PĀ GƏ̄ 68 - Bibəl ta Sar̄

Pā kə́ yā kɔsəń gɔn Nə́ɓā kə́ nge tetə rɔ̄ɔ̄

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. Pā.

² Nə́ɓā ḭḭ dɔɔ́ anī madə̄ ba̰ā̰n gə̄ tḭ̄ḭ̄n̄ naā kə̄ loo gə̄ tə́ ō, madə̄ kɔ̄lən gə̄ a̰ȳn̄ naā kɔ̄ɔ́ non tə́ ō.

³ Ḭ̄ ī-tə̄ndā ī-tḭ̄ḭ̄də́ kɔ̄ɔ́ tītə̄ sa hor kə́ tḭ̄ḭ̄ kɔ̄ɔ́ beē. De kə́ sew aĺ gə̄ oyn̄ ta kum Nə́ɓā tə́, tītə̄ tībə̄ tejə bəya̰ kə́ yḛḛ̄ horoó beē.

⁴ Banī de kə́ súmūú gə̄ rāān̄ rɔ̄nel̄, tḭ́ḭ̄n̄ bal walya ta kum Nə́ɓā tə́. Nin̄ ndāmə̄n̄ ndām̄ rɔ̄nel̄.

⁵ Ə̄nīī pā ɔ́siīneé gɔn Nə́ɓā, ī-tɔ̄yī rīn, ī-tɔ̄yī nge kal̄ kil̄ man̄ gə̄ sə́ndá tə́, rīn na i Kɔ́ɔ̄ɓē, ī-tḭ́ḭ̄ī bal walya ta kumən tə́.

⁶ Háĺ Nə́ɓā kə́ kem kújə́ kə́ táĺ yān tə́ n toó: Ni i bɔbə̄ ngán hal gə̄ ō, nge ka̰a̰ gō ngé ngaa koy gə̄ ō.

⁷ De gə̄ ń ndin̄ kə kéŕdə́ ní, Nə́ɓā adə̄də́ gír kojə ō, ni-gān̄g dɔ de gə̄ ń rɔ̄ gān̄gdə́ ní adə̄ əngen̄ rɔ̄nel̄ ō. Banī ngé mbātə́ najə̄ gə̄ ndin̄ i loo kə́ tutə ká káḿ tə́.

^8-9 Nə́ɓā, Nə́ɓā kə́ Sinai, Nə́ɓā yā Israel, dan ń ī-teē ī-njə̄rā kété no gír deē yāí gə̄ tə́ ní, dan ń ī-njə̄rā kem dəla loo tə́ ní, dɔ nang ndebə ō, dɔ rā̰ tetə man̄ adə̄ də̄yā̰ kété noí tə́ ō.

¹⁰ Nə́ɓā, ḭ̄ ī-rāā adə̄ man̄ kə́ ngá̰ý edə. Dɔ nang yāí ɔr, banī ḭ̄ ī-tél ādə̄n tɔ́gə gogə́ rang.

¹¹ Loo yāí ń nin̄ ndin̄ tū tə́ ní, i ḭ̄ Nə́ɓā kə́ nge kem majə n ī-ngɔ̄m̄ tām̄ yā de kə́ nge rɔ̄ to ndoō tə́ ní.

¹² Kɔ́ɔ̄ɓē əda najə̄ tan kógə̄ḿ, anī dəyá̰ kə́ ngé kəla yān gə̄ teēn̄ láẃ tītə̄ kósə́ áskar gə̄ beé.

¹³ Mban̄g gə̄ ō ngé rɔ̄ɔ̄ gə̄ ō a̰ȳn̄ naā. Nin̄ a̰ȳn̄ naā ō, dəyá̰ gə̄ ń ndin̄ kem kújú ní, nə̄ɓōn̄ yá̰a̰ kənge kə́ kɔy ta rɔ̄ɔ̄ tə́ gə̄ ō.

¹⁴ Ba sḭḭ̄ ī-gə̄rāī i to gətóo kem gérgereé a? Əndān̄ gində̄ arjā̰a̰ kə́ laa mbé mbé tū bɔ̄gə̄ dér dum tə́ ō, lɔ́ŕ kə́ tetə ndaa tū belə̄n gə̄ tə́ ō.

¹⁵ Dan ń Nə́ɓā kə́ bo kə́ tɔ́gən i ngá̰ý tə̄ndā mban̄g gə̄ tḭ̄ḭ̄də́ ní, néjə dəse tun tun dɔ mbal̄ Salmon tə́.

¹⁶ Mbal̄ yā Nə́ɓā, mbal̄ kə́ Basan, mbal̄ kə́ ta télən gə̄ i ngá̰ý, mbal̄ kə́ Basan,

¹⁷ i tām̄ rí tə́ á sḭḭ̄ mbal̄ gə̄ ń jamsí gə̄ i ngá̰ý ní ə̄ndāī ni mbal̄ ń Nə́ɓā gərā yā ndi tū tə́ ní? A̰á̰ā̰, Kɔ́ɔ̄ɓē a ndi tū tə́ ngándáńg.

¹⁸ Púsə rɔ̄ɔ̄ gə̄ yā Nə́ɓā i dūbú ngá̰ý, i dūbú ngá̰ý nja kutə kə̄ gogə́. Kɔ́ɔ̄ɓē i dandə́ tə́, mbal̄ Sinai i kem loo kə́ táĺ tə́.

¹⁹ Kɔ́ɔ̄ɓē Nə́ɓā, ḭ̄ al̄ āw̄ loo kə́ dɔɔ́ tə́, ə́hɔ de gə̄ ɓəlo tə́ āw̄ sedə́. Ī-taā kadə̄ karī gə̄ jī de gə̄ tə́, dan ngé mbātə́ najə̄ gə̄ tə́ gə̄gē, yā kəngeń loo ndi!

²⁰ Ādə̄ de gə̄ tɔ̄ȳn̄ Kɔ́ɔ̄ɓē kə ndɔ̄ gə̄! Nə́ɓā ngeé ń toō tetə rɔ̄ɔ̄ adə̄jí.

²¹ Ni i Nə́ɓā kə́ nge tetə rɔ̄ɔ̄ gə̄ tām̄ yājí tə́ ō, ta róbə gə̄ ń de gə̄ a oyn̄neé ní i ta róbə gə̄ yā Nə́ɓā ń i Kɔ́ɔ̄ɓē ní ō.

²² Banī Nə́ɓā tɔ̄ɔ̄ dɔ madə̄ ba̰ā̰n gə̄, ni tɔ̄ɔ̄ kār̄ dɔ deē ń əɓa nənga ngá̰ý á rāā yá̰á̰ kə́ majaĺ ní.

²³ Kɔ́ɔ̄ɓē əda na n-a n-ḭḭ sedə́ Basan yā reē sedə́ ō, n-a n-teē sedə́ kem bəlo loo gə̄ kə́ gír bā bo tə́ yā reē sedə́ ō,

²⁴ yā kadə̄ ī-tə́ɓādə́ kə njaí kum mósə tə́ ō, kadə̄ madə̄ ba̰ā̰í kə́rēý gə̄ télən̄ dā̰ yā bísə yāí gə̄ ō.

²⁵ Nə́ɓā, nin̄ a̰a̰n̄ kósə de gə̄ ń njə̄rān̄ gōí tə́ ní, kósə de gə̄ ń njə̄rān̄ gō Nə́ɓā yāḿ tə́ ō, mban̄g yāḿ tə́ ō, kem loo kə́ táĺ tə́ ní.

²⁶ Ngé kənī pā gə̄ i kété, gōsə̄ gə̄ utə̄n̄ gōdə́, ba ngáń kə́ dəyá̰ kə́ ngé kənda kɔdə gə̄ njə̄rān̄ kə gō kadədə́.

²⁷ Ī-tɔ̄yī Nə́ɓā loo kán̄ náā gə̄ tə́, ī-tɔ̄yī Kɔ́ɔ̄ɓē ta kəɓa man̄ kə́ Israel tə́.

²⁸ Benjamḛ ń i ngōn̄ kə́ dūú ní i laā, tá ngār kə́ Juda gə̄ ō, kə́ Jabulo̰ gə̄ ō, kə́ Nepətali gə̄ ō, i laā ō.

²⁹ Nə́ɓā yāí gḛy kadə̄ ī-ngan̄g. Nə́ɓā, ḭ̄ ń ī-rāā yá̰a̰ tām̄ yājí tə́ ní ɔ́jə́ tɔ́gí!

³⁰ Dan ń mban̄g gə̄ a̰a̰n̄ kújə mban̄g yāí ń dɔn un dɔ kújə gə̄ malang kə́ Jerusalem tə́ ní anī, a reēn̄ kə kadə̄ karī yādə́ gēé yā ndējī.

³¹ Əla ɓōĺ kem Ejiptə ń i dā̰ kə́ kem tə̄ɓā gə̄ tə́ ní, ni ń rāā rɔ̄n i ɓūtə̄ man̄g kə́ bəra gə̄ tə́ ō, ngol kə́ dɔ gír de gə̄ tə́ ō ní, ni ń ndējī sə́lē gində̄ arjā̰a̰ sɔlə̄ń dɔn kə̄ noí tə́ ní. Gír de gə̄ ń nel̄də́ rɔ̄ɔ̄ ngá̰ý ní, ī-tə̄ndā ī-tḭ̄ḭ̄də́ naā tə́ kɔ̄ɔ́.

³² Ngé kɔsə kum gotə ɓē gə̄ ḭḭn̄ Ejiptə reē ugə̄n̄. De kə́ Etiopi gə̄ əlan̄ jīdə́ kum kə̄ rɔ̄ Nə́ɓā tə́.

³³ Ɓē ko̰o̰ gə̄ kə́ dɔ nang tə́, ə̄nīī pā ādī Nə́ɓā, ɔ́siī gɔn Kɔ́ɔ̄ɓē kə yá̰á̰ kə́ ɓār̄ gōsə̄ gēé.

³⁴ Kɔ́ɔ̄ɓē ń i nge njə̄rā kə sə́ndá dɔ rā̰ tə́, dɔ rā̰ kə́ to i jóó ngá̰ý tə́ ní. Á̰a̰ā̰, i ni n-ɔr̄ najə̄ kə tɔ́gɔ́ ō, kə ndū boó ō toó.

³⁵ Ədaī na tɔ́gə i yā Nə́ɓā, ə́daī na ni i de kə́ bo dɔ ɓē kə́ Israel tə́ ō, tɔ́gən i dan kil̄ man̄ tə́ ō.

³⁶ Nə́ɓā ndi kem loo kə́ táĺ yān tə́ ɔjəń kə̄ ndágá kadə̄ ni i de kə́ to ɓōĺ ngá̰ý. I Nə́ɓā yā Israel n i nge kadə̄ gír deē yān gə̄ tɔ́gə ō, ko̰o̰ ɓē ō ní. Ādə̄ de gə̄ tɔ̄ȳn̄ Kɔ́ɔ̄ɓē!