PĀ GƏ̄ 89 - Bibəl ta Sar̄

Yá̰a̰ gə̄ ń ə̄nī ndūí yā rāā kadə̄ Dabid ní i rá

¹ Pā kə́ kəda yā Etan kə́ ngōn̄ nge ɓē.

² M-ā m-ə̄nī pā yá̰a̰ gə̄ ń Kɔ́ɔ̄ɓē rāā kə gō kem majə yān ní ngándáńg. M-ā m-ə̄nī mbēr̄ dɔ yá̰á̰ kə́ rɔ̄kum yān tə́, kadə̄ ngáńjí gə̄ ō ngán kaají gə̄ ō gerə̄n̄.

³ Rɔ̄kum, m-ə́da na: Kem majə yāí to ngándáńg dɔ rā̰ tə́. Ḭ̄ ī-rāā adə̄ ra dɔ ndū tə́ yāí ndi ngándáńg dɔ rā̰ tə́.

⁴ Ḭ̄ ə́da na ə́hɔ madə̄ naā kə deē ń ī-gə̄rān ní, ī-túbə kə rɔ̄í ādə̄ nge kəla yāí Dabid, ə́da na:

⁵ M-ā m-ādə̄ gír kojə yāí a o̰o̰ ɓē ngándáńg. I beé n m-ā m̄-rāań kadə̄ de kə́ gír kojə yāí tə́ gə̄ a o̰o̰n̄neé ɓē kə dɔ ɓāl̄ gə̄ dɔ ɓāl̄ gə̄ ní.

⁶ Kɔ́ɔ̄ɓē, ādə̄ dɔ rā̰ ɔsə gɔn yá̰á̰ kə́ to kɔr kum ń ī-rāā ní ō, ādə̄ ɔsə gɔn ra kə́ ī-ra dɔ ndūí tə́ ō, loo kán̄ naā yā de kə́ táĺ gə̄ tə́!

⁷ Kɔ́ɔ̄ɓē, de kə́ asə seí gətóo dɔ rā̰ tə́. Dan nə́ɓā gə̄ tə́ ní, nge kə́ to tītə̄ Kɔ́ɔ̄ɓē gətóo.

⁸ De kə́ táĺ gə̄ ń kánə̄n̄ naā yā koō naā dɔ yá̰á̰ tə́ ní, Nə́ɓā to ɓōĺ ngá̰ý dandə́ tə́. To ɓōĺ tɔȳ de gə̄ malang ń ndi gīrə̄n̄ gidən ní.

⁹ Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý, Kɔ́ɔ̄ɓē, i náā n ngan̄g tītīí? Yá̰á̰ kə́ rɔ̄kum gīr̄ gidií.

¹⁰ I ḭ̄ n i nge kɔgə̄ bā bo kɔjə rɔ̄n ní, dan ń ḭḭ bububu anī, i ḭ̄ n i nge rāā kadə̄ tél to jəke ní.

¹¹ I ḭ̄ n ī-rējə̄ nīń Rahab ní, i ḭ̄ n ī-tə̄ndā madə̄ ba̰ā̰í gə̄ ī-tḭ̄ḭ̄də́ naā tə́ kə tɔ́gə jīí ní.

¹² Dɔ rā̰ i yāí ō, dɔ nang i yāí ō! I ḭ̄ n i nge kəndā loo kə́ dɔɔ́ ō, kə́ nang tə́ ō, yá̰a̰ malang kə́ kemeé ō ní.

¹³ I ḭ̄ n i nge kəndā dām̄ mbɔ́r ɓē kə́ ko̰ó̰ ō kə́ geleé ō ní. Mbal̄ gə̄ kə́ Tabor ō kə́ Hermon ō əgan̄ kɔŕ rɔ̄nel̄ dɔ rīí tə́.

¹⁴ Jī kə́ kɔl watang ń toō, kə́ tɔ́gən i ngá̰ý ń toō, jī ko̰ kə́ kəla kə̄ dɔɔ́ ń toō i jīí ḭ̄.

¹⁵ Ko̰o̰ ɓē yāí ndi i dɔ yá̰á̰ kə́ gōtə́ tə́ ō, yá̰á̰ kə́ súmūú tə́ ō. Kem majə ō najə̄ kə́ rɔ̄kum ō njə̄rān̄ kété noí tə́.

¹⁶ Kɔ́ɔ̄ɓē, rɔ̄nel̄ i kə de gə̄ ń gerə̄n̄ rāā walyaí ní. Nin̄ a njə̄rān̄ ta kumií tə́ dan loo kə́ unjə̄ kow yāí tə́.

¹⁷ A ndāmə̄n̄ kə rɔ̄nelēé najə̄ yāí tə́ dəloí bátə́ kadə̄ loo tíbə dɔdə́ tə́, A ɔrə̄n̄ dɔdə́ dɔɔ́ kə ta kūl̄ yá̰a̰ rāāí kə́ gōtə́ gə̄.

¹⁸ Rɔ̄kum, ḭ̄ i tɔ́gə́də́ kə́ to ɓōĺ ngá̰ý. Ḭ̄ ī-rāā ādə̄ kumjí a̰a̰ rá ráńg i kə ta kūl̄ kem majə yāí.

¹⁹ Nge ń i der yājí ō mban̄g yājí ō ní, ndi i kə ta kūl̄ Kɔ́ɔ̄ɓēé ō, kə ta kūl̄ kə́ táĺ yā Israel ō.

²⁰ Ndɔ̄ kógə̄ḿ tə́ ī-teē ta kum deē yāí gə̄ tə́ ba ə́dádə́ na: m̄-rāā kə de kə́ əhɔ rɔ̄n tɔgə, m-ɔ́sə balsáá kógə̄ḿ kə́ dan gír deē yāḿ gə̄ tə́ kə̄ dɔɔ́.

²¹ M-ə́nge nge kəla yāḿ Dabid, m-ɔ̄r̄ kamə̄n kə yibə̄ kə́ táĺ.

²² M-ā m-ə́hɔn kə̄ dɔɔ́ kə tɔ́gə jīḿ, tɔ́gə jīḿ a rāā kadə̄ ni a tél de kə́ ngan̄g.

²³ Madə̄ ba̰ā̰n a asə kəhɔn dɔ jīn tə́ alé. Nge kem ndul a asə kəla rɔ̄sɔl̄ dɔn tə́ alé.

²⁴ Tɔdɔ̄ m-ā m̄-rējə̄ ngé rɔ̄ɔ̄n gə̄ ta kumən tə́, ngé gə̄ ń a im̄nən̄ ní m-ā m-ə́ndádə́.

²⁵ M-ā m̄-rāā kadə̄ ra dɔ ndū yāḿ tə́ ō, kem majə yāḿ ō ndin̄ seneé, ré oō rīḿ anī a ɔr̄ dɔn dɔɔ́.

²⁶ M-ā m-ādə̄ a o̰o̰ ɓē dɔ bā bo tə́, m-ā m-ə́la bā gə̄ gír jī ko̰n tə́.

²⁷ Ni a ɓārə́m̄ mā na i bɔbə̄n ō, Nə́ɓā yān ō, mbal̄ kə́ nge kajən ō.

²⁸ Mā m-ā m̄-rāān i ngōn̄ hágə́ḿ tə́ ō, mban̄g kə́ bo tɔȳ mban̄g gə̄ malang kə́ dɔ nang tə́ ō.

²⁹ Kem majə yāḿ a to ngándáńg tām̄ yān tə́ ō, ndūḿ ń m-ə̄nī m-ə́hɔń madə̄ naā seneé ní, m-ā m̄-rā dɔ tə́ ō.

³⁰ M-ā m-ādə̄ gír kojə yān a o̰o̰ ɓē gotən tə́ ngándáńg ō, kōr̄ kāgə̄ mbang yān a to ta kaw̄ jóo tītə̄ dɔ rā̰ ō.

³¹ Ré ngánən gə̄ əya̰n̄ ndū najə̄ yāḿ kɔ̄ɔ́ ō, unən̄ gō róbə kə́ súmūú yāḿ aĺ ō,

³² ré nin̄ rāān̄ yá̰a̰ gə̄ ń m̄-rā sedə́ ta rāā ní aĺ ō, ngɔ̄mə̄n̄ gō míndə́ḿ gə̄ aĺ ō anī,

³³ m-ā m-ún kāgə̄ yā kəndańdə́ najə̄ dɔ ngan̄g yādə́ tə́ ō, m-ā m-ə́ndádə́ najə̄ yá̰á̰ kə́ gōtə́ aĺ ń nin̄ rāān̄ tə́ ní ō.

³⁴ Banī kem majə yāḿ a to tām̄ yān tə́ ngándáńg ō, ndūḿ ń m-ə̄nī m-ə́hɔń madə̄ naā seneé ní, m-ā m̄-rā dɔ tə́ ō.

³⁵ M-ā m̄-mān̄ dɔ ndūḿ ń m-ə̄nī m-ə́hɔń madə̄ naā seneé ní alé, najə̄ ń teē taḿ tə́ ní, m-ā m̄-tūr̄ ndūḿ gō tə́ alé.

³⁶ m̄-túbə kə hálə́ḿ kə́ táĺ gidə kógə̄ḿ beē m-ə́da na: Tītə̄ ń mā i Nə́ɓā rɔ̄kum noō ní, m-ā m̄-gól̄ Dabid alé.

³⁷ Gír kojə yān a o̰o̰ ɓē ngándáńg ō, kōr̄ kāgə̄ mbang yān a ndi ngan̄g ngándáńg ta kumḿ tə́ tītə̄ mbang ō,

³⁸ tītə̄ nāā ń i yá̰á̰ kə́ kum tə́ kə́ ra dɔ ndūn tə́ ɓōdə̄ loo tə́ dɔɔ́ ní ō.

³⁹ Ɓá tā ba mban̄g yāí ń úr yibə̄ dɔn tə́ ní, i ḭ̄ n ī-mbātə́n ō, ī-kídə̄n ō, ī-rāā wōn̄g seneé ō ní.

⁴⁰ Ḭ̄ ī-tūr̄ ndūí ń ə̄nī ādə̄ nge kəla yāí ní kɔ̄ɔ́, ə̄nī jākā mbang yān nang tə́, ī-rāā ādə̄ téĺ yá̰á̰ kə́ yḛr.

⁴¹ Ī-ró̰ȳ ndogə̄ yān gə̄ kɔ̄ɔ́ ō, ī-nujə loo kə́ ngan̄g ngá̰ý yān gə̄ kɔ̄ɔ́ ō.

⁴² Ngé mān̄ róbə gə̄ malang ɔyn̄ yá̰a̰ kənge yān gə̄. Ni-tél i kur̄ kəgō yā madə̄ ɓēn gə̄.

⁴³ Ī-rāā ādə̄ madə̄ ba̰ā̰n gə̄ tél ngangə̄n̄, ī-rāā ādə̄ ngé gə̄ malang ń rɔ̄ɔ̄nən̄ ní rɔ̄də́ nel̄də́.

⁴⁴ Ī-rāā ādə̄ kum kaskar yān ɗogə́rō kɔ̄ɔ́ gə̄gē. Ī-rāā seneé ādə̄ ra ngan̄g ta rɔ̄ tə́ alé.

⁴⁵ Ī-taā ko̰o̰ ɓē jīn tə́ kɔ̄ɔ́, ī-mbəre kōr̄ kāgə̄ mbang yān ə̄nī nang tə́.

⁴⁶ Ī-gān̄g ta ɓāl̄ balsáa yān kɔ̄ɔ́, ə́la rɔ̄sɔl̄ dɔn tə́.

⁴⁷ Kɔ́ɔ̄ɓē, ā ī-ɓɔ̄ɔ̄ rɔ̄í i bátə́ ta kə́ rá? Wōn̄g yāí a o̰o̰ loo bir bir i bátə́ ta kə́ rá?

⁴⁸ Deē ndul a ndi kə kumneé ɓāl̄ ngá̰ý aĺ ní ī-gír̄ dɔḿ tə́. Ī-gír̄ dɔ ndɔ̄ ndiḿ kə kumḿ kə́ i ngá̰ý aĺ tə́, ḭ̄ ə̄ndā deē i yā kadə̄ ta tɔ̄l̄ tan to rim a?

⁴⁹ I náā n asə ndi kə kumneé kanjə̄ koy ní? I náā n asə taā rɔ̄n jī yo tə́ kəya̰ dɔɔ́ ní?

⁵⁰ Kɔ́ɔ̄ɓē, kem majə yāí kə́ jóó ní aw̄ i rá? Kété ní ī-túbə ādə̄ Dabid kadə̄ ā ī-ra dɔ ndūí tə́ seneé aĺ a?

⁵¹ Kɔ́ɔ̄ɓē, ī-gír̄ dɔ ngé kəla yāí gə̄ ń tájə̄n̄də́ ní tə́, ī-gír̄ dɔ gír de gə̄ malang ń toō ń ə́ládə́ gír jīḿ tə́ ní.

⁵² Kɔ́ɔ̄ɓē, madə̄ ba̰ā̰í gə̄ tájə̄n̄də́! Nin̄ tībə̄n̄ hōr̄ gotə nja mban̄g yāí ń úr yibə̄ dɔn tə́ ní!

⁵³ Ādə̄ de gə̄ tɔ̄ȳn̄ Kɔ́ɔ̄ɓē ngándáńg! Adə̄ i tītə̄ ń noō, adə̄ i tītə̄ ń noō!