PĀ GƏ̄ 83 - Bibəl ta Sar̄

Ndɔ̄ȳ yā gír deē yā Nə́ɓā gə̄ ń madə̄ ba̰ā̰də́ gə̄ sāān̄ rāādə́ majaĺ ní

¹ Pā yā Asap.

² Nə́ɓā, ī-ndi kə taí kə́ mbóo to̰ alé. Ī-lōō ndi kanjə̄ rāā yá̰a̰ ō, kanjə̄ kɔr̄ najə̄ ō.

³ Á̰a̰ā̰, madə̄ ba̰ā̰í gə̄ a ndángə̄n̄ rɔ̄də́, madə̄ kɔ̄līí gə̄ tél unən̄ dɔdə́ dɔɔ́ gogə́.

⁴ Nin̄ oōn̄ naā loo mundə̄ tə́ jəke yā rāā yá̰á̰ kə́ majaĺ kə gír deē yāí gēé, rāān̄ yá̰á̰ kə́ majaĺ loo mundə̄ tə́ jəke yā rɔ̄ɔń kə yá̰a̰ ɓɔ̄ɔ̄ yāí.

⁵ Nin̄ ədan̄ na: Ādə̄ jə-tɔ̄ɔ̄ī kōōdə́ kɔ̄ɔ́ ādə̄ nin̄ i nápar de gə̄ to̰ alé, ādə̄ deē ɓāŕ rī Israel to̰ alé!

⁶ Nin̄ əndān̄ tadə́ naā tə́ ō, edən̄ kem naā tə́ ō, ba əndān̄ rɔ̄də́ naā tə́ yā kənīīneé rɔ̄ɔ̄.

⁷ Madə̄ ba̰ā̰í gə̄ ní i Edom gə̄ ō Ismael gə̄ ō Moab gə̄ ō Agar gə̄ ō Gebal gə̄ ō

⁸ Amon gə̄ ō Amalek gə̄ ō Pilistin gə̄ ō Tir gə̄ ō.

⁹ Asiri gə̄ ɓoon̄ rɔ̄də́ yādə́ tə́ gə̄gē, yā rāań kə ngán Lot gə̄.

¹⁰ Nə́ɓā, ī-rāādə́ yá̰á̰ ń ī-rāā kə Sisəra ō Yabin ō ta man̄ Kison tə́ ní, aláa ī-rāādə́ yá̰á̰ ń ī-rāā kə Madian gə̄ ní.

¹¹ Tɔ̄lə̄n̄də́ malang kɔ̄ɔ́ ta kəɓa man̄ kə́ Harod tə́ ō, əya̰n̄də́ adə̄ ton̄ nang tə́ tītə̄ yedə̄ yá̰á̰ kə́ yā rāań dɔ nang kadə̄ teē yá̰a̰ ō.

¹² Ī-rāā ngār gə̄ yādə́ gə̄ yá̰á̰ ń ī-rāā kə Oreb ō Jeb ō ní, ngār yādə́ gə̄ malang ní ī-rāādə́ yá̰á̰ ń ī-rāā kə Jeba ō Salmuna ō ní.

¹³ Tɔdɔ̄ nin̄ ədan̄ rī taā loo gə̄ yā Nə́ɓā.

¹⁴ Nə́ɓā yāḿ, ī-rāādə́ ādə̄ ənīn̄ gir̄gində̄, tītə̄ ngōn̄ buĺ mu kə́ nél un a dáȳ seneé beē.

¹⁵ Tītə̄ ń hor a o̰o̰ń ku kāgə̄ gə̄ ō, a o̰o̰ń mbal̄ bo gə̄ ō ní,

¹⁶ ī-ngɔ̄də̄də́ kə nél man̄ yāí kə́ əla kə ngangá ngá̰ý, ə́la ɓōĺ kemdə́ tə́ kə nél balway yāí.

¹⁷ Kɔ́ɔ̄ɓē, ə́la rɔ̄sɔl̄ dɔdə́ tə́, ādə̄ tél tūrə̄n̄ rɔ̄də́ kə̄ rɔ̄í tə́!

¹⁸ Ādə̄ ɓōĺ rāādə́ ngándáńg ō, rɔ̄də́ sɔl̄də́ ngándáńg ō, ādə̄ yá̰á̰ ń əndān̄ kemdə́ dɔ tə́ ní əngen̄ aĺ ō, ādə̄ tɔ́gə́də́ gətóo ō!

¹⁹ Ādə̄ gerə̄n̄ kadə̄ rīí na i Kɔ́ɔ̄ɓē, ādə̄ gerə̄n̄ kadə̄ i ḭ̄ ngóy kal kógə̄ḿ beē n i Nə́ɓā kə́ dɔɔ́ sa̰y ngá̰ý dɔ dɔ nang tə́ malang ní!