PĀ GƏ̄ 54 - Bibəl ta Sar̄

Ɓār̄ ɓār̄ yā de kə́ rāān̄ kumən ndoō tə́

¹ Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. I pā yā Dabid kə́ yā ndóoń deē yá̰a̰.

² I dan ń de kə́ Jip gə̄ aw̄ ədan̄ Saul na Dabid na ɓɔ̄ɔ̄ rɔ̄n na i gō nang yādə́ tə́ ní.

³ Nə́ɓā, ájəm̄ kə ta kūl̄ rīí ō, ī-gān̄g sarya yāḿ kə ta kūl̄ tɔ́gí ō.

⁴ Ɓɔ́ Nə́ɓā, ōō ndɔ̄ȳ yāḿ. Ī-nēl̄ mbīí ōoń najə̄ kɔrə̄ḿ.

⁵ Tɔdɔ̄ tə̄rā gə̄ ənīmə̄n̄ rɔ̄ɔ̄ ō, de kə́ ngé dɔ́nɔ gə̄ sāān̄ tɔ̄lə̄m̄ ō. Nin̄ usədə́ dɔ Nə́ɓā tə́ alé.

⁶ Á̰a̰ā̰, Nə́ɓā i nge dḭḭ̄m̄, i Kɔ́ɔ̄ɓē ngóy n i nge kəhɔm̄ kə̄ dɔɔ́ ní.

⁷ Ādə̄ ni-rāā adə̄ yá̰á̰ kə́ majaĺ tél əsō dɔ ngé rɔ̄ɔ̄ḿ gə̄ tə́! Ī-rāā ādə̄ nin̄ gətóon̄ kɔ̄ɔ́ malang, sɔɔ̄ń yá̰a̰ rāāí kə́ gōtə́.

⁸ M-ā m̄-tun̄ yá̰a̰ yā kadī kə kemḿ kə́ majaá. Kɔ́ɔ̄ɓē m-ā m-ɔ́sə gɔn rīí, tɔdɔ̄ rīí majə.

⁹ Ni ɔrə̄m̄ kɔ̄ɔ́ kum wur kɔl gə̄ tə́ malang, adə̄ m-á̰a̰ madə̄ ba̰ā̰ḿ gə̄ ń rɔ̄ tetədə́ ní.