PĀ GƏ̄ 49 - Bibəl ta Sar̄

Deē oy anī un yá̰á̰ kógə̄ḿ jīn tə́ aw̄ń alé

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā ngán Kore gə̄.

² Sḭḭ̄ gír de gə̄ malang ōōī najə̄ ń toō, sḭḭ̄ de kə́ dɔ nang tə́ gə̄ malang ī-nēlī mbīsí!

³ Ɓer̄ gə̄ ō, de kə́ bo gə̄ ō, ngé kənge yá̰a̰ gə̄ ō, ngé ndoō gə̄ ō, naā tə́ malang.

⁴ Taḿ əda yá̰á̰ kə́ ngáā. Kemḿ gír̄ najə̄ kə́ kə kumneé.

⁵ m̄-nēl̄ mbīḿ majə m-ōoń kāgə̄ najə̄ gə̄. M-ā m-úgə kənde yāḿ yā kɔjəń kum səngó kógə̄ḿ.

⁶ Ndɔ̄ kə́ majaĺ tə́ anī, m̄-sōl̄ ngam yā ngé gól̄ loo gə̄ ń gīr̄mə̄n̄ ní i tām̄ rí tə́?

⁷ Nin̄ əndān̄ kemdə́ dɔ yá̰a̰ kənge yādə́ tə́. Ɔjən̄ rɔ̄də́ kə yá̰a̰ kənge yādə́ kə́ ngá̰ý.

⁸ Deē asə gān̄g dɔ deē madə̄n aĺ ō, asə kadə̄ Nə́ɓā nar yā gāngəń dɔ rɔ̄n nəkɔ́ aĺ ō.

⁹ Ká ré ādəń nar ngá̰ý yā ndiń kə kumií gə̄gē anī, i gáŕ kadə̄ ā óy.

¹⁰ Ni a ndi kə kumneé ngándáńg a? A oy yā kaw̄ ɓádá aĺ a?

¹¹ Tá de gə̄ a̰a̰n̄ de kə́ ngáā gə̄ loo koy tə́ kə de kə́ mbóó ngá̰ý ō, kə de kə́ ger̄ najə̄ aĺ ō. Nin̄ oyn̄ ba əya̰n̄ yá̰a̰ kənge yādə́ gə̄ adə̄n̄ de kə́ rang gə̄.

¹² Nin̄ ɔjən̄neé na kújə yādə́ gə̄ na a ton̄ ngándáńg, na loo ndidə́ gə̄ na a nujə alé, adə̄ tə́ndān̄ rīdə́ gə̄ dɔ dɔ nang yādə́ gə̄ tə́.

¹³ Deē ń de gə̄ ɔsən̄ gɔnən ní a ndi dan i ngá̰ý alé. Ni to i tītə̄ dā̰ ń əhɔ tan kə̄ naā tə́ kɔ̄ɔ́ ní.

¹⁴ De gə̄ ń əndān̄ kemdə́ dɔ rɔ̄də́ nin̄ kɔ́ gə̄ tə́ ngá̰ý ní, yá̰á̰ ń a rāādə́ ní n toó, de gə̄ ń nel̄də́ koō najə̄ kɔr̄də́ nin̄ kɔ́ gə̄ ngá̰ý ní, ta tɔ̄l̄ tadə́ a to i beé:

¹⁵ Kánə̄n̄də́ ɓádá tītə̄ batə̄ gə̄, i yo n i nge kaw̄ sedə́ dɔ mu tə́ ní. Teē kə ndɔ̄ kə́ noō anī de kə́ súmūú gə̄ tə́ɓān̄də́ njadə́ tə́. Deē asə ger̄ ta kumdə́ ɓádá to̰ alé. Nin̄ i sa̰y ngá̰ý kadə kújə́ kə́ ngáā ngáā yādə́ gə̄ tə́.

¹⁶ Banī Nə́ɓā a gān̄g dɔḿ mā jī yo tə́, a̰á̰ā̰, ni a unəm̄.

¹⁷ Ī-lōō kadə̄ tōrī najə̄ kənge kə́ deē ənge yá̰á̰ tə́, najə̄ yá̰a̰ kənge yān kə́ kem kújú kə́ a ojə madə̄ kə̄ kété kété tə́.

¹⁸ Tɔdɔ̄ dan ń a oy ní a un yá̰á̰ kógə̄ḿ yā kaw̄ń aĺ ō, yá̰a̰ kənge yān kə́ ngá̰ý a aw̄ gōn tə́ ɓádá aĺ ō.

¹⁹ Dan ń ndi kə kumneé ní, əda na n-ndi majə. De gə̄ əndan̄ jīdə́ gírən tə́, tɔdɔ̄ yá̰a̰ malang i kə́ majə tām̄ yān tə́.

²⁰ Ɓá tā ba i gáŕ kadə̄ a oy yā kaw̄ gō kaan gə̄ tə́. Kaan gə̄ ní a a̰a̰n̄ loo kə́ unjə̄ kow to̰ aĺ i kə́ bátə́ gə̄ tə́.

²¹ Deē ń de gə̄ ɔsən̄ gɔnən banī ger̄ najə̄ aĺ ní, to i tītə̄ dā̰ ń əhɔ tan kə̄ naā tə́ kɔ̄ɔ́ ní beē