PĀ GƏ̄ 79 - Bibəl ta Sar̄

Ī-rāā sejí tām̄ j-əsō adə̄ jḭḭ i gírí nang tə́ sa̰y ngá̰ý

1 Pā yā Asap.

¹ Pā yā Asap. Nə́ɓā, nápar de gə̄ taān̄ loo dɔ nang yāí tə́. Nin̄ rāān̄ adə̄ kújə́ kə́ táĺ yāí téĺ kújə́ kə́ yḛr ō, nin̄ nujən̄ ɓē kə́ Jerusalem sák sák kɔ̄ɔ́ ō.

² Nin̄ tɔ̄lə̄n̄ ngé kəla yāí gə̄ ba adə̄n̄ yel̄ kə́ dɔɔ́ gə̄ nīńdə́ adə̄ əsan̄, adə̄n̄ dā̰ kə́ bembeé gə̄ nīń deē yāí gə̄.

³ Ɓōkə́n̄ mósə́də́ nang tə́ ngá̰ý kə gō gidə ɓē kə́ Jerusalem adə̄ gīr̄ gidə, deē dubə̄ nīńdə́ alé.

⁴ Madə̄ ɓējí gə̄ tájə̄n̄jí, de gə̄ ń ndin̄ kə gō gidəjí ní əgōn̄jí ō, mbóon̄ sejí ō.

⁵ Kɔ́ɔ̄ɓē, ā ī-rāā wōn̄g kə́ dan gān̄g aĺ sejí i bátə́ ta kə́ rá? Jang yāí a o̰o̰ loo kə́ hor tə́ i bátə́ ta kə́ rá?

⁶ Ī-bə̄gā wōn̄g yāí dɔ nápar de gə̄ ń gerīn̄ aĺ tə́ ní, dɔ ɓē ko̰o̰ gə̄ ń ɓārə́n̄ rīí aĺ tə́ ní,

⁷ tɔdɔ̄ nin̄ təgān̄ yá̰a̰ yā Jakob malang, nujən̄ loo yān sák sák kɔ̄ɔ́.

⁸ Yá̰á̰ kə́ majaĺ gə̄ ń kaají gə̄ rāān̄ ní, ī-lōō kəndā najə̄n dɔjí tə́, banī ādə̄ kumií o̰o̰ī sejí, ī-reē láẃ ī-tə́nā tají, tɔdɔ̄ j-əsō adə̄ jḭḭ i gírí nang tə́ sa̰y ngá̰ý.

⁹ Nə́ɓā kə́ nge kajəjí, ī-rāā sejí ādə̄ de gə̄ tɔ̄ȳn̄neé rīí. Tām̄ yā rī ɓār̄ yāí tə́ ní, ī-gān̄g dɔjí ō, ə̄ndā njaí dɔ yá̰á̰ kə́ majaĺ gə̄ ń jə-rāā tə́ ní ō.

¹⁰ Ə́ya̰ ādə̄ nápar de gə̄ ədan̄ na Nə́ɓā yādə́ i rá i najə̄ rí tə́? Ādə̄ nápar de gə̄ gerə̄n̄ dan ń jə-rań jījí tə́ toō, kadə̄ a dalən̄ ba̰ā̰ ngé kəla yāí gə̄ ń tɔ̄lə̄n̄də́ ní.

¹¹ Ādə̄ nōō rɔ̄ yā dəngáy gə̄ aw̄ bátə́ ugə̄ rɔ̄í tə́. De gə̄ ń gān̄gə̄n̄ sarya yo dɔdə́ tə́ ní, ḭ̄ ń tɔ́gí i ngá̰ý ní, ī-ngɔ̄m̄də́ ādə̄ ndin̄ kə kumdə́.

¹² Kɔ́ɔ̄ɓē, gír de gə̄ ń ndin̄ ɓē kadəjí tə́ ní sāān̄ taí. Ādə̄ əgānī kə̄rā ndū gə̄ ń tájə̄nī ní nja sīrí.

¹³ Loo ń noō tə́ jḭḭ ń i gír deē yāí gə̄ á i yá̰a̰ kul̄ gə̄ kə́ i ḭ̄ n i nge kaw̄ sedə́ dɔ mu tə́ ní, j-a j-asə kɔsə gɔnií ngándáńg ō, ɓōkíī tɔ̄ȳ kə dɔ ɓāl̄ gə̄ ō.