PĀ GƏ̄ 41 - Bibəl ta Sar̄

Ndɔ̄ȳ yā de kə́ rāān̄ kumən ndoō tə́

¹ Pā kə́ kem makətūbə̄ yā ngār yā gōsə̄ pā gə̄ tə́, i pā yā Dabid.

² Rɔ̄nel̄ i kə deē ń gír̄ dɔ de kə́ tɔ́gən gətóó tə́ ní! Kɔ́ɔ̄ɓē a ajən ndɔ̄ kə́ yá̰á̰ kə́ to kum kaȳ aĺ teēń dɔn tə́ tə́.

³ Kɔ́ɔ̄ɓē a ngɔ̄mən kadə̄ ndi kə kumneé ō, a rāā kadə̄ rɔ̄n nelə̄n dɔ nang tə́ ō, a əya̰n kadə əsō jī madə̄ ba̰ā̰n gə̄ tə́ aĺ ō.

⁴ Kɔ́ɔ̄ɓē a ngɔ̄mən dɔ tə̄rá mo̰y yān tə́, adə̄ a tūr̄ gíŕ yá̰a̰ ton kə dɔ ndɔ̄ gə̄.

⁵ Mā m-ə́da na: Kɔ́ɔ̄ɓē, m̄-rāā majaĺ seí rɔ̄kum, ba á̰a̰ kum tō ndoō yāḿ, ī-rāā ādə̄ rɔ̄ḿ ngan̄g.

⁶ Madə̄ ba̰ā̰ḿ gə̄ ədan̄ najə̄ kə́ majaĺ dɔḿ tə́ na: A oy i rə́ngáý tə́! Ādə̄ deē oō najə̄ yān to̰ alé!

⁷ Ré deē kógə̄ḿ kə́ dandə́ tə́ reē go̰ō̰ḿ tə́ anī, i yā tél kaw̄ tétəń najə̄ dɔḿ tə́. Kɔ́ɔ̄ ní ɔy najə̄ kə́ rɔ̄kum aĺ gə̄ rāā sádə̄ tə́, ba ré teē ndágá anī seĺdə́ kə gō róbó.

⁸ Ngé kimə̄ḿ gə̄ malang ń noō, kánə̄n̄ naā yā kɔtə́ naā najə̄ dɔḿ tə́. Nin̄ tetən̄ kemdə́ ədan̄ na yá̰á̰ kə́ to kum kaȳ aĺ na a rāām̄,

⁹ ədan̄ na: Mo̰y ń rāān noó i mo̰y kə́ majaĺ ngá̰ý, ré ənīī ḭ̄ deē nang tə́ anī ā ḭ́ḭ dɔɔ́ to̰ alé!

¹⁰ Madə̄ taḿ ń m-ə̄ndā kemḿ dɔn tə́ ngá̰ý ō, m-ādə̄ əla jīn gōḿ tə́ kem kārāá ō ní, ɔr̄ njan əɓamə̄ń.

¹¹ Banī Kɔ́ɔ̄ɓē, á̰a̰ kum tō ndoō yāḿ, únəm̄ dɔɔ́ gogə́, ādə̄ m̄-rāādə́ yá̰á̰ ń rāān̄ seḿ ní!

¹² Yá̰á̰ ń m̄-gerə̄ń kadə̄ nelī seḿ ní n toó: Madə̄ ba̰ā̰ḿ əga kɔŕ tetə rɔ̄ɔ̄ dɔḿ tə́ to̰ alé.

¹³ Ḭ̄ ə̄nī najə̄ gírə́ḿ tə́ i tām̄ najə̄ kə́ gətóo dɔḿ tə́ ō, ḭ̄ ī-rāā ādə̄ rɔ̄ḿ ngan̄g gogə́ ō, adə̄ m̄-ndi ta kumií tə́ ngándáńg.

¹⁴ Ādə̄ de gə̄ ɔsən̄ gɔn Kɔ́ɔ̄ɓē Nə́ɓā yā Israel! Ta kəla gír kɔsə gɔnən i jóó ngá̰ý ō, a to i ta kaw̄ kə̄ jóo ō. Adə̄ i tītə̄ ń noō, adə̄ i tītə̄ ń noō!