PĀ GƏ̄ 46 - Bibəl ta Sar̄

Kɔ́ɔ̄ɓē kə́ ɓoo kə́ tɔ́gən i ngá̰ý i naā tə́ sejí

¹ Pā kə́ kem makətūbə̄ yā ngār yā gōsə̄ pā gə̄ tə́ ō, i pā yā ngán Kore gə̄ ō. A dānə̄n̄ gō i kə ndū kə́ dūú ngá̰ý.

² Nə́ɓā i loo ɓɔ̄ɔ̄ rɔ̄ yājí kə́ ngan̄g. Ni i nge dḭḭ̄jí kə́ ndi dɔ rɔ̄n tə́ ngándáńg yā rāā sejí ndɔ̄ kə́ wur kɔl əsōń dɔjí tə́.

³ I tām̄ najə̄ ń noō tə́ n ká ré dɔ nang ndebəń gə̄gē, ká ré mbal̄ bo gə̄ yéȳn̄neé kum bā bo tə́ gə̄gē anī, jə-sōl̄ yá̰á̰ kógə̄ḿ alé ní.

⁴ Ká̰a̰ bā bo gə̄ ní ɓār̄ bu bu ō, húūlú dɔdə́ ḭḭ puk puk ō, bā bo gə̄ ní ḭḭn̄ ō, mbal̄ bo gə̄ ndāmə̄n̄ ngingin ō.

⁵ Banī bā kógə̄ḿ i noó kə́ ta jīn kə́ tɔ̄ɔ̄ gə̄ rāān̄ adə̄ rɔ̄ de kə́ kem ɓē yā Nə́ɓā tə́ gə̄ nel̄də́, adə̄ rɔ̄ de kə́ kem loo kə́ táĺ ngá̰ý yā Nə́ɓā kə́ dɔɔ́ sa̰y ngá̰ý tə́ gə̄ nel̄də́.

⁶ Nə́ɓā i kem ɓē ní tə́ adə̄ ɓē ní a ndebə alé. Ni dḭḭ̄ ɓē ní dəloí ɓatə.

⁷ Nápar de gə̄ tṵ́ṵ̄n̄ rɔ̄ɔ̄, ɓē ko̰o̰ gə̄ tə́sōn̄ kɔ̄ɔ́. Banī Nə́ɓā rāā ndūn adə̄ ɓār̄, anī dɔ nang ndebə.

⁸ Kɔ́ɔ̄ɓē kə́ bo kə́ tɔ́gən i ngá̰ý ní i naā tə́ sejí. Nə́ɓā yā Jakob i loo kə́ ngan̄g yājí kə́ kem ɓēé.

⁹ Ī-reē á̰a̰ī kəla rāā Kɔ́ɔ̄ɓē, yá̰á̰ kə́ dɔ nang tə́ gə̄ ń ni nujəń sák sák ní!

¹⁰ Ni-rāā adə̄ rɔ̄ɔ̄ dəba bátə́ ta ngóy dɔ nang tə́. Ni tétə̄ ga̰ gərā gə̄ ō nənga gə̄ ō, tə́la hor dɔ púsə rɔ̄ gə̄ tə́ ō kɔ̄ɔ́.

¹¹ Əya̰ī yá̰a̰ rɔ̄ gə̄ dɔɔ́! Á̰a̰ ī-ger̄mī kadə̄ mā i Nə́ɓā! m̄-ndi dɔ nápar de gə̄ tə́. M-ó̰o̰ ɓē dɔ dɔ nang tə́.

¹² Kɔ́ɔ̄ɓē kə́ bo kə́ tɔ́gən i ngá̰ý i naā tə́ sejí. Nə́ɓā yā Jakob i loo kə́ ngan̄g yājí kə́ kem ɓēé.