PĀ GƏ̄ 77 - Bibəl ta Sar̄

Yá̰a̰ tōr̄ rɔ̄ḿ, anī əga kemḿ dɔ yá̰á̰ kə́ majə gə̄ ń ī-rāā tə́ ní

¹ Pā kə́ kem makətūbə̄ yā ngār yā gōsə̄ pā gə̄ tə́. I kə gō ń Yedutun rāań ní. I pā yā Asap.

² I Nə́ɓā n m̄-ɓārə́n ō, m̄-nōō kə̄ dɔn tə́ ō ní. I Nə́ɓā n m̄-ɓārə́n ní, ni a oō ndūḿ.

³ Dan ń wur kɔl əsō dɔḿ tə́ ní, m̄-tūr̄ rɔ̄ḿ kə̄ rɔ̄ Kɔ́ɔ̄ɓē tə́. Ndɔ̄ɔ́ anī m̄-ə́la jīḿ kum kə̄ rɔ̄n tə́ kanjə̄ kɔr ta tə́, m̄-mbātə́ kadə̄ deē sɔl̄ kemḿ.

⁴ Əga kemḿ dɔ Nə́ɓā tə́ anī m̄-to̰ō̰. Dan ń m̄-gír̄ yá̰a̰ anī, tɔ́gə́ḿ ur̄ wak kɔ̄ɔ́.

⁵ Kɔ́ɔ̄ɓē, ḭ̄ ɔ̄gə̄m̄ kótə̄ kumḿ, kemḿ ndi gōtə́ alé, m̄-ger̄ najə̄ kə́ yā kəda alé.

⁶ Əga kemḿ dɔ ndɔ̄ kə́ kété gə̄ tə́, dɔ ɓāl̄ kə́ kété jóo gə̄ tə́.

⁷ Ndɔ̄ɔ́ anī əga kemḿ dɔ pā yāḿ tə́, m̄-tél m̄-gír̄ dɔ tə́ ɓáý ō, m̄-dəje rɔ̄ḿ najə̄ ō.

⁸ Kɔ́ɔ̄ɓē a mbātə́jí i kə́ njɔ́ḿ gə̄ tə́ a? A rāā kem majə sejí to̰ aĺ i kə́ bátə́ gə̄ tə́ a?

⁹ A rāā kem majə sejí to̰ aĺ i kə́ bátə́ gə̄ tə́ a? A ədají najə to̰ aĺ i kə́ njɔ́ḿ gə̄ tə́ a?

¹⁰ Dɔ Nə́ɓā ndígə̄nal ka̰a̰ kum tō ndoō yājí a? Wōn̄g rāān adə̄ kótə̄ kumən njárárá dɔjí tə́ kɔ̄ɔ́ a?

¹¹ Adə̄ m-ə́da kə̄ kemḿ tə́ na: Yá̰á̰ ń tōrə̄m̄ ní, i rāā kə́ Nə́ɓā kə́ dɔɔ́ sa̰y ngá̰ý rāā yá̰a̰ tām̄ yājí tə́ to̰ alé.

¹² Kɔ́ɔ̄ɓē, əga kemḿ dɔ yá̰á̰ ń ī-rāā kété tə́ ní. A̰á̰ā̰, yá̰á̰ kə́ to kɔr kum ń ī-rāā kété ní əga kemḿ dɔ tə́.

¹³ Téĺ əga kemḿ dɔ yá̰a̰ malang ń ī-rāā kété ní, m̄-tél m̄-reē dɔ yá̰á̰ kə́ bo gə̄ ń ī-rāā tə́ ní.

¹⁴ Nə́ɓā, i háĺ kə́ táĺ ngóy n i róbə yāí ní! Nə́ɓā kə́ rang kə́ bo kasə seí gətóo.

¹⁵ I īkɔ́ kal kógə̄ḿ beē ngóy n i nge rāā yá̰á̰ kə́ kɔr kum gə̄ ní. Ḭ̄ ɔ́jə́ gír de kə́ rang gə̄ tɔ́gí.

¹⁶ Ḭ̄ ī-gān̄g dɔ gír deē yāí gə̄ kə tɔ́gí, adə̄ i ngán Jakob gə̄ ō, ngán Jəjep gə̄ ō.

¹⁷ Nə́ɓā, dan ń man̄ gə̄ a̰a̰nī ní ndewn̄, ɓūl̄ bā kə dɔneé ndām̄ ngin ngin.

¹⁸ Kil̄ man̄ gə̄ adə̄n̄ man̄ edə ngá̰ý ō, man̄ ndang kə̄ dan kil̄ man̄ gə̄ tə́ ō, kum gərā yāí gə̄ kə́rān̄ kə̄ loo gə̄ tə́ ō.

¹⁹ Dan ń man̄ yāí ndang á kōōn ɓār̄ ní anī, man̄ gə̄ ń telə̄n̄ ní, rāān̄ adə̄ loo unjə̄ dɔ nang tə́. Dɔ nang ndebə ō, ndām̄ ngin ngin ō.

²⁰ Ḭ̄ ī-njar róbə yāí kum bā bo tə́, ī-rāā loo kə́ yā mānəń dan ɓūl̄ man̄ tə́ ō, de kə́ a̰a̰ gō tóo njaí gətóo ō.

²¹ Ḭ̄ ɔ́r deē yāí gə̄ ta róbə tītə̄ loo kɔr no ɓūtə̄ yá̰a̰ kul̄ gə̄ beé, kə ta kūl̄ Moijə ō Aaro̰ ō.