PĀ GƏ̄ 40 - Bibəl ta Sar̄

Ādə̄ gerə̄n̄ yá̰á̰ ń ī-rāā tām̄ yāḿ tə́ ní

¹ Pā kə́ kem makətūbə̄ yā ngār yā gōsə̄ pā gə̄ tə́. Pā yā Dabid.

² M-ə̄ndā kemḿ dɔ Kɔ́ɔ̄ɓē tə́ adə̄ ngan̄g ngá̰ý, anī ni nēl̄ mbīn oōń nōō yāḿ.

³ Ni ɔrə̄m̄ kem bəlo kə́ majaĺ ngá̰ý tə́ ō, kum bɔr kə́ loo kə́ lú ngá̰ý tə́ ō, teē seḿ ndágá. Un udəm̄ dɔɔ́ dɔ mbal̄ tə́ ō, rāā adə̄ njaḿ əhɔ dɔ nang majə ō.

⁴ Ni-əndā pā kə́ kijə taḿ tə́, i pā tɔ̄ȳ Nə́ɓā yājí. Ngá̰ý gə̄ a a̰a̰n̄, adə̄ a ɓōlə́n̄ ō, a əndān̄ kemdə́ dɔ Kɔ́ɔ̄ɓē tə́ ō.

⁵ Rɔ̄nel̄ i kə deē ń ənī kemən adə̄ Kɔ́ɔ̄ɓē, ba tūr̄ gidən adə̄ ngé kɔjə rɔ̄ gə̄ ō, ngé sor̄ gə̄ ō ní.

⁶ Kɔ́ɔ̄ɓē Nə́ɓā yāḿ, yá̰á̰ ń ī-nóm̄ ō, yá̰á̰ kə́ to kɔr kum gə̄ ń ī-rāā tām̄ yājí tə́ ō ní, i yá̰á̰ kə́ bo ngá̰ý gə̄! De kə́ tītīí gətóo. m̄-gḛy kəda najə̄ yá̰a̰ gə̄ ní ō, tél kəda kə̄ nja naā tə́ ō, tā ba yá̰á̰ kə́ yā kəda gə̄ ní alə̄n̄ naā ngá̰ý.

⁷ Ī-ndigə yá̰a̰ tun̄ aĺ ō, yá̰a̰ ndējə̄ aĺ ō. Ī-mbutə bəlo mbīḿ kadə̄ m-ōoń loo. Ī-dəje yá̰a̰ tun̄ kə́ róō horoó aĺ ō yá̰a̰ tun̄ kə́ tām̄ yā majaĺ tə́ aĺ ō.

⁸ Tā anī m-ə́da na: Á̰a̰ā̰, mə̄kɔ́ m̄-reē rɔ̄í tə́. M-ə́ngé yá̰á̰ ń kadə̄ m̄-rāā ní kem ndāŕ ndang najə̄ kógə̄ḿ kə́ ɓír̄ gidə naā tə́.

⁹ Nə́ɓā yāḿ, m̄-gḛy rāā yá̰á̰ ń nelī ní ō, ndū najə̄ yāí i kemḿ tə́ ō.

¹⁰ M-ə́da najə̄ yá̰á̰ kə́ gōtə́ gə̄ ń ī-rāā ní dan ngé kán̄ naā kə́ ngá̰ý gə̄ tə́. Kɔ́ɔ̄ɓē, ī-ger̄ kadə̄ m-ūtə̄ taḿ alé.

¹¹ m̄-ɓɔ̄ɔ̄ dɔ yá̰a̰ rāāí kə́ gōtə́ kemḿ tə́ alé. M-ə́da na: Ḭ̄ i de kə́ rɔ̄kum ō nge kajə deē ō. m̄-ɓɔ̄ɔ̄ dɔ kem majə yāí ō najə̄ kə́ rɔ̄kum yāí ō, dan ngé kán̄ naā kə́ ngá̰ý gə̄ tə́ alé.

¹² Ḭ̄ Kɔ́ɔ̄ɓē, kumií a o̰o̰ī tām̄ yāḿ tə́. Kem majə yāí ō, najə̄ kə́ rɔ̄kum yāí ō, a ngɔ̄mə̄mə̄n̄ kə ndɔ̄ gə̄.

¹³ Yá̰á̰ kə́ to kum kaȳ aĺ gə̄ rāāmə̄n̄ ngá̰ý, m-ásə́ tə́da malang alé. Yá̰á̰ kə́ gōtə́ aĺ gə̄ ń m̄-rāā ní m-ə̄gā kə̄rādə́, adə̄ m̄-gḛy ka̰a̰ yá̰á̰ kə́ gōtə́ aĺ yāḿ gə̄ ní to̰ alé. Kutədə́ tɔȳ kutə nənga dɔḿ, adə̄ tɔȳ tɔ́gə́ḿ.

¹⁴ Kɔ́ɔ̄ɓē, ɓɔ́ ī-gān̄g dɔḿ! Kɔ́ɔ̄ɓē, ī-reē láẃ ī-dḭḭ̄m̄!

¹⁵ Ngé gə̄ ń sāān̄ tɔ̄lə̄m̄ ní, ādə̄ rɔ̄də́ sɔl̄də́! Ngé gə̄ ń sāān̄ kadə̄ yá̰á̰ kə́ to kum kaȳ aĺ teē dɔḿ tə́ ní, ādə̄ télən̄ kə gidədə́ kə rɔ̄sɔl̄ kə́ ngá̰ý!

¹⁶ Ngé kəgōḿ gə̄ ní, ādə̄ rɔ̄sɔl̄ ɔgə̄də́ rāā yá̰á̰ kógə̄ḿ.

¹⁷ Banī ngé sāāí gə̄ malang ní, ādə̄ rɔ̄nel̄ asədə́ nák najə̄ yāí tə́ ō, ngé gə̄ ń tárnī ḭ̄ nge kajə de gə̄ ní, ādə̄ ədan̄ ngándáńg na Kɔ́ɔ̄ɓē i de kə́ bo ō.

¹⁸ Ndoō rāām̄ ō rɔ̄ḿ tō ndoō ō, banī Kɔ́ɔ̄ɓē gír̄ dɔḿ tə́. Nge rāā seḿ ō, nge gān̄g dɔḿ ō, i ḭ̄. Nə́ɓā yāḿ, ī-lōō kɔr bā̰ā̰!