PĀ GƏ̄ 86 - Bibəl ta Sar̄

Dan ń yá̰a̰ tɔȳ dɔḿ ní, m̄-sāā njaí

1 Ndɔ̄ȳ yā Dabid

¹ Ndɔ̄ȳ yā Dabid Kɔ́ɔ̄ɓē, ī-nēl̄ mbīí ōoń ndūḿ, ī-ndigəm̄ tə́, tɔdɔ̄ mā i de kə́ ndoō ō, rɔ̄ḿ tō ndoō ngá̰ý ō.

² ī-ngɔ̄mə̄m̄ tɔdɔ̄ mā i nge ra dɔ ndūḿ tə́. Mā i nge kəla yāí, m-ə̄nī kemḿ m-ādī. Ḭ̄ ń i Nə́ɓā yāḿ ní ájəm̄.

³ Kɔ́ɔ̄ɓē, á̰a̰ kum tō ndoō yāḿ, i ḭ̄ n m-ā m̄-ɓāríī kə dɔ ndɔ̄ gə̄ ní.

⁴ Ī-rāā kə nge kəla yāí ādə̄ kemən nelə̄n, tɔdɔ̄ Kɔ́ɔ̄ɓē, m̄-tūr̄ rɔ̄ḿ i kə̄ rɔ̄í tə́.

⁵ Kɔ́ɔ̄ɓē, ḭ̄ ń i de kə́ nge kem majə ō, ā ī-mā̰ȳ rɔ̄í dɔ de gə̄ tə́ ō ní, ḭ̄ ī-rāā kem majə ngá̰ý kə de gə̄ malang ń a ɓār̄nī ní.

⁶ Kɔ́ɔ̄ɓē, ī-nēl̄ mbīí ōoń ndɔ̄ȳ yāḿ! Dan ń m-ā m̄-rāāī ɓɔ́ anī, ī-nēl̄ mbīí majə ōoń!

⁷ Ndɔ̄ ń wur kɔl əsōń dɔḿ tə́ ní m̄-ɓāríī, anī ī-ndigəm̄.

⁸ Kɔ́ɔ̄ɓē, dan nə́ɓā gə̄ tə́ malang ní, ni kə́ tītīí gətóo! Yá̰á̰ ń ī-rāā ní, nə́ɓā kógə̄ḿ kə́ asə rāā gətóo.

⁹ Kɔ́ɔ̄ɓē, gíŕ nápar de gə̄ malang ń ī-rāādə́ ní, a reēn̄ yā kɔsə nodə́ nang tə́ noí tə́ ō, yā tɔ̄ȳ rīí ō.

¹⁰ Tɔdɔ̄ ḭ̄ i de kə́ bo, ī-rāā yá̰á̰ kə́ majə to ɓōĺ ngá̰ý gə̄, i īkɔ́ kal kógə̄ḿ beē n i Nə́ɓā kə́ rɔ̄kum ní!

¹¹ Kɔ́ɔ̄ɓē, ɔ́jəm̄ róbə yāí, anī m-ā m-ún gō najə̄ yāí kə́ rɔ̄kum. Ī-rāā ādə̄ kemḿ i dɔ yá̰á̰ kə́ kal kógə̄ḿ beē tə́: I kadə̄ m̄-ɓōĺ gidə rīí.

¹² Kɔ́ɔ̄ɓē Nə́ɓā yāḿ, m-ā m̄-ɓōkíī tɔ̄ȳ kə ngarā̰ kemḿ malang, m-ā m̄-tɔ̄ȳ rīí ngándáńg.

¹³ Tɔdɔ̄ kem majə ń ī-rāā seḿ ní to ɓōĺ ngá̰ý, ī-teē seḿ kem bəlo kə́ lú ngá̰ý yā yo tə́ kɔ̄ɔ́.

¹⁴ Nə́ɓā, de kə́ ngé gán̄g rɔ̄də́ gə̄ ənīmə̄n̄ rɔ̄ɔ̄, ɓūtə̄ de kə́ ngé rāā yá̰a̰ kə dɔ́nɔ́ gə̄ sāān̄ tɔ̄lə̄m̄, usədə́ dɔí tə́ alé.

¹⁵ Banī Kɔ́ɔ̄ɓē, ḭ̄ i Nə́ɓā kə́ kumií a o̰o̰ī kə de gēé ō, kə́ nge ka̰a̰ kum tō ndoō yā de gə̄ ō, kə́ nge rāā wōn̄g láẃ aĺ ō, Kem majə yāí i ngá̰ý ō, ī-ra dɔ ndūí tə́ ngá̰ý ō.

¹⁶ Ī-tūr̄ rɔ̄í kə̄ rɔ̄ḿ tə́, á̰a̰ kum tō ndoō yāḿ. Mā i nge kəla yāí, ādə̄m̄ tɔ́gə yāí. Mā i ngōn̄ kem nge kəla yāí kə́ dəyá̰, ájəm̄!

¹⁷ Ī-rāā yá̰á̰ kógə̄ḿ kə́ to rī ɓār̄ tām̄ yāḿ tə́, loo ń noō tə́ rɔ̄ madə̄ ba̰ā̰ḿ gə̄ a sɔl̄də́, dan ń a a̰a̰n̄ kadə̄ ḭ̄ Kɔ́ɔ̄ɓē ī-dḭḭ̄m̄ ō, ī-sɔl̄ kemḿ ō ní.