PĀ GƏ̄ 9 - Bibəl ta Sar̄

Kɔ́ɔ̄ɓē i nge kajə ngé ndoō gə̄

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kənde kə́ ndū dūú. I pā yā Dabid.

² Kɔ́ɔ̄ɓē, m̄-ndigə ɓōkíī tɔ̄ȳ kə ngarā̰ kemḿ gēé malang ō, m̄-ndigə kənī gotə yá̰a̰ malang kə́ majə ngá̰ý gə̄ ń ī-rāā ní ō.

³ Nə́ɓā kə́ dɔɔ́ sa̰y ngá̰ý, m-ə̄nī pā kə rīí ō, m̄-ndām̄ kə rɔ̄nelēé ō, najə̄ yāí tə́.

⁴ Madə̄ ba̰ā̰ḿ gə̄ télən̄ kə gōdə́ ō, bḭ́ḭ̄n̄ kə́ njadə́ əhɔ dɔ nang aĺ ō, oyn̄ kə̄ ta kumií tə́ noō ō.

⁵ Tɔdɔ̄ ḭ̄ ī-rɔ̄ɔ̄ dɔḿ tə́ ō, ī-gān̄g sarya yāḿ ō. Ī-ndi dɔ kōr̄ kāgə̄ mbang yāí tə́, ḭ̄ i nge gān̄g sarya kə́ gōtə́.

⁶ Ḭ̄ ɔ́jə rāā yá̰á̰ kə́ tōr̄ kə nápar de gə̄ ń noō. Ī-rāā ādə̄ de kə́ sew aĺ gə̄ oyn̄. Ɔ̄r̄ rīdə́ kɔ̄ɔ́ dɔ nang tə́ kə́ njɔ́ḿ gə̄ tə́.

⁷ Gír yā madə̄ ba̰ā̰ḿ gān̄g kɔ̄ɔ́, ni asə yá̰a̰ to̰ aĺ bátə́. Ī-nujə ɓē yān gə̄ sák sák kɔ̄ɔ́, a əga kem de gə̄ dɔ ɓē yān tə́ to̰ alé.

⁸ Kɔ́ɔ̄ɓē o̰o̰ ɓē ngándáńg! Ni-rāā adə̄ kōr̄ kāgə̄ mbang yān ndi ngan̄g yā rāań sarya.

⁹ I ni n i nge ko̰o̰ ɓē kə gōó majə dɔ de gə̄ tə́ ō, nge gān̄g sarya yā gír de gə̄ kə gō róbə́ kə́ súmūú ō ní.

¹⁰ Kɔ́ɔ̄ɓē i loo ɓɔ̄ɔ̄ rɔ̄ yā deē ń rāān̄ kumən ndoō tə́ ní, i loo ɓɔ̄ɔ̄ rɔ̄ yā de kə́ wur kɔl əsō dɔn tə́.

¹¹ Kɔ́ɔ̄ɓē, ādə̄ ngé gə̄ ń gerə̄n̄ rīí ní əndān̄ kemdə́ dɔí tə́, tɔdɔ̄ ḭ̄ ə́yá̰ ngé gə̄ ń a sāānī ní kɔ̄ɔ́ alé.

¹² Kɔ́ɔ̄ɓē ń kōr̄ kāgə̄ mbang yān ndi Siyo̰ ní, j-ənī pā j-ɔsiīneé gɔnən. Yá̰á̰ kə́ to ɓōĺ gə̄ ń ni-rāā ní ə̄nīī mbērən dan gír de gə̄ tə́!

¹³ Tɔdɔ̄ i ni n i nge ndəle nja nge tɔ̄l̄ deē ní, ni i nge rāā ba̰ā̰. Dɔn ndígə̄nal ngé rɔ̄ tō ndoō gə̄ ń nōōn̄ kə̄ dɔn tə́ ní alé.

¹⁴ Kɔ́ɔ̄ɓē, á̰a̰ kum tō ndoō yāḿ! Á̰a̰ rɔ̄sɔl̄ kə́ asə naā beē ń madə̄ ba̰ā̰ḿ gə̄ əlan̄ dɔḿ tə́ toó. I ḭ̄ n i nge kɔrə̄m̄ kɔ̄ɔ́ ta yo tə́ ní.

¹⁵ Loo ń noō tə́ m-ā m̄-tə́dá yá̰a̰ malang ń ndḛḛ̄ kadə̄ m̄-ɓōkíī tɔ̄ȳ ní dan ngé kán naā gə̄ kə́ Siyo̰ tə́ rang ɓáý ō, m-ā m̄-rāā rɔ̄nelí ḭ̄ nge kajəḿ ō.

¹⁶ Nápar de kə́ rang gə̄ əsōn̄ kem bəlo ń nin̄ kɔ́ gə̄ ndērə̄n̄ tə́ ní, əlan̄ njadə́ kum gūmbə̄ ń nin̄ kɔ́ gə̄ əyān̄ ní tə́.

¹⁷ Kɔ́ɔ̄ɓē rāā adə̄ de gə̄ ger̄nən̄ i kə ta kūl̄ sarya ń nəkɔ́ gān̄g ní. Gūmbə̄ yā de kə́ sew aĺ tél əhɔn nəkɔ́.

¹⁸ Ādə̄ de kə́ sew aĺ gə̄ tél aw̄n̄ gogə́ ɓádá, nápar de gə̄ ń noō malang ń dɔdə́ a ndígə̄nal dɔ Nə́ɓā tə́ ní.

¹⁹ Banī dɔ Nə́ɓā a ndígə̄nal dɔ nge rɔ̄ tō ndoō tə́ aĺ i kə́ bátə́ gə̄ tə́. Kəndā kem dɔ Nə́ɓā tə́ yā ngé rɔ̄ tō ndoō gə̄ ní gotə a to karī alé.

²⁰ Kɔ́ɔ̄ɓē, ḭ́ḭ dɔɔ́! Ādə̄ tɔ́gə deē ndul tɔȳ yāí alé! Āw̄ kə gíŕ nápar de kə́ rang gēé ta loo gān̄g sarya yāí tə́!

²¹ Kɔ́ɔ̄ɓē, ə́la ɓōĺ kə́ ngá̰ý kemdə́ tə́, ādə̄ gíŕ nápar de gə̄ ń noō gerə̄n̄ kadə̄ nin̄ i deē ndul gə̄!