PĀ GƏ̄ 42 - Bibəl ta Sar̄

Makətūbə̄ Pā gə̄ kə́ nge ko̰ jōó (Pā gə̄ 42—72 ) Tītə̄ ń kəndā man̄ rāań dul ní

¹ Pā kə́ kem makətūbə̄ yā ngār yā gōsə̄ pā gə̄ tə́, i pā yā ngán Kore gə̄.

² Tītə̄ ń kəndā man̄ rāań wāl̄ adə̄ sāań man̄ pa pak ní, Nə́ɓā yāḿ, m̄-sāāī pa pak ō.

³ Kəndā Nə́ɓā rāām̄, kəndā Nə́ɓā kə́ ndi kə kumneé rāām̄. I rə́ngáý tə́ n m-ā m-údə kem kújə yān tə́ yā ra ta kumən tə́ ní?

⁴ Kadaá ō ndɔ̄ɔ́ ō ní yá̰a̰ kəsaḿ i man̄ kumḿ, tām̄ a dəjemə̄n̄ ngándáńg na ké Nə́ɓā yāḿ ngaá i rá wa.

⁵ Əga kemḿ dɔ yá̰a̰ gə̄ ń toō tə́ anī kemḿ əgam̄ biting. Kété m̄-njə̄rā no kósə de kə́ ngá̰ý gə̄ tə́, m-ɔ́r nodə́ bátə́ m-āw̄ sedə́ kújə yā Nə́ɓā tə́. I kósə́ ngé rāā nāā gə̄ kə́ a əgan̄ i kɔŕ rɔ̄nel̄ dɔ Nə́ɓā tə́ ō, a ɓōkə́n̄ i Nə́ɓā tɔ̄ȳ ō.

⁶ Kə m̄-rāā rɔ̄ḿ ndoō i najə̄ rí tə́? Kə m̄-nōō rɔ̄ḿ i tām̄ rí tə́? Kəndā kem dɔ Nə́ɓā tə́ ba tél ɓōkə́n tɔ̄ȳ gogə́ rang i só tə́. Ni i nge kajəḿ ō Nə́ɓā yāḿ ō!

⁷ Nə́ɓā yāḿ, m̄-ndigə rāā rɔ̄ḿ ndoō alé, ba i kɔr̄ najə̄ seí loo ń toō tə́, ta kəɓa man̄ Jurdḛ tə́, kadə mbal̄ ń a ɓāŕnən̄ na i ngōn̄ mbal̄ ní tə́, dɔ mbal̄ Hermon gə̄ tə́.

⁸ Ḭ̄ ī-rāā ādə̄ kōō man̄ gə̄ ɓārə̄n̄ pukətu pukətu, man̄ kógə̄ḿ ɓāŕ man̄ madə̄n. Ḭ̄ ī-rāā ādə̄ man̄ gə̄ ní reēn̄ dɔḿ tə́ malang, taān̄ dɔḿ kɔ̄ɔ́.

⁹ Kadaá anī Kɔ́ɔ̄ɓē rāā kem majə seḿ, ndɔ̄ɔ́ anī m-ə̄nī pā yān ō, m̄-ndɔ̄ȳ Nə́ɓā ń i nge rāā kadə̄ m̄-ndi kə kumḿ ní ō.

¹⁰ m̄-ndigə kəda Nə́ɓā ń i mbal̄ yāḿ ní na: Dɔí ndígə̄naləḿ i tām̄ rí tə́? I tām̄ rí tə́ á m̄-njə̄rā kə rɔ̄nelēé aĺ ō, madə̄ ba̰ā̰ḿ rāā kumḿ ndoō tə́ ō ní?

¹¹ Ndū ń madə̄ ba̰ā̰ḿ gə̄ tájə̄mə̄n̄ ní tétə̄ kə̄ngāḿ rárák. Nin̄ ədamə̄n̄ kə dɔ ndɔ̄ gə̄ na ké Nə́ɓā yāḿ ngaá i rá wa.

¹² Kə m̄-rāā rɔ̄ḿ ndoō i najə̄ rí tə́? Kə m̄-nōō rɔ̄ḿ i tām̄ rí tə́? Kəndā kem dɔ Nə́ɓā tə́, ba tél ɓōkə́n̄ tɔ̄ȳ gogə́ rang i só tə́. Ni i nge kajəḿ ō, Nə́ɓā yāḿ ō.