PĀ GƏ̄ 61 - Bibəl ta Sar̄

m̄-ndigə ndi kem kújə yāí tə́ ngándáńg

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. I pā yā Dabid

² Ɓɔ́ Nə́ɓā, ōō nōō yāḿ, ī-nēl̄ mbīí ōoń ndɔ̄ȳ yāḿ.

³ Dan ń tɔ́gə́ḿ asə aĺ ní, m̄-ndi ta ngóy dɔ nang tə́ m̄-ɓāríī kadə̄ ī-dḭḭ̄m̄. Āw̄ seḿ mbal̄ ń m-ásə kaw̄ kugə̄ tū tə́ aĺ ní tə́.

⁴ Tɔdɔ̄ ḭ̄ i loo ɓɔ̄ɔ̄ rɔ̄ yāḿ, kújə yāḿ kə́ ngan̄g ta kum madə̄ ba̰ā̰ḿ tə́.

⁵ m̄-ndigə i ndi kem kújə yāí tə́ ngándáńg ō, i kənge loo ɓɔ̄ɔ̄ rɔ̄ḿ kem kújə yāí tə́, gír bɔ̄gīí tə́ ō.

⁶ Nə́ɓā, i ḭ̄ n ōō ndə̄ngā yāḿ ō, ādə̄ ngé ɓōĺ rīí gə̄ yá̰a̰ ndəbā yādə́ ō ní.

⁷ Ə̄nī ndɔ̄ ta madə̄ tə́ ādə̄ mban̄g, ādə̄ ɓālə̄n i ɓú nja ngá̰ý!

⁸ Ɓɔ́ Nə́ɓā, ādə̄ mban̄g o̰o̰ ɓē ta kumií tə́ ngándáńg! Ī-rāā ādə̄ kem majə yāí ō ra dɔ ndūí tə́ yāí ō ngɔ̄m̄nən̄.

⁹ Loo ń noō tə́ m-ā m-ə̄nī pā ngándáńg yā kɔsəń gɔnií ō, m-ā m̄-rāā yá̰a̰ gə̄ ń m-ə̄nī ndūḿ yā rāā kadī ní kə dɔ ndɔ̄ gə̄ ō.