PĀ GƏ̄ 74 - Bibəl ta Sar̄

Deē ɓāŕ Nə́ɓā ta kújə yā Kɔ́ɔ̄ɓē kə́ nujə sák sák kɔ̄ɔ́ tə́

1 Pā kə́ kəda, i pā yā Asap.

¹ Pā kə́ kəda, i pā yā Asap. Nə́ɓā, ī-mbātə́jí njɔ́ḿ i tām̄ rí tə́? Jḭḭ ń i ɓūtə̄ yá̰a̰ kul̄ gə̄ kə́ i ḭ̄ n i nge kul̄jí ní, wōn̄g rāāī sejí ngá̰ý i tām̄ rí tə́?

² Ādə̄ əga kemií dɔ gír deē yāí gə̄ ń télən̄ yá̰a̰ yāí gə̄ i jóó ngá̰ý tə́ ní. Ādə̄ əga kemií dɔ gír ɓē gə̄ ń i yá̰á̰ kə́ sɔɔ̄ī á ī-taā tə́ ní ō, ādə̄ əga kemií dɔ mbal̄ Siyo̰ ń ī-rāā kújə ndií dɔ tə́ ní ō.

³ Āw̄ bátə́ ūgə̄ loo kə́ nujə sák sák kə́ jóo kɔ̄ɔ́ gə̄ ń toō tə́: Madə̄ ba̰ā̰í nujə yá̰a̰ malang kə́ kem loo kə́ táĺ tə́ sák sák kɔ̄ɔ́.

⁴ I loo nəkɔ́ ń ḭ̄ ā ī-ra tū tə́ ní n madə̄ ba̰ā̰í gə̄ ran̄ tū tə́ a túrə̄n̄neé kɔĺ yādə́ gə̄ ní. Nin̄ tṵ́ṵ̄n̄ dərapóo yādə́ gə̄ tū tə́.

⁵ Nin̄ əhɔn̄ kə̄ngā yādə́ gə̄ dɔɔ́ tītə̄ ngé ra kem ku tə́ yā tə́gā kāgə̄ beé.

⁶ Nin̄ tə́gān̄ yá̰á̰ kə́ tɔ́sə̄ gə̄ kə kə̄ngāá ō, kə də́gáá ō, tə́gā tɔ̄ɔ̄n̄ yɔ́k yɔ́k kɔ̄ɔ́.

⁷ Nin̄ əlan̄ hor dɔ loo kə́ táĺ yāí tə́ tétə̄n̄ kújə ndií nang tə́ kɔ̄ɔ́ ō, rāān̄ adə̄ tél loo kə́ yḛr ō.

⁸ Nin̄ ədan̄ naā najə̄ kə́ dɔjí tə́ na: J-a j-əlaī dɔdə́ gíŕ tɔ́gə́jí tə́ ō, j-a jə-tə́laī hor dɔ loo malang kə́ kem ɓēé ń de gə̄ a əngen̄ naā kə Nə́ɓāá tū tə́ ní ō.

⁹ Yá̰a̰ gə̄ ń ɔjən̄ kə̄ ndágá kadə̄ ḭ̄ i danjí tə́ ní, j-a̰a̰də́ ngɔlaā aĺ ō. Ngé koō ta gə̄ gətóon̄ ngɔlaā ō. De kə́ danjí tə́ kə́ ger̄ ndɔ̄ ń gír yá̰a̰ gə̄ ń noō malang a gāngə̄n̄neé ní gətóo ō.

¹⁰ Nə́ɓā, madə̄ ba̰ā̰í a ndájə̄ najə̄ dɔí tə́ i bátə́ ta kə́ rá? A asən mbóo kə rīí i rə́ngáý tə́?

¹¹ Ī-tél kə jīí kə̄ rɔ̄í tə́ kɔ̄ɔ́ i tām̄ rí tə́? Ī-tél kə jī ko̰í ə́hɔ kadií tə́ i tām̄ rí tə́?

¹² Nə́ɓā i mban̄g yāḿ kə́ ta kəla gíŕ tə́ jóó ngá̰ý. Tetə rɔ̄ɔ̄ gə̄ kem ɓēé ní i ḭ̄ n i kɔ́ɔ̄n.

¹³ Adə̄ ī-gān̄g bā naā tə́ kə ta kūl̄ tɔ́gí. Dā̰ man̄ kə́ bo ngá̰ý kə́ kum bā bo tə́ ń dɔn gə̄ i ngá̰ý ní, ḭ̄ ī-rējə̄ dɔn gə̄ ní.

¹⁴ Lebiatan ń i dā̰ man̄ kə́ bo ngá̰ý kə́ dɔn gə̄ i ngá̰ý ní, ḭ̄ ī-tɔ̄ɔ̄ dɔn gə̄ ní yɔ́k yɔ́k kɔ̄ɔ́, ba únən ādə̄ tal̄ gə̄ kadə̄ əsan̄.

¹⁵ I ḭ̄ n ī-rāā ta róbə ādə̄ man̄ gə̄ əɓan̄neé ō, ādə̄ ngán man̄ gə̄ nūgə́n̄neé ō ní. I ḭ̄ n ī-rāā ādə̄ man̄ bā kə́ dum̄ kiī gə̄ iīn̄ kɔ̄ɔ́, adə̄ loo tél tutə káḿ káḿ kem kār̄də́ gə̄ tə́ ní.

¹⁶ Ḭ̄ ń ī-rāā mbang ō nāā ō ní, loo kə́ kadaá i yāí ō, loo kə́ ndɔ̄ɔ́ i yāí ō.

¹⁷ Ḭ̄ ɔ́jə dɔ nin̄ loo gə̄ malang kə́ dɔ nang tə́. I ḭ̄ n ī-rāā ɓāl̄ ō ɓar ō ní!

¹⁸ Kɔ́ɔ̄ɓē, ādə̄ əga kemií dɔ yá̰á̰ ń toō tə́: Madə̄ ba̰ā̰í ndájə̄ najə̄ dɔí tə́. De kə́ sapə gə̄ ń toō mbóon̄ seí.

¹⁹ Ī-lōō kəla míndə́ dér ndaa yāí ń i gír deē yāí gə̄ ní kə̄ ta dā̰ kə́ do̰ gə̄ tə́, deē yāí gə̄ ń ndin̄ kum yá̰á̰ kə́ tōr̄ tə́ ní, ī-lōō kadə̄ dɔí ndígə̄naldə́ kə̄ noí tə́.

²⁰ Ādə̄ əga kemií dɔ madə̄ naā yāí tə́: De gə̄ kánə̄n̄ naā kə̄ dɔ naā tə́ loo ɓɔ̄ɔ̄ rɔ̄ gə̄ kə́ kem ɓēé tə́, ɓē tél i loo kə́ yā rāań yá̰a̰ kə dɔ́nɔ́.

²¹ Deē ń rāān̄ kumən ndoō tə́ ní, ādə̄ əlan̄ rɔ̄sɔl̄ dɔn tə́ to̰ alé! Ādə̄ de kə́ ndoō ō, nge rɔ̄ tō ndoō ō, tɔ̄ȳn̄ rīí!

²² Nə́ɓā, ḭ́ḭ dɔɔ́! Ī-rɔ̄ɔ̄ dɔ rɔ̄í tə́! Ādə̄ əga kemií dɔ ndū ń sapə gə̄ ń noō a tájə̄nī ngándáńg tə́ ní.

²³ Kɔĺ ń madə̄ ba̰ā̰í gə̄ a túrə̄n̄ ní, ī-lōō kadə̄ dɔí ndígə̄nal. Bəlá ngé kənīí rɔ̄ɔ̄ gə̄ ń a ɓār̄ biw biw ní, ī-lōō kadə̄ dɔí ndígə̄nal.