PĀ GƏ̄ 7 - Bibəl ta Sar̄

Kɔ́ɔ̄ɓē, ī-gān̄g sarya yāḿ

¹ Pā nōō rɔ̄ yā Dabid. Ni-ənī pā ní i kə Kus kə́ Benjamḛ n adə̄ Kɔ́ɔ̄ɓē ní.

² Kɔ́ɔ̄ɓē, Nə́ɓā yāḿ, m̄-namī. Ájəm̄, ī-taām̄ jī ngé rāā kumḿ ndoō tə́ gə̄ tə́ malang.

³ Ré i beé aĺ anī a rə́yā̰mə̄n̄ naā tə́ tītə̄ ɓɔl gə̄ kanjə̄ kadə̄ deē taām̄ jīdə́ tə́.

⁴ Kɔ́ɔ̄ɓē, Nə́ɓā yāḿ, ré m̄-rāā yá̰á̰ ń ədan̄ ní, ré jīḿ rāā yá̰á̰ kə́rēý kə́ gōtə́ aĺ,

⁵ ré deē ń rāām̄ kə́ majaĺ ní m̄-rāān kə́ majaĺ kum gotə, ré deē ń gír̄ kə́ majaĺ i kemən tə́ seḿ kanjə̄ kumən ní m̄-taā yá̰a̰ yān,

⁶ anī ādə̄ madə̄ ba̰ā̰ḿ ngɔ̄də̄ əhɔm̄ ō, ənīm̄ nang tə́ kum bumbə́ru tə́ ba tə́ɓām̄ kə njaneé ō, əlań rɔ̄sɔl̄ dɔḿ tə́.

⁷ Kɔ́ɔ̄ɓē, ḭ́ḭ dɔɔ́ kə wōngōó! Ngé rɔ̄ḿ gə̄ ń wōn̄g rāādə́ ngá̰ý ní ī-ta̰də́ rɔ̄. Ḭ̄ nge kəda yá̰á̰ kə́ gōtə́, ī-ra já̰já̰ kadəḿ tə́!

⁸ Gír de gə̄ kánə̄n̄ naā gīrə̄n̄ gidií, ī-tél āw̄ ī-ndi gotií tə́ dɔɔ́ dɔdə́ tə́!

⁹ Kɔ́ɔ̄ɓē, nge gān̄g sarya yā nápar de gə̄, ī-gān̄g sarya yāḿ sɔɔ̄ń yá̰a̰ rāāḿ kə́ gōtə́ ō, najə̄ kə́ gətóo dɔḿ tə́ ō!

¹⁰ Ī-ɗogə́rō ta kəla yā ngé kem ndul gə̄! Ī-mbūsə̄ de kə́ súmūú adə̄ ra ngan̄g! Tɔdɔ̄ nge ger̄ gír̄ kə́ kem deē tə́ i Nə́ɓā kə́ súmūú.

¹¹ Der yāḿ kə́ nge taā dɔḿ i Nə́ɓā kə́ nge kajə de gə̄ ń kemdə́ i súmūú ní.

¹² Nə́ɓā i nge gān̄g sarya kə́ gōtə́. Ni i nge rāā ngan̄g ngá̰ý kə de gēé kə ndɔ̄ gə̄.

¹³ Ré nge kem ndul əya̰ gír majaĺ yān aĺ anī, Nə́ɓā a ɔl̄ kum kaskar yān kadə̄ atə ō, a əndā gərā tū kəlā ga̰ gərā tə́ ō, a ɔr gō ō, a serən ō.

¹⁴ Yá̰a̰ rɔ̄ɔ̄ gə̄ kə́ yā tɔ̄ləń deē ní ni-əndā dɔ jīn, Ni-əndā hor ta kum gərā yān gə̄ tə́ yā kə róoń loo.

¹⁵ Deē ń a gír̄ i yá̰á̰ kə́ majaĺ ō, a núm̄ i rāā yá̰á̰ kə́ gōtə́ aĺ ō ní, a ojə i najə̄ kə́ rɔ̄kum alé.

¹⁶ Ni əga dɔ mbḛ̄ kə jīneé, ndēr̄ adə̄ lú ba nəkɔ́ a tél yā kəsō kemeé.

¹⁷ Yá̰á̰ kə́ majaĺ ń sāā rāā ní tetə ənda i dɔn nəkɔ́. Yá̰á̰ ń ni sāā rāā kə dɔ́nɔ́ ní tél əsō i kār̄ dɔn nəkɔ́ tə́.

¹⁸ M-ā m̄-ndadə̄ Kɔ́ɔ̄ɓē tām̄ háĺ kə́ gōtə́ yān tə́ ō, m-ā m̄-tɔ̄ȳ rī Kɔ́ɔ̄ɓē Nə́ɓā kə́ dɔɔ́ sa̰y ngá̰ý ō.