PĀ GƏ̄ 47 - Bibəl ta Sar̄

Əndaī jīsí gíŕ Kɔ́ɔ̄ɓē ń i mban̄g kə́ bo ní tə́

¹ Pā kə́ kem makətūbə̄ yā ngār yā gōsə̄ pā gə̄ tə́. I pā yā ngán Kore gə̄.

² Sḭḭ̄ gír de gə̄ malang ə́ndaī jīsí. Úriī kɔĺ rɔ̄nel̄ ī-tɔ̄yīneé Nə́ɓā.

³ Tɔdɔ̄ Kɔ́ɔ̄ɓē Nə́ɓā kə́ dɔɔ́ sa̰y ngá̰ý to ɓōĺ ngá̰ý. Ni i mban̄g kə́ bo dɔ dɔ nang tə́ malang.

⁴ Ni-əla dɔ gír de gə̄ gíŕ tɔ́gə yājí tə́, əla dɔ nápar de gə̄ gír njají tə́.

⁵ Ni gə̄rā dɔ nang adə̄jí yá̰a̰ yājí tə́. I yá̰a̰ kənda nganjə yājí jḭḭ̄ de kə́ gír yā Jakob tə́ gə̄ ń ni táŕjí ngá̰ý ní.

⁶ Dan ń Nə́ɓā a aw̄ kə̄ Siyo̰ ní əgan̄ kɔŕ rɔ̄nel̄ dɔn tə́. Kɔ̄rə́n̄ tōw̄ gō Kɔ́ɔ̄ɓē tə́.

⁷ Ɔ́siī gɔn Nə́ɓā kə pāá, ɔ́siī gɔnən, ɔ́siī gɔn mban̄g yājí kə pāá, ɔ́siī gɔnən!

⁸ Tɔdɔ̄ dɔ nang malang ní, mban̄g kə́ dɔ tə́ i Nə́ɓā. Ādə̄ kum pā yāsí rāā adə̄ de gə̄ gerə̄n̄ nge ń noō.

⁹ Nə́ɓā o̰o̰ ɓē dɔ nápar de gə̄ tə́. Ni-ndi dɔ kōr̄ kāgə̄ mbang yān kə́ yā ɓōĺ gidə tə́.

¹⁰ Ngār gə̄ yā gír de gə̄ kánə̄n̄ naā: I gír de gə̄ yā Nə́ɓā yā Abəraham. Tɔdɔ̄ mban̄g kə́ dɔ nang tə́ gə̄ i de gə̄ yā Nə́ɓā ń ni i dɔ yá̰a̰ gə̄ tə́ malang ní.