PĀ GƏ̄ 52 - Bibəl ta Sar̄

De kə́ əndā kemən dɔ yá̰a̰ kənge yān tə́

¹ Pā kə́ kem makətūbə̄ yā ngār yā gōsə̄ Pā gə̄ tə́. I pā yā Dabid kə́ yā ndóoń deē yá̰a̰.

² Ɔr̄ i najə̄ yā Doeg kə́ Edom ń reē əda Saul na Dabid na aw̄ ɓē Abimelek ní.

³ Ḭ̄ ń tɔ́gí i ngá̰ý ní ə́nda nganjií tām̄ yá̰á̰ kə́ majaĺ kə́ ī-rāā tə́ i tām̄ rí tə́? Kem majə yā Nə́ɓā to i kə dɔ ndɔ̄ gə̄!

⁴ Kə dɔ ndɔ̄ gə̄ ní ā ī-nóm̄ i rāā yá̰á̰ kə́ majaĺ. Ta ndo̰í atə tītə̄ nə́ngá kə́ usən̄ kum beé ō, ger̄ gól̄ loo ngá̰ý ō.

⁵ Ī-gḛy yá̰á̰ kə́ majaĺ tɔȳ yá̰á̰ kə́ majə ō, ī-gḛy najə̄ kə́ sor̄ tɔȳ najə̄ kə́ rɔ̄kum ō.

⁶ Ī-gḛy i najə̄ kə́ a nujə yá̰a̰ gə̄ ō, najə̄ kɔrīí i najə̄ kə́ rɔ̄kum aĺ gə̄ malang ō!

⁷ Adə̄ Nə́ɓā a nujiī kɔ̄ɔ́ i kə́ njɔ́ḿ gə̄ tə́. Ni a ndɔ́rī yā teē seí kɔ̄ɔ́ kem kújə tandā yāí tə́. A ɔrī kɔ̄ɔ́ kə ngəraí gēé dɔ nang ń de kə́ kə kumuú gə̄ ndin̄ tū tə́ ní tə́.

⁸ Loo ń noō tə́ de kə́ súmūú gə̄ a a̰a̰n̄ adə̄ a ɓōlə́n̄. Nin̄ a əgōn̄ dɔn tə́ ba a ədan na:

⁹ Á̰a̰ī dəngam ń Nə́ɓā i loo ɓɔ̄ɔ̄ rɔ̄ yān kə́ ngan̄g ngá̰ý alé, adə̄ əndā tɔ́gən i dɔ yá̰a̰ kənge yān gə̄ tə́ ō, dɔ yá̰a̰ rāān kə́ majaĺ gə̄ tə́ ō ní!

¹⁰ Banī mā m̄-rāā rɔ̄ḿ i kāgə̄ olibə kə́ mbīn to mbōl̄ sṵy tə́ kem kújə yā Nə́ɓā tə́. M-ə̄ndā kemḿ dɔ kem majə yā Nə́ɓā tə́ i kə́ njɔ́ḿ gə̄ tə́.

¹¹ M-ā m̄-ɓōkíī tɔ̄ȳ ngándáńg tām̄ yá̰á̰ ń ī-rāā tə́ ní. Nə́ɓā, m-ə̄ndā kemḿ dɔí tə́ dan deē yāí gə̄ tə́, tɔdɔ̄ ḭ̄ i de kə́ majə.