PĀ GƏ̄ 78 - Bibəl ta Sar̄

Yá̰á̰ ń rāā ngán Israel gə̄ kété ní, i yá̰á̰ ndóō kə́ kadə̄ dɔ deē ndígə̄nal alé

1 Pā kə́ kəda, i pā yā Asap.

¹ Pā kə́ kəda, i pā yā Asap. Sḭḭ̄ deē yāḿ gə̄, ōōī ndū najə̄ yāḿ, ī-nēlī mbīsí ōōīneé najə̄ kə́ taḿ tə́.

² M-ā m̄-tḛḛ̄ taḿ yā kədań kūjə́ najə̄ kógə̄ḿ ō, yā kɔrə̄ń gíŕ yá̰á̰ ndóō kə́ jóo gə̄ kə̄ ndágá ō.

³ Yá̰á̰ ń j-oō ō, jə-ger̄ ō, yá̰á̰ ń kaají gə̄ ɔjən̄jí kə̄ kété kété ō ní,

⁴ j-a jə-mundə̄ ngáńjí gə̄ alé, banī rī kə́ to kɔsə gɔn gə̄ kə́ dɔ Kɔ́ɔ̄ɓē tə́ ō, tɔ́gə ō, yá̰á̰ kə́ majə kə́ to kɔr kum gə̄ ń ni-rāā ō ní, j-a j-ənī gotə kadə̄ ngán kemjí gə̄ a oōn̄.

⁵ Ni ɔjə loo rāā yá̰a̰ kə gō looneé dɔ nang yā Jakob tə́, ni-əndā ndū najə̄ Israel tə́. Ndū najə̄ ní əda kadə̄ kaají gə̄ ndóōn̄ ngáńdə́ gə̄ yá̰a̰ gə̄ ń toō,

⁶ yā kadə̄ ngé gə̄ ń a reēń gōdə́ tə́ ní ndóōn̄, nin̄ gə̄ ń a ojən̄də́ ɓáý ní: Ādə̄ ḭḭn̄ ba ɔjən̄ ngán kemdə́ gə̄ kə̄ kété,

⁷ ādə̄ ənīn̄ kemdə́ mámák adə̄n̄ Nə́ɓā. Ādə̄ dɔdə́ ndígə̄nal yá̰á̰ ń ni-rāā ní alé. Ādə̄ əndān̄ kumdə́ gíŕ gō míndən gə̄ tə́.

⁸ Ɓáa nin̄ a ton̄ tītə̄ kaadə́ gə̄ alé. Kaadə́ gə̄ i ngé dɔ ngan̄g gə̄ ō, ngé mbātə́ najə̄ gə̄ ō, ngé kem jōó gə̄ ō, ngé ra dɔ ndūdə́ tə́ kə Nə́ɓāá aĺ gə̄ ō.

⁹ Ré de kə́ gír ɓē yā Epəraim tə́ gə̄ ń i ngé kur gərā gə̄, kə́ aw̄n̄ kə yá̰a̰ rɔ̄ɔ̄ yādə́ gēé ní a̰ȳn̄ ta rɔ̄ɔ̄ tə́ anī,

¹⁰ i tɔdɔ̄ nin̄ ngɔ̄mə̄n̄ madə̄ naā yā Nə́ɓā alé, nin̄ mbātə́n̄ rāā yá̰á̰ ń ndū najə̄ yān əda ní.

¹¹ Dɔdə́ ndígə̄nal yá̰á̰ kə́ to rī ɓār̄ gə̄ ń ni-rāā ní ō, yá̰á̰ kə́ majə kə́ to kɔr kum gə̄ ń ni ɔjədə́ ní, dɔdə́ ndígə̄nal kɔ̄ɔ́ ō.

¹² Kété ní Nə́ɓā rāā yá̰á̰ kə́ to kɔr kum gə̄ ta kum kaadə́ gə̄ tə́, dɔ nang kə́ Ejiptə tə́, gō nang kə́ Soan tə́.

¹³ Ni-gān̄g bā bo naā tə́ kadə̄ nin̄ mānə̄n̄neé, rāā adə̄ man̄ ḭḭ ra dɔɔ́ ɓururu tītə̄ ndogə̄ mbal̄ beé.

¹⁴ Kadaá anī ni ɔrdə́ ta róbə kə kil̄ maná ō, ndɔ̄ɔ́ anī ɔrdə́ ta róbə kə hor kógə̄ḿ kə́ unjə̄ kow ō.

¹⁵ Ni njár̄ mbal̄ gə̄ kem dəla loo tə́, adə̄ńdə́ man̄ kə́ gíŕ nángāá adə̄ a̰ȳn̄.

¹⁶ Ni-rāā adə̄ ngán man̄ gə̄ teēn̄ kadə mbal̄ tə́ ō, adə̄ man̄ gə̄ kə́ teēn̄ tū tə́ nūgə́n̄ tītə̄ bā gə̄ ō.

¹⁷ Banī nin̄ rāān̄ majaĺ seneé ɓáý, mbātə́n̄ najə̄ ta Nə́ɓā kə́ dɔɔ́ sa̰y ngá̰ý tə́, kem dəla loo tə́ kə̄ nodə́ tə́.

¹⁸ Nin̄ gerə̄n̄ mbak ba nāān̄ Nə́ɓā, dəjenən̄ yá̰a̰ kəsa ń kemdə́ gḛy ní.

¹⁹ Nin̄ tāmə̄n̄ kə Nə́ɓāá ədan̄ na ké Nə́ɓā asə kadə̄də́ yá̰a̰ kəsa kem dəla loo tə́ wa.

²⁰ A̰á̰ā̰, ni na ənda mbal̄ adə̄ man̄ teē tū tə́ ngá̰ý rɔ̄kum, ba ké asə kadə̄ gír deē yān gə̄ mápa ō dā̰ ō kadə̄ əsan̄ wa.

²¹ Dan ń Kɔ́ɔ̄ɓē oō najə̄ ń noō ní wōn̄g rāān, wōn̄g ḭḭ seneé kə ngán Israel gēé, tītə̄ hor kə́ kadə̄ o̰o̰ deē yān gə̄ beé.

²² Tɔdɔ̄ nin̄ ənīn̄ kemdə́ adə̄n̄ Nə́ɓā aĺ ō, taān̄ kem kadə̄ ni asə kajədə́ aĺ ō.

²³ Ɓá tā ba ni-adə̄ kil̄ man̄ kə́ dɔɔ́ gə̄ ndūn, teē ta róbə gə̄ kə́ dɔ rā̰ tə́.

²⁴ Ni-rāā adə̄ mána ḭḭ dɔ rā̰ tə́ edə tītə̄ man̄ kadə̄ əsan̄, adə̄də́ mápá kə́ dɔ rā̰ tə́.

²⁵ Nin̄ kógə̄ḿ kógə̄ḿ əsan̄ mápa yā de kə́ dɔ rā̰ tə́ gə̄. Ni-əla kə yá̰a̰ kəsaá adə̄də́ adə̄ əsa ndānə̄n̄.

²⁶ Gō tə́ anī, Nə́ɓā rāā adə̄ néĺ kə́ dūn̄ ɓē tə́ əla kə tɔ́gɔ́ ō, ɔsə kə néĺ kə́ dām̄ mbɔ́r ɓē kə́ geleé tə́ adə̄ əla ō.

²⁷ Rāā adə̄ dā̰ ḭḭ dɔ rā̰ tə́ edə kə́ man̄ tə́ dɔdə́ tə́, i yel̄ gə̄ kə́ kutədə́ i ngá̰ý tītə̄ nán̄g ngárə̄ḿnjēý kə́ ta bā bo tə́ beē.

²⁸ Ni ɓōkə́də́ kem gérger yādə́ tə́, kə gō gidə kújə tandā yādə́ gēé.

²⁹ Nin̄ əsan̄ dā̰ ní ba tél əsan̄ ɓáý to̰. Kɔ́ɔ̄ɓē adə̄də́ yá̰á̰ ń kemdə́ gḛy ní.

³⁰ Əsan̄ adə̄ tɔ̄l̄ ɓōdə́ aĺ ɓáý, yá̰a̰ kəsa i ngá̰ý kə̄ tadə́ gə̄ tə́ ɓáý n

³¹ wōn̄g rāań Nə́ɓā sedə́, adə̄ tɔ̄l̄ ngé kə́ bo lútə́ lútə́ gə̄ kə́ dandə́ tə́ kɔ̄ɔ́ ní. Ni mbə́rē balsáa gə̄ kə́ Israel tə́ tə́nīdə́ nang tə́.

³² Ɓá tā ba nin̄ rāān̄ majaĺ kə̄ nodə́ tə́. Taān̄ kem yá̰á̰ kə́ majə kə́ to kɔr kum gə̄ ń Nə́ɓā rāā ní alé.

³³ Ni-rāā adə̄ ndɔ̄də́ tél i nél karī ō, ɓāl̄də́ i yá̰á̰ kə́ a əla ɓōĺ kem deē tə́ ō.

³⁴ Dan ń Nə́ɓā a tɔ̄l̄də́ anī, nin̄ sāān̄ njan. Əya̰n̄ yá̰a̰ rāādə́ gə̄ ba tūrə̄n̄ rɔ̄də́ kə̄ rɔ̄ Nə́ɓā tə́.

³⁵ Əga kemdə́ kadə̄ Nə́ɓā i mbal̄ yādə́, kadə̄ Nə́ɓā kə́ dɔɔ́ sa̰y ngá̰ý i nge rɔ̄ɔ̄ dɔdə́ tə́.

³⁶ Banī nin̄ a gól̄nən̄ i kə tadə́ karī, najə̄ ń ədanən̄ ní i najə̄ kə́ rɔ̄kum alé.

³⁷ Kemdə́ i seneé mámák alé, nin̄ tā a ran̄ dɔ ndūdə́ ń ənīn̄ adə̄nən̄ ní tə́ alé.

³⁸ Ɓá tā ba ni ń kumən o̰o̰n kə de gēé ní, lōō gír tɔ̄l̄də́ malang kɔ̄ɔ́ tə́ ba ɔr̄ majaĺ yādə́ kɔ̄ɔ́ ō, lōō gír rāā wōn̄g sedə́ tə́ nja i ngá̰ý ō, adə̄ wōn̄g rāān dɔdə́ tə́ aĺ ō,

³⁹ əga kemən dɔ tə́ kadə̄ nin̄ i de gə̄ ō, kadə̄ nin̄ i koō kə́ a teē a tél to̰ aĺ ō.

⁴⁰ Nin̄ mbātə́n̄ najə̄ tan tə́ nja i ngá̰ý kem dəla loo tə́, sāān̄ tan kem loo kə́ man̄ gətóo tū tə́ ń noō tə́!

⁴¹ Tél nāān̄ Nə́ɓā gogə́ rang ɓáý to̰, adə̄n̄ Nə́ɓā kə́ táĺ yā Israel wōn̄g.

⁴² Yá̰á̰ ń ni-rāā tām̄ yādə́ tə́ á i gān̄g dɔdə́ jī madə̄ ba̰ā̰də́ gə̄ tə́ ní, dɔdə́ ndígə̄nal kɔ̄ɔ́.

⁴³ Ni-rāā yá̰á̰ kə́ yáā gə̄ dɔ nang kə́ Ejiptə tə́, rāā yá̰á̰ kə́ to kɔr kum gə̄ gō nang kə́ Soan tə́.

⁴⁴ Ni-rāā adə̄ man̄ kə́ kem bəlo yādə́ kə́ kəja gə̄ tə́ tél mósə ō, ngán man̄ yādə́ gə̄ télən̄ mósə ō, yā kɔgə̄ńdə́ loo ka̰ȳ man̄.

⁴⁵ Əla kə kón̄g mba gēé adə̄ tṵ́ṵ̄n̄də́ ō, əla kə karā̰ gēé adə̄ taān̄ loo ō.

⁴⁶ Ni ɓōkə́ yḭm̄ gə̄ dɔ kōō yādə́ gə̄ tə́, adə̄ gaẃ gə̄ əsan̄ kum kōō ń ndɔrə̄n̄ ní.

⁴⁷ Ni nujə kāgə̄ nduú yādə́ gə̄ kɔ̄ɔ́ kə kɔ̄sɔ̄ɔ́, nujə kāgə̄ sikomor yādə́ gə̄ kɔ̄ɔ́ kə man̄ kə́ edə kə nél kə́ əla kə tɔ́gɔ́ ngá̰ý.

⁴⁸ Adə̄ man̄ kə́ edə kə kɔ̄sɔ̄ɔ́ ənda yá̰a̰ kul̄ yādə́ gə̄ ō, ni-adə̄ man̄ ndang ɓūtə̄ yá̰a̰ kul̄ yādə́ gə̄ ō.

⁴⁹ Ta tɔ̄l̄ ta anī Nə́ɓā rāā wōn̄g ngá̰ý kə de kə́ Ejiptə gēé, wōn̄g yān ń ḭḭ seneé anī a rāān i kə́ kɔ̄r̄ tə́ ní, rāān dɔdə́ tə́. Ni əya̰ ɓūtə̄ de kə́ dɔ rā̰ tə́ kə́ ngé nujə loo gə̄ adə̄ rāān̄də́ yá̰á̰ kə́ to kum kaȳ aĺ.

⁵⁰ Rāā wōn̄g kə̄ non tə́ adə̄ ajədə́ ta yo tə́ aĺ ō, əya̰də́ kə̄ jī mo̰y ngāl̄bɔ̄gīí tə́ ō.

⁵¹ Ni tɔ̄l̄ ngáń hágə́ kə́ dəngam kə́ Ejiptə tə́ gə̄ kɔ̄ɔ́ malang, nin̄ ń i tɔ́gə́də́ kə́ ta kəga dɔ kə́ kem kújə tandā yā Kam tə́ ní.

⁵² Ni-adə̄ gír deē yān gə̄ teēn̄ tītə̄ yá̰a̰ kul̄ gə̄ kə́ teēn̄ kem gɔngɔɔ́ beē, aw̄ sedə́ kem dəla loo tə́ tītə̄ batə̄ gə̄ beé.

⁵³ Ni ɔr nodə́ aw̄ sedə́ kanjə̄ kadə̄ yá̰á̰ kógə̄ḿ rāādə́ ō, nin̄ ɓōlə́n̄ aĺ ō. Ba adə̄ bā bo ɔr tan dɔ madə̄ ba̰ā̰də́ gə̄ tə́.

⁵⁴ Ni-aw̄ sedə́ dɔ nang yān kə́ táĺ tə́, dɔ mbal̄ ń ni-taā kə jī ko̰neé ní tə́.

⁵⁵ Ni-tə̄ɓā nápar de gə̄ nodə́ tə́ kɔ̄ɔ́, gán̄g dɔ nang yā de gə̄ ní naā tə́ nə̄ɓōdə́ yá̰a̰ ndəbā tə́, tə́ndā gír ɓē kə́ Israel tə́ gə̄ dɔ tə́.

⁵⁶ Nin̄ dumə̄n̄ naā, nāān̄ Nə́ɓā kə́ dɔɔ́ sa̰y ngá̰ý, mbātə́n̄ ngɔ̄m̄ ndū najə̄ yān gə̄.

⁵⁷ Télən̄ kɔ̄ɔ́ gō róbə yā Nə́ɓā tə́ ō, gólə̄n̄ loo tītə̄ yā kaadə́ gə̄ ō. Tūrə̄n̄ kumdə́ kə̄ gogə́ tītə̄ ga̰ gərā kə́ majaĺ beē.

⁵⁸ Rāān̄ loo ndɔ̄ȳ gə̄ adə̄n̄neé Kɔ́ɔ̄ɓē wōn̄g. Ɓesə̄ yādə́ gə̄ rāān̄ Kɔ́ɔ̄ɓē adə̄ jang rāān.

⁵⁹ Dan ń Nə́ɓā a̰a̰ yá̰á̰ ní anī, wōn̄g rāān ngá̰ý, adə̄ əya̰ Israel gə̄ kɔ̄ɔ́.

⁶⁰ Ni əya̰ kújə́ kə́ Silo kɔ̄ɔ́, kújə tandā ń ni udə dan de gə̄ tə́ ní.

⁶¹ Ni əya̰ sandúkə́ kə́ táĺ ń i yá̰á̰ kə́ ɔjə kadə̄ ni i de kə́ ngan̄g ō, kə́ kɔsə gɔn yān i ngá̰ý ō ní, adə̄ madə̄ ba̰ā̰n gə̄ taā aw̄n̄neé.

⁶² Ngé gə̄ ń i deē yān gə̄ ní wōn̄g rāān sedə́, ni əya̰də́ adə̄ oyn̄ yo kaskar.

⁶³ Hor o̰o̰ balsáa gə̄, deē ənī pā tɔ̄yń ngámandə gə̄ to̰ alé.

⁶⁴ Ngé tun̄ yá̰a̰ gə̄ oyn̄ yo kaskar, banī dəyá̰ kə́ ngaa koy gə̄ nōōn̄ alé.

⁶⁵ Kɔ́ɔ̄ɓē ndól̄ tītə̄ de kə́ ndól̄ dɔ ɓīī tə́ beē, tītə̄ go̰ rɔ̄ɔ̄ kə́ kasə gán̄g kumən tə́ beē.

⁶⁶ Ni ənda gō madə̄ ba̰ā̰n gə̄, əla rɔ̄sɔl̄ kə́ a to ngándáńg dɔdə́ tə́.

⁶⁷ Əja de gə̄ kə́ gír kojə yā Jəjep tə́ gə̄ kə̄ gogə́, mbātə́ gə̄rā gír ɓē yā Epəraim.

⁶⁸ Ba gə̄rā i gír ɓē yā Juda, adə̄ i mbal̄ kə́ Siyo̰ ń ni gḛy ní.

⁶⁹ Rāā loo kə́ táĺ yān adə̄ to tītə̄ ta tél mbal̄ gə̄ ō, əndā ngəran adə̄ to ngándáńg tītə̄ yā dɔ nang ō.

⁷⁰ Gə̄rā nge kəla yān Dabid, aw̄ gōn tə́ i kem gong batə̄ gə̄ tə́ n unən ní.

⁷¹ Unən i gō batə̄ yān gə̄ tə́ n reē seneé, kadə̄ tél nge kul̄ Jakob ń i gír deē yān ní, Israel ń i yá̰a̰ ndəbā yān ní.

⁷² Dabid rāā kəla yān adə̄ gír gān̄g i kə ngarā̰ kem kə́ najə̄ kə́ yā kəda dɔ tə́ gətóo ō, ɔr no gír deē yā Kɔ́ɔ̄ɓē gə̄ i kə jīn kə́ ger̄ kəlaá ō.