PĀ GƏ̄ 55 - Bibəl ta Sar̄

Ndɔ̄ȳ yā de kə́ rāānən̄ yá̰á̰ kə́ gōtə́ alé

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. I pā yā Dabid kə́ yā ndóoń deē yá̰a̰.

² Ɓɔ́ Nə́ɓā, ī-nēl̄ mbīí ōoń ndɔ̄ȳ yāḿ! Ī-lōō ɓɔ̄ɔ̄ rɔ̄í dan ń m̄-rāāī ɓɔ́ ní.

³ Ī-nēl̄ mbīí kə̄ rɔ̄ḿ tə́ ō, ī-tūrə̄m̄ najə̄ tə́ ō. Kemḿ nujə sák sák kɔ̄ɔ́ adə̄ m̄-nōō ō, m-ɔ̄r̄ najə̄ mbitə mbitə ō,

⁴ sɔɔ̄ń ndū madə̄ ba̰ā̰ḿ kə́ m-ōō ō, kaw̄ kə́ nge kem ndul aw̄ seḿ gadə gadə ō. Nin̄ rāān̄ adə̄ yá̰á̰ kə́ majaĺ əsō dɔḿ tə́ ō, ənīmə̄n̄ rɔ̄ɔ̄ kə wōngōó ō.

⁵ m̄-ndi i kə sōlōó kekəre kemḿ tə́, ɓōĺ yo asəm̄ nák.

⁶ M-ā m̄-sōl̄ ō, m-ā m̄-ndebə ō, dā̰ḿ ndām̄ ngangan ō.

⁷ Tā anī m-ə́da na nə́ngētə́ m-ə́ɓa i bɔ̄gə̄ tītə̄ yā dér anī, m-ā m-ḭ́ḭ yā kaw̄ ndi loo kə́ yá̰á̰ kógə̄ḿ a rāām̄ tū tə́ aĺ tə́.

⁸ A̰á̰ā̰, m-ā m-ā̰ȳ yā kaw̄ sa̰y, kaw̄ ndi kem dəla loo tə́.

⁹ M-ā m-āw̄ láẃ yā kaw̄ ndi loo ɓɔ̄ɔ̄ rɔ̄ kógə̄ḿ tə́, loo kə́ nél man̄ a asə rāā yá̰a̰ seḿ tū tə́ aĺ tə́.

¹⁰ Kɔ́ɔ̄ɓē, ī-tə́lá yá̰a̰ gə̄ ń madə̄ ba̰ā̰ḿ gə̄ nómə̄n̄ rāā seḿ ní naā tə́. Ī-rāā ādə̄ najə̄ kɔr̄də́ un gō naā alé. Tɔdɔ̄ m-á̰á̰ yá̰á̰ kə́ rāā kə dɔ́nɔ́ ō, kɔ̄l̄ naā ō, kem ɓēé.

¹¹ Ndɔ̄ɔ́ gē, kadaá gē, nin̄ a njə̄rān̄ i dɔ ndogə̄ mbal̄ tə́. Yá̰a̰ rāā kə́ gōtə́ aĺ gə̄ ō, kə́ to yḛr kum gə̄ ō, ton̄ kem ɓēé.

¹² Tɔ̄l̄ naā i kem ɓēé ō, yá̰a̰ rāā kə́ kə dɔ́nɔ́ nin̄ kə gól̄ naā əya̰n̄ kum róbə yān gə̄ āl̄ ō.

¹³ I madə̄ ba̰ā̰ḿ n tájə̄m̄ ní alé. Tɔdɔ̄ ré i ni anī, m-ā m̄-tə́gā taḿ dɔn tə́. I nge rɔ̄ɔ̄ḿ n tetəm̄ rɔ̄ ní alé. Tɔdɔ̄ ré i ni anī m-ā m-ə́ja rɔ̄ḿ kɔ̄ɔ́ yā kadə̄ ni a ɔdəm̄ alé.

¹⁴ Ba i ḭ̄ ń i de kə́ tītə̄ḿ mə̄kɔ́ ní, i ḭ̄ ń i madə̄ taḿ ní, i ḭ̄ ń j-ənī kemjí báŕ báŕ j-adə̄ naā ní.

¹⁵ Kété ní j-ɔr̄ najə̄ kə́ kemjí gə̄ tə́ kə naá kə míndə́ kə́ majaá ō, j-un njají i kə gō naá majə kem kújə yā Nə́ɓā tə́ ō.

¹⁶ Ādə̄ yo əɓadə́ nang tə́ bup! Ādə̄ aw̄n̄ ɓádá kə kumdə́, tām̄ ndāńg i ngá̰ý kemdə́ tə́!

¹⁷ Mā m̄-nōō kə̄ dɔ Nə́ɓā tə́ kadə̄ rāā seḿ, adə̄ Kɔ́ɔ̄ɓē a ajəm̄.

¹⁸ Loo sɔlí gē, dəloí gē, kadaá gē ní, m̄-to̰ō̰ rus rus ō, m̄-nōō rɔ̄ḿ ō. Banī ni oō ndūḿ.

¹⁹ Dan ń rɔ̄ɔ̄mə̄n̄ ní, ni-gān̄g dɔḿ ō, ngɔ̄mə̄m̄ kə lápə́ya ō, tɔdɔ̄ nin̄ i ngá̰ý dɔḿ tə́.

²⁰ Ādə̄ Nə́ɓā oō ndūḿ ba əla rɔ̄sɔl̄ dɔdə́ tə́. Ni ń ndi dɔ kōr̄ kāgə̄ mbang tə́ i ta kəla gíŕ tə́ ní! Tɔdɔ̄ nin̄ a tūrə̄n̄ háĺdə́ aĺ ō, a ɓōlə́n̄ ndíĺ Nə́ɓā aĺ ō.

²¹ Deē ngeé ń toō rɔ̄ madə̄ tan gə̄, ni-əhɔ madə̄ naā yān i yá̰á̰ kə́ karī tə́.

²² Najə̄ kə́ tan tə́ lúndə̄ tītə̄ tejə beé, banī kemən i rɔ̄ɔ̄. Najə̄ kə́ tan tə́ sɔl̄ lɔ́ḿ lɔ́ḿ tɔȳ yibə̄, banī i kəyā rɔ̄ɔ̄.

²³ Ī-tél kə yá̰a̰ kətō yāí kə́ ɔȳ ə̄ndā dɔ Kɔ́ɔ̄ɓē tə́. Ni a rāā kadə̄ ā ī-tél yā kənge tɔ́gə gogə́. Ni a əya̰ kadə̄ nja de kə́ súmūú ndetə aĺ bátə́.

²⁴ Banī ḭ̄ Nə́ɓā, ā ī-rāā kadə̄ nin̄ risə aw̄ ndin̄ gə́le loo kə́ ɓádá tə́. Ngé tɔ̄l̄ de gə̄ ō, ngé gól̄ loo gə̄ ō ní, a ugə̄n̄ núsə ndɔ̄də́ kə́ kadə̄ ndin̄neé kə kumdə́ tə́ alé. Banī mā m-ə̄ndā kemḿ i dɔí tə́.