PĀ GƏ̄ 88 - Bibəl ta Sar̄

Na̰y sḛ́ý a m-óy

¹ Pā yā ngán Kore gə̄. I pā kə́ kem makətūbə̄ yā ngār yā gōsə̄ pā gə̄ tə́. A ənīn̄ i kə rɔ̄nelēé alé. I pā kə́ kəda yā Heman kə́ ngōn̄ nge ɓē.

² Kɔ́ɔ̄ɓē Nə́ɓā, nge kajəḿ! m̄-nōō kə̄ dɔí tə́ ndɔ̄ɔ́ ō kadaá ō kadə̄ ī-rāā seḿ.

³ Ādə̄ ndɔ̄ȳ yāḿ aw̄ bátə́ ugə̄ rɔ̄í tə́! Ī-nēl̄ mbīí ōoń nōō yāḿ.

⁴ Tɔdɔ̄ yá̰á̰ kə́ to kum kaȳ aĺ əsō dɔḿ tə́ ní alə̄m̄ sa tə́ ō, na̰y i sḛ́ý kadə̄ m-óy ō.

⁵ De gə̄ malang rāāmə̄n̄ i de kə́ gír yān gān̄g kɔ̄ɔ́ tə́, rāāmə̄n̄ i de kə́ to i kə̄ ta yo tə́ tə́.

⁶ Loo yāḿ i dan de kə́ koy gə̄ tə́, tītə̄ nīń gə̄ kə́ ton̄ ɓádá, kə́ əga kemií dɔdə́ tə́ to̰ aĺ ō, ī-rāā yá̰a̰ tām̄ yādə́ tə́ to̰ aĺ ō.

⁷ Ḭ̄ ə̄nīm̄ bəlo kə́ lú ngá̰ý tə́, kem bəlo kə́ lú ngá̰ý yā yo tə́, kum til tə́.

⁸ Ḭ̄ ī-bə̄gā wōn̄g yāí dɔḿ tə́. Ī-taā tɔ́gə́ḿ kə bəngál man̄ yāí gēé.

⁹ Ḭ̄ ī-rāā adə̄ ngé gə̄ ń j-ənī kemjí j-adə̄ naā ní əya̰mə̄n̄ kɔ̄ɔ́. Ī-rāā ādə̄ m̄-téĺ yá̰á̰ kə́ to yḛr kum ta kumdə́ tə́. Gāngə̄n̄ gírə́ḿ kum yá̰á̰ kə́ tōr̄ tə́, ta róbə́ kə́ yā kadə̄ m̄-teēń gətóo.

¹⁰ Yá̰á̰ kə́ tōr̄ rāām̄ adə̄ kumḿ a̰a̰ loo alé. Kɔ́ɔ̄ɓē, m̄-ɓāríī dəloí bátə́ loo tíbə dɔḿ tə́ kadə̄ ī-rāā seḿ. m̄-sə́ra jīḿ kə̄ rɔ̄í tə́.

¹¹ Ā ī-rāā yá̰á̰ kə́ yáā tām̄ yā de kə́ koy kɔ̄ɔ́ gə̄ tə́ a? Nin̄ a ḭḭn̄ yā kɔsə gɔnií a?

¹² A ɔrə̄n̄ najə̄ kem majə yāí ɓádá a? A ənīn̄ gotə ra kə́ ī-ra dɔ ndūí tə́ ɓē yā ngé koy gēé a?

¹³ Yá̰á̰ kə́ yáā gə̄ ń ī-rāā ní, de kə́ kum til tə́ gə̄ a gerə̄n̄ yá̰á̰ kə́rēý tū tə́ a? Ɓē ń dɔ deē a ndígə̄nal yá̰a̰ malang tū tə́ ní, yá̰á̰ kə́ gōtə́ ń ī-rāā ní deē a ger̄ tū tə́ a?

¹⁴ Banī Kɔ́ɔ̄ɓē, mā m̄-nōō kə̄ dɔí tə́ kadə̄ ī-rāā seḿ! Kə ndɔ̄í anī, ndɔ̄ȳ yāḿ ugə̄ rɔ̄í tə́ kɔ̄ɔ́ ɓá.

¹⁵ Kɔ́ɔ̄ɓē, ī-mbātə́m̄ i najə̄ rí tə́? Ī-ɓɔ̄ɔ̄ ta kumií kɔ̄ɔ́ ɔ̄gə̄m̄neé ka̰a̰ī i tām̄ rí tə́?

¹⁶ Rɔ̄ḿ əla gír tō ndoō ō, tɔ́gə́ḿ əla gír təgā kɔ̄ɔ́ ō i kə ngōn̄ dūúḿ. Ḭ̄ ə́la ɓōĺ kə́ ngá̰ý kemḿ tə́ adə̄ kemḿ nujə sák sák kɔ̄ɔ́ najə̄n tə́.

¹⁷ Wōn̄g yāí o̰o̰m̄ kə́ hor tə́. Ɓōĺ kə́ ngá̰ý ń ə́la kemḿ tə́ ní tɔ̄l̄ə̄m̄ mámák kɔ̄ɔ́.

¹⁸ Kə dɔ ndɔ̄ gə̄ nin̄ teēn̄ kə̄ ta gə̄ tə́ reē gīrə̄n̄ gidəḿ, tītə̄ man̄ kə́ un dɔḿ kɔ̄ɔ́ beē.

¹⁹ Ngé njə̄rā seḿ gə̄ ō, madə̄ taḿ gə̄ ō ní, ḭ̄ ī-rāā adə̄ nin̄ əya̰mə̄n̄ kɔ̄ɔ́ malang. I loo kə́ risə til nding n tél madə́ḿ ń j-ənī kemjí j-adə̄ naā ní.