PĀ GƏ̄ 72 - Bibəl ta Sar̄

Ndɔ̄ȳ kə́ tām̄ yā kadə̄ Nə́ɓā rāań majə kə mbangāá

1 Pā yā Salomo̰.

¹ Pā yā Salomo̰. Nə́ɓā, ī-rāā ādə̄ sarya gān̄g mban̄g to tītə̄ yāí. Ādə̄ ngōn̄ kem mban̄g ń toō háĺ kə́ gōtə́ yāí.

² Ādə̄ o̰o̰ ɓē dɔ gír deē yāí gə̄ tə́ kə háĺ kə́ gōtə́ ō, dɔ ngé ndoō yāí gə̄ tə́ kə háĺ kə́ súmūú ō.

³ Ādə̄ mbal̄ bo gə̄ ō, ngán mbal̄ gə̄ ō, adə̄n̄ de gə̄ yá̰a̰ kənge kə ta kūl̄ yá̰a̰ rāā kə́ gōtə́!

⁴ Ngé ndoō gə̄ kə́ dan gír de gə̄ tə́ ní, ādə̄ mban̄g gān̄g sarya yādə́ kə gōó. Ādə̄ ni i nge kajə ngé ndoō gə̄ ō, nge rējə̄ ngé bám̄də́ gə̄ ō!

⁵ Dan ń mbang a ɔsəń ɓáý ō, nāā ndaań ɓáý ō ní, ādə̄ de gə̄ ń ɔsən̄ gō naā dɔ nang tə́ ní ɓōlə́n̄ ndílí bátə́ ta ngóy ndɔ̄ gə̄ tə́.

⁶ Ādə̄ ni risə tītə̄ man̄ kə́ a edə kə̄ dɔ mu kə́ tél sitə gogə́ tə́, tītə̄ man̄ kə́ edə ba rāā adə̄ dɔ nang sɔl̄ beé!

⁷ Ɓāl̄ ko̰o̰ ɓē yān tə́ ní ādə̄ de kə́ súmūú tḭ̄ḭ̄ rɔ̄n ndiń ō, yá̰a̰ kənge i ngá̰ý ō, bátə́ kadə̄ nāā teēń aĺ kə́ njɔ́ḿ gə̄ tə́.

⁸ Ādə̄ loo ń ni-o̰o̰ ɓē dɔ tə́ ní ḭḭ bā bo kə́rēý tə́ bátə́ bā bo kə́ rang tə́ ō, ḭḭ bā Opəratə tə́ bátə́ ta ngóy dɔ nang tə́ ō!

⁹ Ngé ndi kem dəla loo tə́ gə̄ a ɔsən̄ nodə́ nang tə́ non tə́, madə̄ ba̰ā̰n gə̄ a əsan̄ nán̄g.

¹⁰ Mban̄g gə̄ kə́ Tarsis ō, kə́ dor̄ kə́ sa̰y gə̄ tə́ ō, a əlan̄ kə kadə̄ karī gēé yā kadə̄n. Mban̄g gə̄ kə́ Saba ō, kə́ Seba ō, a tīrə̄n̄ dɔ yá̰a̰ yā kadə̄n.

¹¹ Mban̄g gə̄ malang a ɔsən̄ nodə́ nang tə́ non tə́. Nápar de gə̄ malang a rāān̄ kəla yān.

¹² Ni a gān̄g dɔ de kə́ nge rɔ̄ tō ndoō ń a ɓāŕ yá̰á̰ ní ō, dɔ de kə́ ndoō ń de kə́ nge rāā seneé gətóó ní ō.

¹³ Kumən a o̰o̰n tām̄ yā nge ndoō tə́ ō, de kə́ tɔ́gən gətóó tə́ ō. Ni a ajə ngé ndoō gə̄.

¹⁴ Ni a rɔ̄ɔ̄ dɔdə́ tə́ yā kadə̄ yá̰á̰ kə́ majaĺ rāādə́ aĺ ō, yá̰á̰ kə́ rāā kə dɔ́nɔ́ rāādə́ aĺ ō, tɔdɔ̄ ndi kə kumuú yādə́ gātə̄n i ngá̰ý ta kumən tə́.

¹⁵ Ādə̄ dɔn ngan̄g májə́ májə́! A adə̄nən̄ lɔ́ŕ kə́ Saba ō, a ndɔ̄ȳn̄ ngándáńg tām̄ yān tə́ ō, a dəjen̄ kə dɔ ndɔ̄ gə̄ kadə̄ Nə́ɓā rāā majə seneé ō.

¹⁶ Ādə̄ ndɔr̄ taā loo kem ɓēé, bátə́ ta kaw̄ kə̄ ta tél mbal̄ gə̄ tə́ dɔɔ́. Ādə̄ dɔ kōō kə́ tū tə́ gə̄ yéȳn̄ tītə̄ kāgə̄ gə̄ kə́ Liban beé. Ādə̄ ré deē ra kem ɓēé anī, loo i mbī kámbə́ kə́ mbōl̄ malang.

¹⁷ ādə̄ ni-rāā adə̄ rīn to ngándáńg, ādə̄ rāā adə̄ rīn ní ɓār̄ ta kaw̄ kə̄ jóo, dɔ nang ń mbang a ɔsə tū tə́ ní tə́. Kadə̄ de gə̄ ədan̄ najə̄ yān tɔ́rə̄n̄neé tadə́ dɔ naā tə́ ō, kadə̄ nápar de gə̄ malang ədan̄ na mban̄g ndi kə rɔ̄nelēé ō.

¹⁸ Ādə̄ ɓōkə́n̄ Kɔ́ɔ̄ɓē Nə́ɓā yā Israel tɔ̄ȳ! I nəkɔ́ ngóy n i nge rāā yá̰á̰ kə́ kɔr kum gə̄ ní.

¹⁹ ādə̄ tɔ̄ȳn̄ Nə́ɓā kə́ nge rī ɓār̄ ngándáńg! ādə̄ kɔsə gɔn yān taā loo malang dɔ nang tə́! Adə̄ i tītə̄ ń noō, adə̄ i tītə̄ ń noō!

²⁰ Gír ndɔ̄ȳ gə̄ yā Dabid ngōn̄ Jese gān̄g.