̄ yá̰á̰ kə́ rɔ̄kum yāí ndɔ̄ɔ́ i yá̰á̰ kə́ majə ō.

⁴ Majə kadə̄ deē dān̄ gō kə kənde kə́ kəlān i sḛ́ý beē ō, kə́ kəlān asə tām̄ ō, kə́ kəlān i ngá̰ý ō.

⁵ Tɔdɔ̄ Kɔ́ɔ̄ɓē, yá̰a̰ rāāí adə̄m̄ rɔ̄nel̄ ō, ré m̄-rā ta kəla gə̄ ń ī-rāādə́ kə jīí tə́ ní ɓáa, m-úr i kɔĺ rɔ̄nel̄ ō.

⁶ Kɔ́ɔ̄ɓē, kəla rāāī gə̄ boon̄ to ɓōĺ ngá̰ý ō, gír̄ yāí teē sa̰y ngá̰ý ō!

⁷ De kə́ mbóo asə ger̄ yá̰á̰ kógə̄ḿ tū tə́ alé. De kə́ kumən gān̄g aĺ asə ger̄ yá̰á̰ kógə̄ḿ tū tə́ alé.

⁸ Ré de kə́ sew aĺ gə̄ tɔgən̄ ngá̰ý tītə̄ mu ō, ngé rāā yá̰a̰ majaĺ gə̄ malang teēn̄ deē ō anī, i yā kadə̄ nujən̄ sedə́ kə́ njɔ́ḿ gə̄ tə́.

⁹ Banī ḭ̄ ń ī-ndi dɔɔ́ noō ní, ḭ̄ i Kɔ́ɔ̄ɓē ngándáńg.

¹⁰ Á̰a̰ madə̄ ba̰ā̰í gə̄, Kɔ́ɔ̄ɓē, á̰a̰ madə̄ ba̰ā̰í gə̄ a oyn̄ kɔ̄ɔ́ ō, ngé rāā yá̰a̰ majaĺ gə̄ malang a tə̄ndān̄ naā yā tḭ̄ḭ̄ ō.

¹¹ Ḭ̄ ī-tél ādə̄m̄ tɔ́gə gogə́ rang adə̄ m̄-ngan̄g tītə̄ dɔgə beé ō, úr yibə̄ kə́ kijə dɔḿ tə́ ō.

¹² Ngé gə̄ ń a umə̄mə̄n̄ ní, m-á̰á̰də́ kə kumḿ ō, ngé kem ndul gə̄ ń ənīmə̄n̄ rɔ̄ ní, m-ōō kōōdə́ kə mbīḿ ō.

¹³ Banī de kə́ súmūú tɔgə tītə̄ kāgə̄ túmbur beé. Ta jīn tɔ̄ɔ̄ tītə̄ kāgə̄ sédər kə́ Liban beé.

¹⁴ Ni i kāgə̄ kə́ deē əhɔn ɓē yā Kɔ́ɔ̄ɓē tə́. Ni hútə̄ ndágə loo kə́ gīr̄ gidə kújə yā Kɔ́ɔ̄ɓē Nə́ɓā yājí tə́.

¹⁵ Ká ré ni tɔgə ɓə́ga kɔ̄ɔ́ gə̄gē anī a a̰a̰n̄ ɓáý. Bəton i ngá̰ý ɓáý ō, rɔ̄n to mbōl̄ ō.

¹⁶ Ni ɔjə háĺ kə́ súmūú yā Kɔ́ɔ̄ɓē kə̄ ndágá: Kɔ́ɔ̄ɓē i mbal̄ yāḿ! Ni i de kə́ tə́la rɔ̄n naā tə́ alé!