PĀ GƏ̄ 8 - Bibəl ta Sar̄

Kɔsə gɔn yā Nə́ɓā ō yā deē ō

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. A dānə̄n̄ gō i kə kənde kə́ Gat.

² Kɔ́ɔ̄ɓē, kɔ́ɔ̄jí, rīí majə to ɓōĺ ngá̰ý dɔ nang tə́ malang! Dɔ rā̰ bo ɓá tā ba ḭ̄ ī-bo tɔȳn.

³ Banī ā ī-rɔ̄ɔ̄ madə̄ ba̰ā̰í gə̄ i kə ndū ngán gə̄, i kə ndū ngáń kə́ dūú ngá̰ý gə̄. Ndūdə́ ní to i tītə̄ ndogə̄ ɓē kə́ ngan̄g ngá̰ý kə́ ə̄ndā ɔ̄gəń madə̄ ba̰ā̰í kə́ ngan̄g ngá̰ý gə̄ kɔr̄ najə̄.

⁴ Dan ń m-á̰a̰ dɔ rā̰ ń i kəla kə́ ī-rāā kə jīí ní ō, nāā ō, tə́yō̰ gə̄ ō ń ī-tə́ndādə́ ní ō anī,

⁵ m-ə́da kə̄ kemḿ tə́ na: Deē i rí kə́ sáláńg á ā ī-gír̄ dɔn tə́? Deē ndul ndetə kadə̄ usiī dɔn tə́ a?

⁶ Ḭ̄ ī-rāān adə̄ əndā gō de kə́ dɔ rā̰ tə́ gə̄ tə́ ngɔr. Ḭ̄ ūtə̄ gidən kə kɔsə gɔnɔɔ́ ō kə rɔyɔ̄ɔ́ ō.

⁷ Ḭ̄ ə̄ndān dɔ yá̰a̰ gə̄ ń ī-rāā kə jīí tə́ ní. Əlá yá̰a̰ malang gír njan tə́:

⁸ Batə̄ gə̄ ō bə̄yā̰ gə̄ ō man̄g gə̄ ō dā̰ kə́ bembeé gə̄ ō

⁹ yel̄ kə́ dɔɔ́ gə̄ ō kānjə̄ kə́ maná gə̄ ō yá̰a̰ gə̄ malang ń a unən̄ gō kə̄lá róbə gə̄ kum bā bo gə̄ tə́ ní ō.

¹⁰ Kɔ́ɔ̄ɓē, kɔ́ɔ̄jí, rīí majə to ɓōĺ ngá̰ý dɔ nang tə́ malang!