PĀ GƏ̄ 80 - Bibəl ta Sar̄

Nge ngɔ̄m̄ Israel, ī-nēl̄ mbīí ōō

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. I pā kə́ kadə̄ əgań kem deē dɔ yá̰á̰ kə́ rāā yá̰á̰ tə́. I pā yā Asap.

² Nge ngɔ̄m̄ Israel, ī-nēl̄ mbīí ōō. Ḭ̄ ń ā ɔ́r no gír deē yāí gə̄ tītə̄ loo kɔr no ɓūtə̄ yá̰a̰ kul̄ gə̄ ní, ḭ̄ ń kōr̄ kāgə̄ mbang yāí ndi i dɔɔ́ dɔ de kə́ dɔ rā̰ tə́ gə̄ tə́ ní, ɔ́jə kə̄ ndágá kadə̄ ī-ndi noó.

³ Ɔ́jə́ tɔ́gí ō, ī-reē ájə́jí ō, ta kum gír ɓē yāí gə̄ tə́, ta kum Epəraim tə́ ō Benjamḛ tə́ ō Manase tə́ ō.

⁴ Nə́ɓā, ī-tél ī-reē sejí gogə́, á̰á̰jí kə kumií kə́ majaá anī j-a j-ajə.

⁵ Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý, ā ī-rāā wōn̄g ta ndɔ̄ȳ yā gír deē yāí gə̄ tə́ i bátə́ ta kə́ ra?

⁶ Ḭ̄ ūl̄də́ kə mápá kə́ ló̰ȳ kə man̄ nōó ō, ādə̄də́ man̄ nōō adə̄ rosə yá̰a̰ nja mətá adə̄ a̰ȳn̄ ō.

⁷ Ḭ̄ ī-rāājí i yá̰a̰ kɔ̄l̄ naā yā madə̄ ɓējí gə̄ tə́ ō, madə̄ ba̰ā̰jí gə̄ rāān̄jí i kur̄ kəgō yādə́ tə́ ō.

⁸ Nə́ɓā kə́ bo kə́ tɔ́gən i ngá̰ý, ī-tél ī-reē sejí gogə́, á̰á̰jí kə kumií kə́ majaá, anī j-a j-ajə.

⁹ Kāgə̄ nduú ń ɔ̄rən Ejiptə tə́ ní, ḭ̄ ī-tə̄ɓā nápar de gə̄ kɔ̄ɔ́ ba ī-téĺ ə́hɔn rang.

¹⁰ Ḭ̄ ī-rāā loo adə̄ unjə̄ no kāgə̄ nduú ní tə́. Loo ń noō tə́ ní tə́la ngəran gə̄ ō, taā loo malang kem ɓēé ō.

¹¹ Ndílən utə̄ dɔ mbal̄ gə̄ ō, ta jīn gə̄ utə̄n̄ dɔ kāgə̄ sédər gə̄ kə́ boon̄ tɔȳ madə̄ gə̄ ō.

¹² Ni al̄ bátə́ ugə̄ bā bo tə́ ō, ta jīn kə́ tɔ̄ɔ̄ gə̄ aw̄n̄ bátə́ ugə̄n̄ bā Opəratə tə́ ō.

¹³ Ḭ̄ ī-ró̰ȳ ndogə̄ gə̄ kə́ gidə tə́ kɔ̄ɔ́, adə̄ ngé mān̄ róbó gə̄ a tə́jān̄ kanə̄n i tām̄ rí tə́?

¹⁴ Bor̄ kə́ bembeé kə́ teē kem kuú reē nujə kāgə̄ nduú ní sák sák kɔ̄ɔ́ ō, dā̰ kə́ bembeé gə̄ əsan̄ mbīn nánáḿ kɔ̄ɔ́ ō.

¹⁵ Nə́ɓā kə́ bo kə́ tɔ́gən i ngá̰ý, ī-tél ī-reē. Ī-ndi dɔɔ́ dɔ rā̰ tə́ á̰a̰ń yá̰á̰ ń a rāā yá̰á̰ ní, ba ī-reē ī-dḭḭ̄ kāgə̄ nduú ń toō.

¹⁶ Ī-ngɔ̄m̄ kāgə̄ ń īkɔ́ ə́hɔ́ ní, ngōn̄ ń toō ń i ḭ̄ n i nge kadə̄n tɔ́gə́ ní.

¹⁷ Á̰a̰ā̰ əlan̄ hor dɔn tə́ ō, tə́gānən̄ kɔ̄ɔ́ ō. Dan ń a̰a̰n̄ kadə̄ dɔ kumií nelī aĺ anī, gān̄g oyn̄ kété kɔ̄ɔ́.

¹⁸ Ə̄ndā jīí dɔ deē ń ndi dɔ jī ko̰í tə́ ní ō, dɔ ngōn̄ deē ń i ḭ̄ n i nge kadə̄n tɔ́gə́ tə́ ní ō.

¹⁹ Loo ń noō tə́, j-a j-ɔr̄ rɔ̄jí rɔ̄í tə́ to̰ alé, ā ī-tél yā rāā kadə̄ jə-ndi kə kumjí ō, j-a jə-ɓāŕ rīí ō.

²⁰ Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý, ī-tél ī-reē sejí gogə́, á̰á̰jí kə kumií kə́ majaá, anī j-a j-ajə.