PĀ GƏ̄ 82 - Bibəl ta Sar̄

Nə́ɓā i nge kəndā rɔ̄n ta yá̰á̰ kə́ gōtə́ tə́ tām̄ yā de gə̄ tə́ malang

1 Pā yā Asap.

¹ Pā yā Asap. Nə́ɓā ra dɔɔ́ dan ngé kán̄ naā yān gə̄ tə́, ni-ra dan de kə́ bo kə́ dɔ rā̰ tə́ gə̄ tə́ gāngəń sarya.

² Ā ī-gāngī sarya kə gōó aĺ i bátə́ ta kaw̄ kə̄ rá? Tɔdɔ̄ sḭḭ̄ ə̄nīī najə̄ kə̄ gíŕ ngé rāā yá̰á̰ kə́ gōtə́ aĺ gə̄ tə́.

³ Majə kadə̄ ī-gāngī sarya kə gōó tām̄ yā nge tɔ́gə gətóó tə́ ō ngōn̄ hal tə́ ō. Ī-gāngī sarya yā nge rɔ̄ tō ndoō ō, nge nal̄ yá̰a̰ ō, kə gōó.

⁴ Əya̰ī nge tɔ́gə gətóo ō, nge rɔ̄ tō ndoō ō dɔɔ́. Ī-gāngī dɔdə́ jī ngé kem ndul gə̄ tə́.

⁵ Banī sḭḭ̄ ī-gerī yá̰a̰ aĺ ō, ī-gerī kum najə̄ aĺ ō, ī-ndiī i ndɔ̄ɔ́, ā ī-mámī i loo n ā ī-njə̄rāińeé ní, adə̄ gír ngəra dɔ nang malang i kə́ sóngə̄lō kɔ̄ɔ́.

⁶ M-ə́dá wáńg na sḭ́ḭ̄ i nə́ɓā gə̄, sḭḭ̄ malang i ngáń kem Nə́ɓā kə́ dɔɔ́ sa̰y ngá̰ý,

⁷ ɓá tā banī ā óyiī tītə̄ yā de gə̄, ā ī-tə́sōī tītə̄ yā ngār gə̄.

⁸ Nə́ɓā, ḭ́ḭ dɔɔ́! Ādə̄ ḭ̄ i nge gān̄g sarya kə́ dɔ nang tə́, tɔdɔ̄ nápar de gə̄ malang i yá̰a̰ yāí.