PĀ GƏ̄ 60 - Bibəl ta Sar̄

Nə́ɓā oō nōō yā gír deē yān gə̄

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. I pā yā Dabid kə́ yā kəgań kem deē dɔ yá̰á̰ kə́ rāā yá̰á̰ tə́ ō, yā ndóoń deē yá̰a̰ ō.

² I dan ń Dabid rɔ̄ɔń Aram gə̄ kə́ Mesopotami tə́ ō kə́ Soba tə́ ō ní. Ta téĺdə́ anī Joab tetə deē yā Edom gə̄ dūbú kutə gidə i jōó rɔ̄ɔ̄, wól loo ń a ɓārə́n̄ na i wól loo yā katə̄ ní tə́.

³ Nə́ɓā ḭ̄ ī-mbātə́jí, ī-tə̄ndā ī-tḭ̄jí kə̄ loo gə̄ tə́. I wōn̄g n rāāī ní ba úńjí dɔɔ́ gogə́ rang.

⁴ Ī-rāā ādə̄ dɔ nang ndebə ō njar ō ní, ī-tél ə̄ndā ta naā tə́ gogə́ tām̄ a yéȳ i mbée!

⁵ Ī-rāā ādə̄ yá̰á̰ kə́ ngan̄g rāā gír deē yāí gə̄. Ḭ̄ ādə̄jí kasə kə́ ngan̄g adə̄ j-a̰ȳ.

⁶ Ngé gə̄ ń ɓōlə́n̄ ndílí ní, ḭ̄ ī-rāā ādə̄ a̰ȳn̄ naā kɔ̄ɔ́ no nge kur gə̄rā tə́.

⁷ Yā kadə̄ kó tár yāí gə̄ télən̄neé de gə̄ kə́ gāngə̄n̄ dɔdə́ kɔ̄ɔ́ ɓáa, ájə́jí kə jī ko̰í ō, ī-ndigə ɓār̄ yājí ō.

⁸ Nə́ɓā ɔr̄ najə̄ kem kújə́ kə́ táĺ yān tə́ əda na: I mā n m̄-tetə rɔ̄ ní! M-ā m̄-kēgə̄ ɓē kə́ Sisem naā tə́. M-ā m̄-gán̄g wól loo kə́ Sukot naā tə́ gír loo ngá̰ý.

⁹ Galaad i yāḿ ō Manase i yāḿ ō. Epəraim i jākā gində̄ kə́ dɔḿ tə́ ō, Juda i kāgə̄ ko̰o̰ ɓē yāḿ ō.

¹⁰ Moab i səmbē ndogə̄ man̄ yāḿ. m̄-ɓōkə́ sākə̄rā yāḿ dɔ Edom tə́. M-úr kɔĺ rɔ̄ dɔ dɔ nang yā Pilistin gə̄ tə́.

¹¹ I náā n a aw̄ seḿ ɓē kə́ ngan̄g tə́ ní? I náā n a aw̄ seḿ bátə́ yā kugə̄ seḿ dɔ nang kə́ Edom tə́ ní?

¹² I ḭ̄ Nə́ɓā ń ī-mbātə́jí kɔ̄ɔ́ ní ngóy aĺ a? I ḭ̄ Nə́ɓā ń ī-teē kə ngé rɔ̄ɔ̄ yājí gēé to̰ aĺ ní ngóy aĺ a?

¹³ Ī-rāā sejí ādə̄ jə-rɔ̄ɔń madə̄ ba̰ā̰jí. Tɔdɔ̄ kadə̄ deē ndul dḭḭ̄ deē madə̄n i gól̄ loo karī.

¹⁴ Ré Nə́ɓā i sejí anī, j-a jə-tetə rɔ̄ɔ̄! Tɔdɔ̄ i ni n a tə́ɓā madə̄ ba̰ā̰jí gə̄ kə njaneé ní.