PĀ GƏ̄ 56 - Bibəl ta Sar̄

De kógə̄ḿ kə́ rāānən̄ yá̰á̰ kə́ tōr̄ əya̰ rɔ̄n jī Nə́ɓā tə́

¹ Pā kə́ kem makətūbə̄ yā ngār yā gōsə̄ pā gə̄ tə́. A ənīn̄ i tītə̄ loo kənī pā déŕ kə́ dɔ kāgə̄ kə́ bo gə̄ kə́ loo kə́ sa̰y ngá̰ý tə́. I pā yā Dabid kə́ yā ndóoń deē yá̰a̰. Ɔr̄ i najə̄ yā Dabid ń Pilistin gə̄ əhɔnən̄ kem ɓē kə́ Gat tə́ ní.

² Nə́ɓā, á̰a̰ kum tō ndoō yāḿ, tām̄ aw̄n̄ seḿ gadə gadə! A rɔ̄ɔ̄mə̄n̄ ō, a rāān̄ kumḿ ndoō tə́ ō, kə dɔ ndɔ̄ gə̄.

³ Ngé rɔ̄ɔ̄ḿ gə̄ aw̄n̄ seḿ gadə gadə kə ndɔ̄ gə̄, banī ɓūtə̄ de kə́ ngá̰ý gə̄ rɔ̄ɔ̄n̄ dɔ rā̰ tə́ tām̄ yāḿ tə́.

⁴ Ndɔ̄ ń ɓōĺ rāām̄neé tə́ ní, m-ə̄ndā kemḿ dɔí tə́.

⁵ m̄-tɔ̄ȳ Nə́ɓā tām̄ najə̄ kɔrə̄n tə́, m-ə̄ndā kemḿ dɔn tə́, m̄-ɓōĺ to̰ alé. Deē a rāā i rí seḿ?

⁶ Nin̄ rāāmə̄n̄ adə̄ m-á̰á̰ tápə̄ ō, gírə̄n̄ i rāā yá̰á̰ kə́ majaĺ seḿ ō, kə dɔ ndɔ̄ gə̄.

⁷ Nin̄-umə̄mə̄n̄, əndān̄ kumdə́ gírə́ḿ tə́ ō, unən̄ tóo njaḿ ō, yā tɔ̄lə̄m̄.

⁸ Yá̰á̰ kə́ gōtə́ aĺ ń rāān̄ asə naā beé ní a ajən̄ a? Nə́ɓā, ī-mbə́rē de gə̄ ń noō ī-tə́nādə́ kə wōngōó!

⁹ Ī-tə́da kutə njaḿ ń m̄-dáyń ní kɔ̄ɔ́ ɓá ní, ī-taā man̄ kumḿ kem kū yāí tə́ tā. Kutədə́ i kə́ ndang kem makətūbə̄ yāí tə́ aĺ a?

¹⁰ Ndɔ̄ ń m-ā m̄-ɓārī kadə̄ ī-dḭḭ̄m̄neé tə́ ní, madə̄ ba̰ā̰ḿ gə̄ a tūrə̄n̄ gándə́də́. M-ger̄ kadə̄ Nə́ɓā i seḿ māá.

¹¹ m̄-tɔ̄ȳ Nə́ɓā tām̄ najə̄ kɔrə̄n tə́. A̰á̰ā̰, m̄-tɔ̄ȳ Kɔ́ɔ̄ɓē tām̄ najə̄ ní tə́.

¹² M-ə̄ndā kemḿ dɔ tə́, m̄-ɓōĺ to̰ alé. De gə̄ a rāān̄ i rí seḿ?

¹³ Nə́ɓā, yá̰á̰ ń m-ə̄nī ndūḿ kadə̄ m-ādī ní, kə̄rān i dɔḿ tə́. M-ā m̄-ndējī yá̰a̰ tun̄ gə̄ kə́ yā ɓōkíīneé tɔ̄ȳ.

¹⁴ Tɔdɔ̄ ḭ̄ ɔ̄rə̄m̄ ta yo tə́. Ī-rāā ādə̄ m-ə̄ndā njaḿ kum yá̰á̰ kə́ a reē kə yá̰á̰ kə́ majaĺ dɔḿ tə́ alé. Adə̄ m̄-njə̄rā ta kumií tə́, kum loo kə́ unjə̄ kow yā ngé ndi kə kumdə́ gēé tə́.