PĀ GƏ̄ 6 - Bibəl ta Sar̄

Kɔ́ɔ̄ɓē ī-lōō gān̄g sarya dɔḿ tə́

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kənde kə́ kəlān i sɔ́sɔ́. I pā yā Dabid.

² Kɔ́ɔ̄ɓē, ī-lōō kəndam̄ kə wur katāá! Ī-lōō kəndam̄ kə wōngōó!

³ Kɔ́ɔ̄ɓē, ādə̄ kumií o̰o̰ī tām̄ yāḿ tə́, tɔdɔ̄ tɔ́gə́ḿ gətóo. Kɔ́ɔ̄ɓē, m̄-ndebə kə̄ kem kə̄ngāḿ gə̄ tə́ malang, ī-rāā ādə̄ rɔ̄ḿ ngan̄g.

⁴ m̄-ndebə kə̄ rɔ̄ḿ gə̄ tə́ malang. Ní, Kɔ́ɔ̄ɓē, ā ə́hɔm̄ kemií tə́ i bátə́ rə́ngáý tə́?

⁵ Kɔ́ɔ̄ɓē, ī-tél ī-reē ī-gān̄g dɔḿ! Ájəm̄ sɔɔ̄ń ndūí ń ī-ra dɔ tə́ ní!

⁶ Tɔdɔ̄ deē ń oy ní a əga kemən dɔí tə́ to̰ alé. De gə̄ ń oyn̄ ní asən̄ ɓōkíī tɔ̄ȳ to̰ alé.

⁷ m̄-to̰ō̰ bátə́ adə̄ kɔr to̰ō̰ taā tɔ́gə́ḿ kɔ̄ɔ́. Man̄ kumḿ nɔ̄l̄ tə̄rá yāḿ ndɔ̄ɔ́ kə dɔ ndɔ̄ gə̄. Man̄ nōō kə́ kumḿ tə́ nɔ̄l̄ yá̰a̰ toḿ.

⁸ Rɔ̄ḿ nelə̄m̄ aĺ bátə́ adə̄ kumḿ a̰a̰ loo kə gōó alé. Madə̄ ba̰ā̰ḿ gə̄ alə̄n̄ naā, adə̄ kumḿ a̰a̰ loo ngá̰ý alé.

⁹ Sḭḭ̄ ngé rāā yá̰á̰ kə́ majaĺ gə̄ malang, ɔ̄rī rɔ̄sí rɔ̄ḿ tə́ kɔ̄ɔ́, tɔdɔ̄ Kɔ́ɔ̄ɓē oō kōō síkə̄ nōō yāḿ.

¹⁰ Kɔ́ɔ̄ɓē oō ndūḿ ń m̄-rāānneé ɓɔ́ ní, ni ndigə ndɔ̄ȳ yāḿ.

¹¹ Ādə̄ rɔ̄ madə̄ ba̰ā̰ḿ gə̄ malang sɔl̄də́ gidə kógə̄ḿ. Ādə̄ télən̄ kə rɔ̄ sɔlɔ́ ō, ndewn̄ kə̄ rɔ̄də́ gə̄ tə́ malang ō.