PĀ GƏ̄ 75 - Bibəl ta Sar̄

Nə́ɓā i nge gān̄g sarya

¹ Pā kə́ kem makətūbə̄ yā ngār yā gōsə̄ pā gə̄ tə́. A ənīn̄ i tītə̄ loo kənī pā: Ī-lōō kəya̰n kadə̄ nujəń. I pā yā Asap. Pā.

² Nə́ɓā, jə-ɓōkíī tɔ̄ȳ. Jə-tɔ̄ȳ rīí, tɔdɔ̄ rīí i tají tə́. J-ənī gotə yá̰á̰ kə́ to kɔr kum gə̄ ń ī-rāā ní.

³ Nə́ɓā əda na n-a n-gān̄g sarya kə gō róbəneé, ndɔ̄ ń n-a n-ɔjə̄ tə́ ní.

⁴ Dɔ nang asə ndebə kə de gə̄ malang kə́ tū tə́. I mā Nə́ɓā n m-údə bir̄ njan m-ādə̄ ra ngan̄g ní aĺ a?

⁵ M-ə́dá ngé kɔjə rɔ̄də́ gə̄ na ī-lōōī kɔjə rɔ̄sí gogə́ ō, m-ə́dá ngé mbātə́ Nə́ɓā gə̄ na ī-lōōī kɔr̄ dɔsí dɔɔ́ ō.

⁶ Ī-lōōī kɔr̄ dɔsí dɔɔ́ ngá̰ý tītə̄ ń noō. Sḭḭ̄ ngé ɓōĺ ndíl de gə̄ aĺ gə̄, ī-lōōī kɔr̄ najə̄ beé.

⁷ Yá̰á̰ ń kadə̄ ī-gerī ní n toó: Kɔsə deē kə̄ dɔɔ́ a ḭḭ i gír ɓē tə́ aláa no ɓē tə́ aláa, kem dəla loo tə́ aláa n a reē ní alé.

⁸ Tɔdɔ̄ i Nə́ɓā n i nge gān̄g sarya ní. Ni-tél kə nge kə́rēý kə̄ nang tə́ ō, tél un nge kə́ noō dɔɔ́ gogə́ ō.

⁹ Kɔ́ɔ̄ɓē əhɔ kópə kógə̄ḿ jīn tə́, ɓōkə́ kasə nduú kə́ ngan̄g ō, kə́ tām̄ ō, kemeé. Ngé mbātə́ Nə́ɓā gə̄ malang kə́ dɔ nang tə́ a a̰ȳn̄ ō, a tō̰nə́n̄ bɔrən kə́ na̰y gírí gə̄gē dɔ tə́ ō.

¹⁰ Banī mā m-ā m-ə̄nī gotə yá̰a̰ gə̄ ń noō ngándáńg. M-ā m-ə̄nī pā yā rɔȳń Nə́ɓā yā Jakob.

¹¹ M-ā m-ə́la rɔ̄sɔl̄ dɔ ngé mbātə́ Nə́ɓā gə̄ tə́ malang, banī m-ā m-ādə̄ de kə́ súmūú a ɔr̄ dɔn dɔɔ́.