PĀ GƏ̄ 90 - Bibəl ta Sar̄

Makətūbə̄ kə́ nge ko̰ sɔ́ (Pā gə̄ 90—106 ) Deē ndul a oy ba Nə́ɓā a ndi ngándáńg

1 Ndɔ̄ȳ yā Moijə, deē yā Nə́ɓā.

¹ Ndɔ̄ȳ yā Moijə, deē yā Nə́ɓā. Kɔ́ɔ̄ɓē, i ḭ̄ n i loo ɓɔ̄ɔ̄ rɔ̄ yājí kə dɔ ɓāl̄ gə̄ kə dɔ ɓāl̄ gə̄ ní.

² Kété pá tá kadə̄ mbal̄ gə̄ teēn̄ ō, kété pá tá kadə̄ ī-rāā dɔ nang ō yá̰á̰ malang kə́ tū tə́ ō, ta kəla gír tə́ jóo bátə́ kə̄ no tə́ ō ní, ḭ̄ i Nə́ɓā.

³ Ḭ̄ ī-rāā ādə̄ de gə̄ télən̄ nán̄g gogə́. Tɔdɔ̄ ə́da na: Ngán Adam gə̄, ī-tél āwī gogə́ loo ń ī-teēī tū tə́ ní tə́!

⁴ A̰á̰ā̰, ta kumií tə́ ní ɓāl̄ kə́ dūbú gə̄ i tītə̄ ndɔ̄ kə́ tagə́bēé ń mān̄ kɔ̄ɔ́ ní, i tītə̄ kum mbang kə́ kógə̄ḿ beē kə́ dan ndɔ̄ɔ́.

⁵ Ḭ̄ ī-gān̄g gír ɓāl̄ deē ndul anī a gətóo kɔ̄ɔ́ kə́ ndɔ̄í tītə̄ loo gān̄g gír ɓīī ō, tītə̄ mu kə́ əɓa ō,

⁶ adə̄ mu hútə̄ dəloí, ba loo sɔlí anī ndəlē ō tutə kɔ̄ɔ́ ō.

⁷ Rɔ̄kum, wōn̄g yāí tɔ̄l̄jí kɔ̄ɔ́, wōn̄g yāí kə́ ngá̰ý əla ɓōĺ kemjí tə́.

⁸ Ḭ̄ ī-tə́ndā yá̰á̰ kə́ gōtə́ aĺ gə̄ ń jə-rāā ní ta kumií tə́. Loo kə́ unjə̄ kow yāí unjə̄ dɔ yá̰a̰ yājí gə̄ kə́ ton̄ loo mundə̄ tə́.

⁹ A̰á̰ā̰, ndɔ̄jí gə̄ malang mānə̄n̄ kɔ̄ɔ́ ta kum wōn̄g yāí kə́ ngá̰ý tə́. Ɓāl̄jí gə̄ mānə̄n̄ tītə̄ koō kə́ deē tetə nja kógə̄ḿ beē.

¹⁰ J-asə ndi ɓāl̄ kutə sīrí. Ngé kə́ tɔ́gə́də́ i ngá̰ý gə̄ asən̄ ndi ɓāl̄ kutə sɔ́sɔ́. Banī yá̰á̰ ń j-ənge gírí ní i tápə̄ ō, kum tō ndoō ō. Gír ndi kə kumuú yājí gān̄g láẃ ngá̰ý ō, koōjí teē kɔ̄ɔ́ ō.

¹¹ I náā n asə ger̄ tɔ́gə wōn̄g yāí ní? Deē ń ɓōĺ ndílí ngá̰ý ní a ger̄ wōn̄g yāí majə!

¹² Ī-ndóōjí loo tə́da ndɔ̄jí gə̄. Anī kemjí a ger̄ najə̄.

¹³ Kɔ́ɔ̄ɓē, ā ə́hɔ́jí kemií tə́ i bátə́ ta kə́ rá? Ī-tūr̄ rɔ̄í kə̄ rɔ̄jí tə́, á̰a̰ kum tō ndoō yājí jḭḭ ngé kəla yāí gə̄.

¹⁴ Ī-rāā kem majə sejí ngá̰ý, ādə̄ tɔ̄l̄ ɓōn kə́ kemjí tə́ dəloí ɓatə. Loo ń noō tə́ j-a j-əga kɔŕ rɔ̄nel̄ kə dɔ ndɔ̄ gə̄ malang ń j-a jə-ndiń kə kumjí ní.

¹⁵ Ḭ̄ ə́la rɔ̄sɔl̄ dɔjí tə́ dan i ngá̰ý. Ngɔlaā ní ādə̄jí ɓāl̄ gə̄ kə́ rɔ̄jí nel̄jí kemeé gə̄, ādə̄ asən̄ naā kə ɓāl̄ gə̄ ń yá̰á̰ kə́ to kum kaȳ aĺ gə̄ rāān̄neéjí ní.

¹⁶ Ādə̄ ngé kəla yāí gə̄ a̰a̰n̄ kəla rāāí kə kumdə́ ō, ādə̄ ngáńdə́ gə̄ a̰a̰n̄ ndə́lē ń ī-ndə́lē ngá̰ý ní ō.

¹⁷ Ādə̄ háĺ kə́ sɔl̄ lɔm yā Kɔ́ɔ̄ɓē Nə́ɓā yājí i sejí! Ī-rāā ādə̄ kəla ń jə-rāā kə jījí ní əla ngəran ngan̄g, a̰á̰ā̰, kəla ń toō ń jə-rāā kə jījí ní, ī-rāā ādə̄ ra ngan̄g.