PĀ GƏ̄ 71 - Bibəl ta Sar̄

m̄-tɔgə ɓə́ga kɔ̄ɔ́ ɓá tā ba, ī-lōō kəya̰m̄

¹ Kɔ́ɔ̄ɓē, m̄-rāāī i loo ɓɔ̄ɔ̄ rɔ̄ yāḿ tə́. Ādə̄ m-ə́nge rɔ̄sɔl̄ gogə́ to̰ aĺ bátə́!

² Ā ī-gān̄g dɔḿ, ā ī-taām̄ jī de gə̄ tə́, sɔɔ̄ń hál kə́ gōtə́ yāí. Ī-nēl̄ mbīí kə̄ kōōḿ tə́, ájəm̄.

³ Ādə̄ ḭ̄ i mbal̄ ń m-ā m̄-déw gidə tə́ kadə̄ yá̰a̰ ɔdə rɔ̄ḿ aĺ ní, mbal̄ ń m-ásə kaw̄ tū tə́ kə kum mbang gə̄ malang ní. Ḭ̄ ī-gḛy kajəm̄. A̰á̰ā̰, ḭ̄ i mbal̄ yāḿ, ɓē kə́ ngan̄g ngá̰ý yāḿ.

⁴ Nə́ɓā yāḿ, ī-taām̄ jī nge kem ndul tə́, ī-taām̄ jī ngé rāā yá̰a̰ gōtə́ aĺ ngá̰ý gə̄ tə́, jī ngé dɔ́nɔ gə̄ tə́.

⁵ Kɔ́ɔ̄ɓē Nə́ɓā, m-ə̄ndā kemḿ i dɔí ḭ̄ tə́. M-ə́lá gír kənī kemḿ kadī i kə ngōn̄ dūúḿ.

⁶ M-ə́lá gír ndə̄nā rɔ̄ḿ rɔ̄í tə́ i dan ń m̄-teēń kem kó̰ó̰ḿ tə́ ní. I ḭ̄ n ɔ̄rə̄m̄ kem kó̰ó̰ḿ tə́ ī-teē seḿ ndágá ní, i ḭ̄ n m-ā m̄-ɓōkíī tɔ̄ȳ kanjə̄ kɔr ta tə́ ní.

⁷ De gə̄ ngá̰ý rāāmə̄n̄ i de kə́ ḭ̄ ī-ndɔ̄lə́n kɔ̄ɔ́ tə́, banī nge ngɔ̄mə̄ḿ kə́ rɔ̄kum i ḭ̄.

⁸ Taḿ ɓōkíī tɔ̄ȳ ō, m-ɔ́sə gɔnií ō, kə dɔ ndɔ̄ gə̄.

⁹ Dan ń m̄-tɔgə ɓə́ga kɔ̄ɔ́ toō ī-lōō mbātə́m̄, ī-lōō kəya̰m̄ kɔ̄ɔ́ dan ń tɔ́gə́ḿ gətóó ní.

¹⁰ Tɔdɔ̄ madə̄ ba̰ā̰ḿ gə̄ ɔrə̄n̄ najə̄ yāḿ, ngé kumə̄ḿ gə̄ oōn̄ naā dɔḿ tə́.

¹¹ Nin̄ ədan̄ na: Nə́ɓā əya̰n kɔ̄ɔ́, ādə̄ njasí ra gōn tə́, ə́hɔniī. De kə́ yā taān jīsí tə́ gətóo!

¹² Nə́ɓā, ī-lōō ra sa̰y rɔ̄ḿ tə́, Nə́ɓā yāḿ, ī-reē láẃ ī-dḭḭ̄m̄!

¹³ Ngé gə̄ ń sāān̄ tɔ̄lə̄m̄ ní, ādə̄ rɔ̄də́ sɔl̄də́ ō, yá̰á̰ kə́ majaĺ teē dɔdə́ tə́ ō! ngé gə̄ ń sāān̄ kadə̄ yá̰á̰ kə́ majaĺ teē dɔḿ tə́ ní, ādə̄ kídə̄n̄də́ ō əlan̄ rɔ̄sɔl̄ dɔdə́ tə́ ō!

¹⁴ Mā m-ə̄ndā kemḿ dɔí tə́ ngándáńg ō, m-ā m̄-na̰y kə̄ loo kənī pā tə́ yā ɓōkíīneé tɔ̄ȳ ō.

¹⁵ Kə ndɔ̄í bátə́ kadə̄ loo tíbəń ní, m-ɔ̄r̄ i najə̄ háĺ kə́ gōtə́ yāí ō, m-ɔ́jə i loo kajə ń ájə deē ní ō, tām̄ kem majə ń ī-rāā ní deē asə tə́da kutən təgā alé.

¹⁶ Kɔ́ɔ̄ɓē Nə́ɓā, m-ā m-údə ɓēé looí i kə ta kūl̄ dḭḭ̄ ń ī-dḭḭ̄m̄ ní ō, i háĺ kə́ gōtə́ yāí ngóy n m-ā m-ɔ̄r̄ najə̄n ní ō.

¹⁷ Nə́ɓā, ə́lá gír kɔjəm̄ yá̰a̰ i kə ngōn̄ dūúḿ ō, m-ə̄nī mbēr̄ dɔ yá̰a̰ rāāí kə́ majə ngá̰ý gə̄ tə́ bátə́ ɓōólaā ō.

¹⁸ Ngɔlaā ń dɔḿ ndaa toō ní, Nə́ɓā, ī-lōō kəya̰m̄ kɔ̄ɔ́. Loo ń noō tə́ m-ā m-ásə kɔjə balsáa gə̄ ō, ngé gə̄ ń a utə̄n̄ gōdə́ ní ō, kəla rāāí gə̄ ō tɔ́gí ō.

¹⁹ Nə́ɓā, háĺ kə́ gōtə́ yāí ngāl̄ ngá̰ý kə̄ dɔɔ́ ō, ī-rāā yá̰á̰ kə́ bo ngá̰ý gə̄ ō! Nə́ɓā, de kə́ to tītīí gətóo.

²⁰ Ḭ̄ ī-rāā ādə̄ wur kɔl əsō dɔḿ tə́ ō, yá̰á̰ kə́ to kum kaȳ aĺ gə̄ teēn̄ dɔḿ tə́ ō. Banī ā ī-reē yā rāām̄ kadə̄ m-ā m̄-ndi kə kumḿ gogə́. Ā ī-reē yā teē seḿ kɔ̄ɔ́ ɓádá, kem bəlo kə́ lú ngá̰ý tə́.

²¹ Ā ī-tél yā sɔl̄ kemḿ ō, ā ī-rāā kadə̄ a tél rɔȳmə̄n̄ ō.

²² Loo ń noō tə́ m-ā m̄-ɓōkíī tɔ̄ȳ kə kəndeé. Nə́ɓā yāḿ, m-ā m-ə̄nī pā seí najə̄ ra kə̄ ī-ra dɔ ndūí tə́. M-ā m-úgə kənde yā kɔsəń gɔnií, ḭ̄ Nə́ɓā kə́ táĺ yā Israel.

²³ M-ā m-úgə kənde yā kɔsəń gɔnií, taḿ a ənī pā kə rɔ̄nelēé, tɔdɔ̄ ī-gān̄g dɔḿ.

²⁴ M-ā m-ɔ́sə gɔn háĺ kə́ gōtə́ yāí kə dɔ ndɔ̄ gə̄, tɔdɔ̄ ngé gə̄ ń sāān̄ kadə̄ yá̰á̰ kə́ to kum kaȳ aĺ teē dɔḿ tə́ ní, rɔ̄də́ sɔl̄də́ ō, əlan̄ rɔ̄sɔl̄ dɔdə́ tə́ ō.