PĀ GƏ̄ 51 - Bibəl ta Sar̄

Ndɔ̄ȳ kə́ kadə̄ Nə́ɓā mā̰yń rɔ̄n dɔ deē tə́

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid.

² I dan ń ni sāā Batəseba nə̄yá̰ Uri ō Natan nge koō ta aw̄ rɔ̄n tə́ ō ní.

³ Nə́ɓā, á̰a̰ kum to ndoō yāḿ sɔɔ̄ń ndūí ń ə̄nī ní! Ḭ̄ nge ka̰a̰ kum tō ndoō yā de gə̄, ɔ̄r̄ yá̰á̰ kə́ gōtə́ aĺ yāḿ gə̄ ń m̄-rāā ní kɔ̄ɔ́.

⁴ Yá̰á̰ kə́ gōtə́ aĺ n m̄-rāā ní ī-tə́go kɔ̄ɔ́ malang. Ɔ̄r̄ majaĺ yāḿ kɔ̄ɔ́ ādə̄ m-ūnjə̄ njáý njáý.

⁵ Tɔdɔ̄ yá̰á̰ kə́ gōtə́ aĺ gə̄ ń m̄-rāā ní m̄-ger̄. Yá̰á̰ kə́ majaĺ ń m̄-rāā ní to ta kumḿ tə́ ngándáńg.

⁶ I īkɔ́ ngóy kal kógə̄ḿ beē n m̄-rāā yá̰á̰ kə́ majaĺ seí ní. Mā m̄-rāā yá̰á̰ ń i yá̰á̰ kə́ majaĺ ta kumií tə́ ní. Adə̄ ré ā ə̄ndā najə̄ dɔḿ tə́ anī najə̄ i yāí ō, ā ī-gān̄g sarya ɓáa yá̰á̰ kə́ kadə̄ deē əda dɔí tə́ a gətóo ō.

⁷ Á̰a̰ā̰, kété pá tá kadə̄ ojəmə̄n̄ ní mā i de kə́ gōtə́ alé. Əla gír i ndɔ̄ ń kó̰ó̰ḿ ndānə̄m̄neé tə́ ní n mā i de kə́ majaĺ ní.

⁸ Banī ḭ̄ ī-sāā i kadə̄ najə̄ kə́ rɔ̄kum ndi kem deē tə́. Ī-ndóōm̄ kum kedə̄ ngarā̰ kemḿ tə́.

⁹ Ɔ̄r̄ yá̰á̰ kə́ majaĺ ń m̄-rāā ní kɔ̄ɔ́, anī m-ā m-ūnjə̄ njáý njáý. Ī-tə́gom̄, anī m-ā m̄-ndaa yā tɔȳ búy kūbə̄.

¹⁰ Ədam̄ najə̄ mā̰ȳ rɔ̄ yāí na a adə̄m̄ rɔ̄nel̄ ngá̰ý. Loo ń noō tə́ mā ń ī-tétə̄ kə̄ngāḿ rárák kɔ̄ɔ́ ní, m-ā m̄-rāā rɔ̄nel̄.

¹¹ Ún kumií kɔ̄ɔ́ ta yá̰á̰ kə́ majaĺ gə̄ ń m̄-rāā tə́ ní. Ɔ̄l̄ yá̰á̰ kə́ gōtə́ aĺ gə̄ malang ń m̄-rāā ní kɔ̄ɔ́.

¹² Nə́ɓā, ī-rāā ādə̄ kemḿ unjə̄ njáý njáý. Ī-tūr̄ ndílə́ḿ ādə̄ téĺ kə́ kijə ō, ī-rāān ādə̄ ra ngan̄g ō.

¹³ Ī-lōō tə̄ɓām̄ kɔ̄ɔ́ rɔ̄í tə́. Ī-lōō tél taā Ndíl kə́ Táĺ yāí jīḿ tə́ kɔ̄ɔ́.

¹⁴ Ī-tél kə rɔ̄nel̄ kajə ń ájəm̄ ní ādə̄m̄ gogə́ ō, Ādə̄ ndíl kem ndaa əhɔm̄ kə̄ dɔɔ́ ō.

¹⁵ Ngé mān̄ dɔ ndū najə̄ yāí gə̄ ní, m-ā m̄-ndóōdə́ gō róbə yāí gə̄. Loo ń noō tə́ ngé rāā majaĺ gə̄ a télən̄ yā reē gogə́ rɔ̄í tə́.

¹⁶ Nə́ɓā, nge kajəḿ, úń mósə dɔḿ tə́ kɔ̄ɔ́. Loo ń noō tə́ m-ā m-ə̄nī gotə yá̰á̰ kə́ gōtə́ ń ī-rāā seḿ ní.

¹⁷ Kɔ́ɔ̄ɓē, ī-teē taḿ ādə̄ m̄-ɓōkíīneé tɔ̄ȳ.

¹⁸ Ī-gḛy i kadə̄ m̄-tun̄ yá̰a̰ m-ādī alé. Yá̰a̰ tun̄ kə́ róō horoó gə̄gē ā ī-ndigə alé.

¹⁹ Yá̰a̰ tun̄ ń Nə́ɓā ndigə ní i de kə́ dɔn tetə ká káláńg. Nə́ɓā! Deē ń kə̄ngān tétə̄ rárák kɔ̄ɔ́ ō, kemən tɔ̄ɔ̄ táḿ táḿ kɔ̄ɔ́ ō ní, ī-mbātə́n alé.

²⁰ Ī-rāā kem majə kə Siyo̰. Ndogə̄ mbal̄ kə́ gidə ɓē kə́ Jerusalem tə́ ní, ī-tél ī-rāā rang.

²¹ Loo ń noō tə́ ā ī-ndigə yá̰a̰ tun̄ gə̄ ń a ndējə̄nī kə gōó ní. Ā ī-ndigə yá̰a̰ ndējə̄ kə́ rāā kə kōó kə́ kadī kə taá malang ō, yá̰a̰ tun̄ kə́ róō horoó ō. Loo ń noō tə́ ā tunə̄n̄ man̄g kə́ bəra gə̄ dɔ loo tun̄ yá̰a̰ yāí tə́.