PĀ GƏ̄ 73 - Bibəl ta Sar̄

Makətūbə̄ Pā gə̄ kə́ nge ko̰ mətá (Pā gə̄ 73—89 ) Dan ń yá̰a̰ malang to tītə̄ kə́ a majə tām̄ yā ngé kem majaĺ gə̄ tə́ ní

1 Pā yā Asap.

¹ Pā yā Asap. Nə́ɓā i de kə́ majə tām̄ yā Israel tə́ rɔ̄kum. Ni i de kə́ majə tām̄ yā de gə̄ ń kemdə́ unjə̄ njáý njáý tə́ ní.

² Ɓá tā ba na̰y i sḛ́ý anī njaḿ əhɔ dɔ nang alé, nə́ngētə́ gēé ngōn̄ yá̰á̰ kə́rēý sḛ́ý ɔdəm̄ anī m-ə̄sō kɔ̄ɔ́.

³ Tɔdɔ̄ m-ə̄ndā ngé kənda gɔgərɔdə́ gə̄ nii, dan ń m-á̰a̰ kadə̄ yá̰a̰ malang ń ngé kem ndul gə̄ rāān̄ ní teēdə́ yá̰á̰ tə́ ní.

⁴ Yá̰a̰ tōr̄ rɔ̄də́ nja kógə̄ḿ alé. nin̄ boon̄ ngá̰ý ō, yibə̄də́ i ngá̰ý ō.

⁵ Madə̄də́ gə̄ a̰a̰n̄ tápə̄ banī nin̄ a̰a̰n̄ tápə̄ alé. Yá̰á̰ kə́ tōr̄ ń a rāā de gə̄ ní rāādə́ nin̄ alé.

⁶ Yá̰á̰ súū rɔ̄ yādə́ i kɔjə rɔ̄. Yá̰á̰ kə́ rāā kə dɔ́nɔ́ əhɔdə́ ngá̰ý, tītə̄ kūbə̄ kə́ asə rɔ̄də́ rep beé.

⁷ Nin̄ ndin̄ dan yá̰a̰ yādə́ kə́ majə ngá̰ý gə̄ tə́, bā rāān̄neé madə̄də́ gə̄ yá̰a̰ aĺ tə́. Yá̰a̰ gə̄ ń kemdə́ gḛy ní to i kə̄ dɔ ndágá.

⁸ Nin̄-əgōn̄ naā njik njik ō, nómə̄n̄ rāā kum de gə̄ ndoō tə́ ō, ɔjən̄ rɔ̄də́ ngá̰ý kem najə̄ kɔr̄də́ tə́ ō.

⁹ Nin̄ tə́dan̄ najə̄ dɔ yá̰a̰ gə̄ tə́ bátə́ gān̄g dɔ rā̰ tə́ ō, əya̰n̄ yá̰á̰ kógə̄ḿ kə́ dɔ nang tə́ karī aĺ ō.

¹⁰ Adə̄ gír deē yā Nə́ɓā gə̄ tūrə̄n̄ rɔ̄də́ kə̄ dām̄ ń toō tə́, kə̄ dām̄ loo ń adə̄n̄də́ man̄ ngá̰ý tū tə́ ní tə́.

¹¹ Nin̄ ədan̄ na Nə́ɓā na asə ka̰ā̰ alé, Nə́ɓā kə́ dɔɔ́ sa̰y ngá̰ý ní ké a ger̄ yá̰a̰ i ba̰ý wa.

¹² Ngé rāā yá̰a̰ gōtə́ aĺ gə̄ ní á̰a̰īdə́, nin̄ ndin̄ majə kə dɔ ndɔ̄ gə̄ ō, rāān̄ adə̄ yá̰a̰ kənge yādə́ reē kə̄ dɔ madə̄ tə́ ō.

¹³ Kə́ rɔ̄kum tə́ ní, m̄-ngɔ̄m̄ ngarā̰ kemḿ adə̄ unjə̄ njáý njáý i ndán̄g ō, m̄-tə́go jīḿ m-ɔ́jəń kadə̄ najə gətóo dɔḿ tə́ i ndán̄g ō.

¹⁴ M-á̰á̰ tápə̄ kə dɔ ndɔ̄ gə̄ ō, dəloí anī m-ə́nge i ndéy ō.

¹⁵ Ré m-ə́da na kə m̄-rāā tītə̄ yādə́ anī, m̄-rāā i yá̰á̰ kə́ gōtə́ aĺ kə gír kaa ngání gēé.

¹⁶ Yá̰á̰ ń m-á̰a̰ā̰ anī tōrə̄m̄ ngá̰ý ní, m̄-gír̄ dɔ tə́,

¹⁷ bátə́ ndɔ̄ ń m-údəń kem loo kə́ táĺ yā Nə́ɓā tə́ ní, i ndɔ̄ ń noō tə́ n m̄-ger̄ kum yá̰á̰ ń to a ngóōdə́ ní.

¹⁸ Kə́ rɔ̄kum tə́ tā anī, ḭ̄ ə̄ndādə́ i loo kə́ a ndəte sedə́ tə́, yā mbəredə́ kadə̄ əsō nujən̄ sák sák kɔ̄ɔ́.

¹⁹ Nin̄ nujən̄ sák sák i láẃ ngá̰ý! I nin̄ n gír yādə́ gān̄g kɔ̄ɔ́ ɓá toō, ɓōĺ kə́ ngá̰ý tɔ̄l̄də́ malang kɔ̄ɔ́.

²⁰ Kɔ́ɔ̄ɓē, dan ń ḭ̄ údə danaá ní, nin̄ télən̄ i yá̰á̰ kə́ karī kɔ̄ɔ́, tītə̄ ndíĺ yá̰a̰ gə̄ kə́ kem nī tə́ ń deē ndól̄ dɔ ɓīī tə́ anī, télən̄ i yá̰á̰ kə́ karī kɔ̄ɔ́ ní.

²¹ Kété dan ń wurəḿ atə̄m̄ kárárá ō, najə̄ tōr̄ kemḿ ngá̰ý ō ní,

²² m̄-mbó ngá̰ý, m̄-ger̄ kum yá̰a̰ alé, m̄-to i tītə̄ dā̰ beé, ɓá tā ba mā i naā tə́ seí.

²³ Tɔdɔ̄ mā i seí ngándáńg, ḭ̄ ə́hɔ ta jīḿ kə́ ko̰ó̰.

²⁴ Ḭ̄ ɔ́r noḿ kə gō yá̰á̰ ń ḭ̄ ī-nóm̄ ní, gō tə́ anī ā únəm̄ dan kɔsə gɔn yāí tə́.

²⁵ Dan ń mā i seí anī, loo kə́ dɔ nang tə́ nelə̄m̄ aĺ ní, i náā kə́ rang yāḿ n m-ā m-ə́ngən dɔ rā̰ tə́ ní? I ḭ̄ ngóy aĺ a?

²⁶ m̄-ndəlē ō, dan wurəḿ ɔr ō, banī nge rāā seḿ ō, yá̰a̰ halaḿ ō, i ḭ̄ Nə́ɓā ta kaw̄ kə̄ jóo.

²⁷ Deē ń ɔr̄ rɔ̄n rɔ̄í tə́ kɔ̄ɔ́ ní a oy ō, ā ī-nujə kə deē ń əya̰ī kɔ̄ɔ́ ba aw̄ rāā rāȳ ní ō.

²⁸ Banī ndi majə yāḿ mā i ndi ngɔr rɔ̄ Nə́ɓā tə́. m̄-ɓɔ̄ɔ̄ rɔ̄ḿ i rɔ̄ Kɔ́ɔ̄ɓē Nə́ɓā tə́, kadə̄ m-ɔ́jəń kəla rāāí gə̄ malang.