PĀ GƏ̄ 66 - Bibəl ta Sar̄

Ādə̄ de gə̄ tɔ̄ȳn̄ Nə́ɓā

1 Pā kə́ kem makətūbə̄ yā ngār yā gōsə̄ pā gə̄ tə́. Pā.

¹ Pā kə́ kem makətūbə̄ yā ngār yā gōsə̄ pā gə̄ tə́. Pā. De kə́ dɔ nang tə́ gə̄ malang, ī-ɓōkíī Nə́ɓā tɔ̄ȳ!

² Ī-tɔ̄yī rīn kə pā gēé, ɔ́siī gɔnən kə tɔ̄yɔ̄ɔ́,

³ ə́daī Nə́ɓā na kəla rāān gə̄ na ton̄ ɓōĺ ngá̰ý ō, dan ń madə̄ ba̰ā̰n gə̄ na a̰a̰n̄ tɔ́gən kə́ ngá̰ý al̄ naā anī, na lōn̄ gír kɔsə rɔ̄də́ kə̄ dɔɔ́ tə́ ō,

⁴ na de kə́ dɔ nang tə́ gə̄ malang na ɔsən̄ nodə́ nang tə́ non tə́ ō, na ənīn̄ pā ɔsən̄neé gɔnən ō tɔ̄ȳn̄neé rīn ō.

⁵ Ī-reē á̰a̰ī kəla rāā Nə́ɓā! Kəla rāān gə̄ əla ɓōĺ kem de gə̄ tə́.

⁶ Ni-rāā bā bo adə̄ tél loo kə́ aȳ sáẃ sáẃ, rāā adə̄ de gə̄ gāngə̄n̄ bā kanjə̄ kadə̄ man̄ ɔdə njadə́. Ādə̄ jə-rāāī rɔ̄nel̄ yá̰á̰ kə́ bo ngá̰ý ń noō.

⁷ Ni-o̰o̰ ɓē kə tɔ́gəneé ngándáńg ō, əndā kumən gō gíŕ nápar de gə̄ tə́ ō. Ādə̄ ngé mbātə́ najə̄ gə̄ ɔsən̄ rɔ̄də́ kə̄ dɔɔ́ alé!

⁸ Gír de gə̄ ī-tɔ̄yī Nə́ɓā yājí. Úniī ndūsí kə̄ dɔɔ́ ī-ɓōkíin̄neé tɔ̄ȳ.

⁹ Nge ń rāā adə̄ jə-ndiī kə kumjí ní əya̰jí adə̄ j-əsōī kɔ̄ɔ́ alé.

¹⁰ Nə́ɓā, ḭ̄ ī-nāājí adə̄ ī-ger̄jí, ī-nāājí kum hor tə́ tītə̄ loo nō gində̄ arjā̰a̰ beé.

¹¹ Ḭ̄ ə́lájí kum gūmbə̄ tə́, ə̄ndā yá̰a̰ kətō kə́ kɔȳ dɔjí tə́.

¹² Ḭ̄ ādə̄də́ ta róbə adə̄ rāān̄jí dā̰ kətō yá̰á̰ tə́, j-udə kum hor tə́ ō kum man̄ tə́ ō, banī ḭ̄ ī-teē sejí kɔ̄ɔ́ kum tə́, yā kəndājí ta yá̰a̰ kəsa kə́ ngá̰ý tə́.

¹³ M-údə́ kújə yāí tə́ kə yá̰a̰ tun̄ gə̄ kə́ yā róō horoó kə taá malang, yā rāā yá̰a̰ gə̄ ń m-ə̄nī ndūḿ yā rāā kadī ní,

¹⁴ yá̰a̰ gə̄ ń m-ə́da rī rāā taḿ tə́ dan ń wur kɔl əsōń dɔḿ tə́ ní.

¹⁵ m̄-ndējī dā̰ kə́ əndān̄ mbɔ́ĺdə́ gə̄ ō, bal batə̄ gə̄ ō, m̄-tɔ̄l̄ man̄g kə́ bəra ō, bal bə̄yā̰ gə̄ ō, ba m̄-rāā dā̰də́ yā kadə̄ róōn̄ horoó, adə̄ sēēdə́ aw̄ bátə́ ugə̄ rɔ̄í tə́.

¹⁶ Sḭḭ̄ ngé ɓōĺ ndíĺ Nə́ɓā gə̄ malang ī-reēī ōōī, m-ā m-ə̄nīsí gotə yá̰á̰ ń ní rāā tām̄ yāḿ tə́ ní.

¹⁷ m̄-nōō kə̄ dɔn tə́ kə taḿ ō, ta ndo̰ḿ ɓōkə́n tɔ̄ȳ ō.

¹⁸ Loo kə́ beé tə́ ré m̄-gír̄ i yá̰á̰ kə́ majaĺ kemḿ tə́ anī, Kɔ́ɔ̄ɓē a oō najə̄ yāḿ alé.

¹⁹ Banī Nə́ɓā oō najə̄ yāḿ. Ni nēl̄ mbīn oōń ndɔ̄ȳ yāḿ.

²⁰ m̄-ɓōkə́ Nə́ɓā tɔ̄ȳ! Ni-mbātə́ ndɔ̄ȳ yāḿ aĺ ō, mbātə́ rāā kem majə seḿ aĺ ō.